Lawhcinna a piangsak na mipite hi ~ Hau Za Cin

Lawhcinna a piangsak na mipite hi ~ Hau Za Cin

Pilna tawh makai semte in lawhcinna taktak a tunna dingin a mipite sepna leh hanciamna bek tawh lawhcinna cingtaak kingah hi cih tel mahmah uh hi. Tua manin mipite leh seppihte thalawpsak siam ding kisam penpen hi. Lawhcinna dinga nasem dingin mipi mah kisam pen leuleu hi.

Laigelhsiam Mark Fuller in, “Banghangin America in Vietnam Gal Lel Hiam” cih laibu a gelhna sungah galkap makaite khempeuh in ‘gualzawhna bangci ngah ding’ cih a geelna uh, a tupna uh kibanglo hi, ci uh hi. Galzo ding ut uh, ahi zongin a tupna uh kibanglo, a sepnopzia uh kibanglo, a hoih vive ahih hangin a sepzia uh kibanglo kha zenzen ahih manin America in Vietnam lel mawk hi. Tua manin makaite leh mipite in lungsim khat a neih theih ding kisam mahmah hi.

Zomi sungah makaite lungsim leh mipi lungsim bangciangin kimu tuah hiam cih ka thei hi. Makaite ngaihsutna ciang mipi in a ngaihsutpih baan hiam? Amuhpih baan hiam? A telpih takpi hiam cih kidot huai mahmah ding hi. Theihna, ngaihsutna leh deihna, geelna te a kitheihpihloh, kimuhpihloh ahih leh bel lawhcinna cingtaak a kitangtun thei takpi ding hiam? ka ci nuam hi.

Mipi leh makai kizopna ahoih a om kei leh lawhcinna omlo ci ihih manin makai leh mipi sepzia ding bangci hiding cih tawm gensuk lai ni.

1. Kua Koi ah?: Makai pil i cih in kua in bangsem leh bangciang kitung ding cih a theih kisam hi. Kua in kua tawh semkhawm leh lawhcinna gina pen ding hiam cih a suutsiam ding hi. Kua in koi pan sem leh lawhcing pen ding hiam cih a theih mahmah ding hi. A khiatna ah makai khat in a makaih mipi sungah kua in bang talent (siamna, theihna, sepzawhna, lunglutna, etc) nei hiam cih a tel mahmah ding kisam cihna hi. Makai pil khat in a mipite tawh kizopna hoihtak a neih kisam cihna hi.

Kizopna a neih kei leh a mipite in bang lungsimpua, bang ngaihsutna nei, bang lunglutna nei, bang uukna nei cih tello dinga, a sep siampen ding uh zong theilo ding hi. Mipi tawh kizop siamna a nei makai kisam cihna hi. Mi khempeuh in i lunglut lam ciat sem dingin a utlo kiomlo a, a lunglutloh lam sem dingin mi khatpeuh in haksa a sak bek thamloh a sepzia ding theilo in a seppatzia ding zong tello pah hi. A lunglut lam hipeuh leh a sep ngei kei leh zong a sepzia ding kan ngap mahmah lel hi kici hi. Tua manin kua koi ah cih pen tel mahmah ding ahi hi.

Mite lunglutna, lungsim luanzia bangci theih ding cih ciangin kihona, kikholhna, annekkhopna, kimawlkhopna cih khawng pan thu tampi kithei thei hi. Dotna leh dawnna tuamtuam kidot kiholimna pan zong kithei om hi. A lunglut lam thugenna hun neisak leng zong kithei hi.

Tua manin makai pil leh makai siam i cihte in zong ni khat sakhi thau banga sun khat zan khat thu a makai siam hilo in hun tampi, ni tampi, vai tampi mipi tawh a zatkhop ciang a siam hipan a, kisinna leh kitathiam tohtohna tawh makai gina a suak uh hipan hi. Makai lawhcing i cihte in bangzahta in amau leh amau mipi theihpihloh in na kisin ding uh hiam cih pen i telsiam toto ding hi.

