Sittel Hamtang In ~ Hau Za Cin
Tuhun leitung pen thukizakna baih mahmahta hi. Internet om, phone om, facimile machine om, a tuamtuam – tu leh tu a kizop theihna tam mahmah hi. Ahi zongin tua kizopna, thukizakna te ah a kigen, a pulak khempeuh thudik maw zuau maw, ahih kei leh hong khemna uh maw cih pen tel khit ding baihlo hi. Bangbang hileh thu pen kantel sitset ding, sittel mahmah ding hoih hi. Thu leeng tamlua mahmah ahih manin a tak maw, zuau maw cih sittel kim ding pen baihlo veve a, a hoih maw, a hoihlo maw — thu namkim in hong bawm hita mai hi.
Pulpit tung pan thu kigen khempeuh up khit pahpah ding hilo hi. Pasian thu ahi takpi hiam cih zong sittel kul hi. A genpa deihna bek kipulaklak zong na hithei giugiau hi. Ama deihna, ama thu peuh a gengen zong na hithei lai hi. Pulpit neipa, siangtho pen mun ah a ompa thu a kigen takpi hiam cih sittel hamtan ding ahi hi.
Mihing te pen thu sittel sitset lam ah kiva mahmahlo hi hang cih a kitel mahmahna honkhat pen gal kidona tuamtuam om den sungah a mawhzaw panpihnopna, a khial zaw gup tintenna, a zawngkhal zaw leh a haizaw te mawhsak nopna te lian mahmah lai hi. Vaihawm ding leh kumpi ding kitel ciangin a siam a theite kitel ding sangin ama angsung bek a thei ding mite khawng kitelcing nuam mahmah hi. Kamsungah ah a ‘khum’ pilpial dingin zatui kha muamkhum banga kibawl hong kipiak ciang a sungah zatui kha mahmah om hi cih thei napi hangin kine veve hi. Natna pan damna dingin bang zatui ne leng hoih ding cih sangin khualak nupi kamtam khat kamdawn peuh kimuangzaw thei mawkmawk hi. A taktak in a hang kantel phot, sittel phot kisam ahi hi. Mi khat bek tungah a hoih pen midang tungah hoihlo thei hi.
Tuhun ciangin internet tung pan in thu leh la kisuaksak ziahziah a, thuhoih leh thusia kizel ziahziah hi. Khantohna ding a tangko a om mah bangin khantohna a bahsak thei, sumbawlna a siasak thei, cidamna a susia thei nek leh dawn thu nangawn kisuaksak ziahziah hi. Tua bang hun ah teeng ihih manin i ittel sem a kisam ahi hi. A diak in gam zawng leh gam khangto nailo te lak ah internet tungtawna thu kigente pen a tak maw, a zuau maw cih kantel ding haksa diak hi. Gam khangto leh gam hau ah mite in a tak leh a khem khentel baih in sittel siamzaw tham hi.
A khangto lai tak gamte ah internet tungtawn in thu a kithehthang ciangin a lian a neu in za khin pah a, naupang zak ding hoihlo, naupang et dinga hoihlo, naupang sim dinga hoihlo cih bangte kikhense lo hi. Sanginn ah zong kisinsak tuan se lo uh ahih manin internet ah a muh peuh uh naupangte in sim, mu, thei, ciamteh ziau uh hi. A tak a zuau khentel theilo uh ahih manin a vekpi in um khin lel uh hi. Tua in naupang khanglai lungsim ah sia leh pha theihna, a hoih leh ahoihlo khentel utna cihte dau sak mahmah hi. Tua banga khangkhia naupangte a picin ciang ‘naupang lungsim’ pua den theiin picinna taktak neilo thei hi.
Leitungah Greek te pen pilna a lunglut mahmah, pilna a deih mahmah leh pilna a thupi sak mahmah minam ahi uh hi. Jews te in ngeina a thupisak zah mah un Greek te in pilna na thupi bawl uh hi. Mipil leh thu ngaihsun mi (philosopher) zong tampi na nei uh a, a minthang mahmah laka khat pen Plato ahi hi. Aman bangci hiam cih leh, “Theihlohna pen siat ding kipatna hi,” ci hi. Theih ding hinapi theilo, theih kul napi thei nuamlo, theih ding kisam napi kinbawllo pen siatna a tunna ding a kipatna hi ci hi.
