Nigeria ah Suicide Bomb nih puak, mi 9 si

Nigeria ah Suicide Bomb nih puak, mi 9 si

Oct. 30, 2016: Nigeria leilu-nisuahna lam a om Maidugiri khuapi ah zan in Boko Haramte dinga ummawh ten sihpih bomb nih puaksak uh a, mi 9 kiim in sihna tuak hi ci-in mit tawh a mute leh ulian ten gen uh hi. A bomb puaksakte lakah numei khat kihel hi. Sihpih bomb puaksakte motorised rickshaw ah tuang uh a, tu zingsang nai 7am local time (06:00GMT) in bomb puaksak uh a, mi 24 in liamna tuak a, liamna tuakte zato inn tuamtuam ah kipuak hi ci-in ci-in Nigeria Emergency Management Agency (NEMA) spokesman Mohammed Kanar in zan in gen hi.

Civilian self-defence fighter Dan Batta in sihpih bomb puaksakte galtai mi 16,000 val omna refugee camp sung va lut sawm uh ci-in gen hi. Sihpih bomb puaksak numei khatin refugee camp panin numei leh pasalte hong pusuak lai takun a bomb puaksak a, pasal nga si in, numei 11 in liamna tuak hi ci-in military spokesman Colonel Mustapha Anka in gen hi. Tua khit nai kal khat leh a lang kihal in sihpih bomb nihna puaksak pen in a bomb puaksak hi ci-in gen hi. Boko Haram ngongtatte gamtatna dingin a ki-upmawh hangin tu dong kuamah in ko gamtatna hi a ci om nai lo hi.

Al Jazeera correspondence Ahmed Idris in Boko Haramte leilu lamah tu teng lawhcing mahmah uh a, tawl khat sung a thanem hangun hong kipan kik uh hi cih lauhthawng huai hi ci-in gen hi. A beisa kha 10 sung regional forces kici Nigeria, Cameroon, Chad, leh Benin Republic galkapte kipawl in Boko Haramte nasia takin a dona hangun thanem mahmah uh a, mun nih hong suam kik zo uh ahih manin dual tuan nai lo uh cih kitel a, Nigeria bek hilo in a kiim tengah lauhuai tam mahmah lai uh hi cih kilang hi ci-in gen beh hi.

Boko Haram ten Nigeria leilu lamah Islamic thukham khauh mahmah Shariat Law kici tawh ki-uk ding deihna tawh kum sagih sung kiphinna na nei uh a, tu dong mi 20,000 val in sihna a tuak banah million nih val in teenna ding kician nei loin om ta hi. March 2015 in Boko Haram ten ISte tawh a kipawlna thu uh leh a muanhuaina uh (allegiance) na pulak uh hi. -Agencies/ Thang Khan Lian