2. Pahtawi Siam Ding: Makai khat in mipi leh seppihte in lawhcinna dingin sem thei uh hi cih bek a tel ding hilo a, a sepnop mahmah ding uh zong a kisam hi. Sem thei napi sem ut kei le uh lawhcinna om tuanlo ding hi. Tua manin bangci leng mipi in thanuamtak in sem ngap ding uh hiam, bangci leng zingsang lol nuam ding uh hiam, bangci leng zansawt pipi zong hak ngap ding uh hiam cih pen makaite in a kan ding, a ngaihsut ding ahi hi.

Mipite lawpna ding in nasepzia leh mabun zia a gel siam kul hi. A kul leh a hun tawh kituak in a sepzia, mabunzia zong a laih ngam ding ahi hi. Mipi in haksa sa pipi in sakol tui neksak sawm banga nawk gawp ding hikhinlo hi. Zolsiam kul, kaih siam kul, hopih siam kul cihna hi.

A tamzaw ah pahtawina leh thapiakna tawh mipi lungdam penpen a, pahtawi siam ding leh thapiak siam ding kisam pha mahmah hi. Lungdam cih den zong thapiakna leh hansuahna hituanlo a, kamsiam mawkmawk tawh hilo in lungsim takpi tawh lungdamna leh pahtawina in mite lungdamsak, thalawpsak, nasep lawpsak hi. Pahtawi hun ding, thapiak hun ding, zol hun ding, makaih hun ding a siam kisam cihna hi. Lungsim lam sin mi psychologist te in, mi khempeuh in ‘kei sep neucik khat nangawn hong kitheihpih, hong kipahtawi hi….’ cih theihpihna kideih ciat hi ci uh hi.

3. Kua in bangci sem ding?: Mipi sungah lunglutna tuamtuam a kitheih khit ciangin makaite in kua in koi ah bangci sep ding cih a khentel siam kisam leuleu hi. Vai lianpi a makaih zo ding khat pen vai neucik semsak leng pammaih mahmah hi. Vai neucik a sem thei ding khat vai lianpi guan leng gim mahmah ding hi. Tua manin kua in bangzah sem zo ding, koi pan bangci sep ding cih pen thupi mahmah hi.

Mi pawlkhat pen a kikholhpih dente tawh nasep khat guan leng a sepsuah tampi pha a, a kipawlpih theih melloh khat tawh koih khawm leng seplah tampi nei thei hi. Mihing hong thalawpsak zong mihing mah hi thei a, nasep ding vai hong kiguan zong hithei hi. Seppih ut mahmahte tawh sepnop mahmah semkhawm tazen leng nasep liau mahmah ding hi. Tua manin kipawlna leh vai khat peuh ah ‘talent’ leh ‘motivation’ a thupina mangngilhloh ding ahi hi. A utlo pi leh a sem ngaplo pi khat lah sem thei in teh cih manin sep ding leh vai gina piakloh ding ahi hi. A mipi in a pang nuam khat pen makai semsak leng gan zual theilo sap mahmah bangin lehtai kik theizaw hi. Tua manin mipi in a pang den thei khat pen mipi mah in pang leh (ama’n) nuamsa zaw thei hi.

Mi a thalawpsak theite makai hoih ding quality nei hi cih mah bangin tua banga mi dang a huaisiam, a kaikhawm siam khat pen vai khat peuh ah a makai lamin koih leng a seppihte thapiak siam ahih manin a sep khat peuh uh zawhthawh mahmah lel uh hi. La makai siam vive lak ah a lawmte a huai deuh, a kaikhawm deuh khat om den a, tua makaihza pia leng a lawm dangte in amah tawh kithuahin a tavuan uh a zo mahmah den uh hilel hi. Mi pawlkhat leuleu lah amah bek tavuan pia leng a semzo zaw, a sem siamzaw, mi tawh sepkhop sang amah bek in a sem siamzaw om leuleu hi. Tua kikal makaite in mit ciim taka et ding ahi hi.