Tua ahih manin thu leh la tampi a kingah ziahziah theihtaakna leitungah i teen laitakin i kitheihmawhbawl theihloh thu tampi omta hi. I theih a kul tampi omta cihna hi. Utta kei leng i sep kul himawk hi. Nu leh pa, makaite, siate, pilna neite, thu theite, gamtat siamte in naupangte bang laibu sim sak ding, bang Video ensak ding, bang thukizakna simsak ding cihte i tengsak, i kaikhawmsak, i teelsal ding kisam pha mahmah hi. Mailam ah amau mah eite hong makaih ding, eite hong panpih ding, hong huai ding, hong don ding, i maban a zom ding te ahih man un a picing dinga i pattahsiam ding kisam kasa mahmah hi.
Theihlohna tawh a kilehbulh pen theihna ahi hi. Thutheihna zong kici thei ding hi. Plato in theihna i cih pen ‘thei’ hi hang cih i theihna ding thu thum om hi, ci hi. Ama pen ah, thu pen thudik thumaan ahih kul hi. Anihna ah, thudik hi cih i up phot kul hi. A thumna ah, muh theih in a kilakkhia ding ahi hi. Leitung pen a bem hi cih pen i theihcianna dingin a bem lam a kigen ciang i up phot kul hi. I up khit ciang dik takpi hi cih zong i theihna dingin mit tawh a bem lam a kimuh theih kul hi.
Greek khuapi Athen ah siampite omna mun Delphi kici om hi. Tua mun ah Pythia kici zong na om kha hi. Nikhat Pythia in, “Plato siapa Socrates mah pil pen hi,” ciin gen hi. Socrates in a zak ciangin, “Kei pil pen kei ing, leitungah nuntak a manphatna a thei a om leh tuapa pilzaw ding hi,” ciin dawng hi. A muh peuh uh a dot uh hangin kuamah in leitungah nuntakpih ding, khiatlah ding a kician in a gen thei a om tuankei uh hi. Amau upmawh ciat gen uh a, Socrates in bel a gen ding a thei kei hi. Midangte in bel a upmawh khat uh gen pong uh a, Socrates in bel a gen ding theilo, theih neilo ahih manin a theihloh lam maizum hetlo takin a genkhia ngam hi. Tua a genkhiat ngamna pen tak mah Greek siampite in Socrates a pil pen ahihna hi ci uh hi. Theih ding tamlua mahmah ahih manin a theih a tawm luat mahmahna a theipa Socrates pen mipil pen in kiciamteh hi.
Tampi thei a kisate sangin theihlai ding a tamluat dan a theite mipil hizaw hi cihna hi.
Leitung mipil tuamtuam, ngaihsutna hoih nei tuamtuam, thu leh la thei tampi te in nisim in i mai ah thu hong lui den uh hi. A manpha maw a manphalo cih pen eimah ciat in i sittel ding ahi hi. Ei adingin a thupilo khat tawh hun beisak den pen pammaih mahmah hi. Ei adingin a manpha thu tampi i theih ding om ahih lam phawk in a manphalo nate ah hun leh tha, sum leh pai tampi beisak kei ni.
Newspaper na sim ciang a koi tengah hun tam na beisak pen a? Laibu na sim ciang a bangthu ah hun tam na beisak pen a? Mi tawh na holim ciang bang thu tawh hun tam na beisak pen vua? Na kikhop ciang bang hihna in hun tam a bei pen a? Pulpit pan thu kigente ah Pasian thu leh nang kha nuntakna ding na meetpih ding bang thu teng taktak a kigen a — thu zaknop leh khualzinna report peuh tawh nitak ihmut suak liang, taw-kham liangin na tu kenkan kha hiam?
Sittel Hamtang In!
Hau Za Cin
Phuitong Liim
Comment piaknop aomleh...