Discrimination I cih ciang bang ahi hiam? Part-II

Discrimination I cih ciang bang ahi hiam? Part-II

“ki tuambawlna” I cih ciangin mi hing khat peuhpeuh ahkl mipawlkhat te liangko kikim lo aa ompih, paupih, gamtatpih na hi. Siavuan cih nasepna ah numei le pasal akikhen loh hangin Siavuan sin theihna ding sangzopna ah Pasal te sangin Numei te Tansawm Mark tam kisam zaw sese hi. Myanmar gam ah nasem hongpai Gamdang mite le Myanmar Gam mite kikal thatang bei kibang, I sepzah kibang ciatciat Myanmar Gam mite thaman tawm hong kipia zaw sese hi. Alang khatah, Gamdang mite ahih le Hotel man, Taxi man, etc cih te Local mite sang tam pia kha zaw sese uhhi.

Ei- ten zong tuambawl, Miten zong hong tuam bawl

“Ei te” cih lak ah “amau te” cih atawm no pawlkhat hong kihel ciangin “ei te” in ki tuam bawl thei kha zel aa tua mah bangin “amau te” cih na sung ah “ ei te” cih mitawm pawlkhat I va kihel ciangin zong tua bangmah in “amau te” in hong tuambawl thei uhhi.

Zomi te sungah zong om thei mahmah hi. Beh vai, biakna vai, khuavai te ah I theih lo kalin kituam bawlna lian mahmah thei hi. Hih kituam bawlna cih te pen khat veivei ciangin mittawh kimu thei lo aa, hih lian hi ci-in lahkhiat thei ding haksa mahmah thei hi. Phaileng khua-ah ka ki muhpih ngei Tuiphum sia khatin atuah khak ngei thu honggen kaphawk kha hi. Amaa honggen na-ah “Gospel kapai na khat ah inntek te in Nang bangbeh na hia Sya hong ci-in “………” beh te hing kacih le aw ka sal lui te na hi vua leh hong ci mawk” ci hi.

Ciamnuihna aa I zat kammal te, Ciamnuih zia te in zong I lungsim sungah “ataktak sakna” liantakin na om thei hi. Kammal tawh akizawh thawh phadeuh khua te om hi. Gtn. “Phaileng aki cih nak le: Phaileng dawi” cih kammal in hongzui aa nuihzak na ding hilo pipi nuihna in kizang hi. (Tuilang te, Keltal te, Zo te cih bangin apau uh ciinna, akhelnono aa genna pan tuam muhna hong kipan hi.)

Tuilang khua mi hihna hangin ciamnuihna, Phaileng khuami hihna hang ciamnuihna, Zo (I Aw) pau zat manin ciamnuihna cih te pen a sawtsawt ciangin “ciamnuih athuak kha te” aa dingin kisimmawhna, kituambawlna in ngaihsun kha ding uhhi.

Galkap hunlai-in Christian I hihman in “Galkap Bu” Zalian kisuak theilo hi.

SDA te Sabbath ni ahi Saturday ni bawhlung suih ding ahun khinto lo aa Sanni ni mah I seh teitei zong kituambawlna Discrimination ahihi. (Tua veve bang hangin Sunday ni Bawllung sui lo I hiam cih kidong kik leng, Nipi ni kuan nasem ngei hiam ki cih tek vet se hi.)

Adaik diakin nawlkhin bawl (exclusive) le hepkhiatna(rejection) te ah kilang phadeuh hi. (hih mun ah athupi penpen I phawk dingah “Cidamlohna – gtn.. TB natna, ဘီပိုး cih lungno nei te, AIDS nei te tawh annkuang zangkhawm lo, tuihai zang khawm lo cih te kihel lo hi. Ahih hangin annkuang na ngawn ah tukhawm nuamlo cih ciangin Kituam bawlna lian mahmah khat hong suak leuleu hi.)

Mikhempeuh dik khinlo aa, zong, gilo khinlo hi. Thu um mi khempeuh midik higailo aa, Thu um lo mikhempueh zong agilo hi peuh mah lo ahih manin hih Stereotype te mankhin den khollo hi. Ahih hangin I theihloh kalin hih stereotype te in I nuntakna sungah thuktakin I ngaihsutna te hong tuam cip aa “sehtawm ngaihsutna pan ataktak bangin ngaihsutna” na dong ah hong tunpih hi.

Gamkhat sungah hita le Minam khat sungah hita le, innkuan khat, beh khat sungah hih bang ngaihsutna pen atawm atam in om den hi. Mokyu Syama limlim pen numei dingin kingaihsun aa Taxi,motor hawl ding limlim pasal dingin kingaihsun hi. (Yangon khua sung bekbek ah zong Numei Taxi hawl tam mahmah ta hi.) Palik pen pasal te nasep ding, engineering khawngte zong pasal mah kilawm cih ngaihsutna om ngei tek aa mun pawlkhat aa thuk takin om lai hi. Annhuai ding, puansawp ding, inn na sem ding pen Numei te nasep hi kici aa akhangto gam te ah tuabang na kici lo leuleu hi. Annhuan siam minthang atawm zaw pasal hi aa Mei omna khuapi te ah Puansawpset tawh puan kisawp ahih manin Numei/pasal sep ding kikhen thei nawnlo leuleu hi.

(Sensitivity Rate asang lua ding deihlo kahih manin, genteh theih ding thutam pi tak om mahta le hong at khia nawn kei-ing. Laisim mimal khat ciatin ei pat tantan ngaihsut beh ding ahihi.) Dal Sian Amm, Zingsol Group

Part -3 pen “Discrimination Nam tuamtuam te” hi ding hi.