4. Mi tawh kizopna liansak den ding: Makai khat ding cih pen a kholhpih ngei teng bek tawh a kikholh den ding hilo hi. Mi tuamtuam, mithak, mai thak tawh zong a kithuah den ding ahi hi. A mi hopih, a kikholhpih a zaisak semsem ding ahi hi. Ama khangual teng bek tawh kikhawlsiam cih bang makai gina suak ngeilo ding hi. Naupangzaw te zong kholhpih siam, upa pitel putek te zong kholhpih siam, naupang nangawn tawh a kimawl thei, a ciamnui thei mi kisam hi. Ama biakinn a kikhawm teng bek tawh kikhawl thei, ama lunglutna lam a lunglutteng bek tawh kikhawl thei cih bang hilo ding hi. Matutna lian leh maithak matutna dingin mi tampi, lungsim paizia tampi theih, zeeksiam, zol siam, hei siam kisam ahi hi.

Mi tuamtuam zia theilopi in makai a sem khat in a sawtlo in a makaihna sungah kitotna, kinialna, kithangpaihna, kihopih utlohna cih bang piangsak ding hi. A hang in a kigawm theilo tui leh sathau pen a tung leh a nuai ding omsak den hi. Makaite deihna khat bek a zui den ut teng leh makaite deihna kawcik mahmah bek neu a sa lua te kinawk ding hi. Tua manin muhna, deihna, gelna leh lungsim a zai mahmah kisam hi. Sum, hun, thu, kammal tampi bei khit ciang zong kizopna, kikholhna a piang nai kei leh a kigawm theilo, ngaihsutna a kibanglo om cihna hi. Mipi a tamzaw ngaihsutna khat a neisak thei makai mi in makai lawhcing ahi hi. A tup, a sawm mipi lak siam, musak thei, deihsak thei, khialah sak thei cihna hi.

Mipi sungah ama makaihna a ban zom ding leh mipi deihna a makaihzo ding mimal kua hiam cih makaite in a theih, a tel, a kankhiat a apattah ding uh ahi hi. Tua pen makai leh makaihzia a kilaihgawplohna ding cihna hi. Ukcipna hilo in mipi deihna a kalsuanpih ding mi cihna hi.

5. Matutna ding lampi: Makai siam penpen i cih zong amah bekin matutna nei theilo hi. Mipi deihna amah bek in tangtut ngeilo hi. Amah tawh a sem khawm, a tonkhawm mipite in bang lampi tawnkhawm, zui khawm leh matutna kicing, lawhcinna cingtaak ngah ding cih a theih kisam hi. Kua in koi ah sem ding, kua in bangci sep ding, kua in kuatawh sem ding, kua leh kua kizomsak ding, kua tengin amah bek in sem ding, kua teng mitawh kipawla vai khat semsak ding cih khempeuh makaite ngaihsut ding ahi hi. Tua ahih manin matut ding i deih vai khat pen bangci sep ding, koi lampi tawn ding cih makaipipa leh makaite khentat ding ahi hi. Mipi te lunglutna leh thangahna te theitel in nasep vai tuamtuam sehdan, hawmdan a siam uh kisam ahi hi.

Nasep khit ciang, vai teng a kizawh khit ciang, bangci nung etkik ding cih zong tu hun ciang makaite tavuan lianpi ahi hi. I sepzia a hoih hiam, i sepzia ah kheel ding a om hiam, i sepna ah a kicinglo a om hiam…. cihte khempeuh etkikna khat neih hamtang ding ahi hi. Makaipa leh makaite khempeuh tu khawma tal dom liang maha et kik a kul hun om hi. Mipi tung pan “bangci na sa vua” ci a dotna tawh zong mipi te nopsakdan, nopsaklohdan cihte kithei thei hi. Mimal khat leh nih dotna pan zong i vai bangci hiam, a lawhcing hiam cih kitelna om thei hi.

Bangbang i gen zongin mipi huhna leh panpihna bek tawh a bul pan a tawp dong leh a ban ah (mailamah) vai omlai ding khempeuh a lawhcinna ding a kingakna khatbek om a, tua pen – MIPI tungah ahi hi. Mipi tawh a semkhawm siam peuhpeuh makai lawhcing, makai gina a suak ding ahi hi.

Hau Za Cin
Phuitong Liim