Philippines biakinn sungah Bomb puakkham in mi 18 si, 83 liam

Philippines biakinn sungah Bomb puakkham in mi 18 si, 83 liam

Philippines gam ii leitawlam aom biakinn sungkhat ah Sunday biakpiak kikhop hun laitak in Bomb akizom in 2 veitak puakkham ahih manin, mi 18 takin sihlawh cih AFP News pan kiza hi. Tua biakinn pen Catholic Church khat hi a, tuni Sunday kikhop hun laitak in migilo te’n Bomb asukham uh ahihi.

Southern Philippines gamsung pen Islamist Militants akici ngongtat migilo te atam mahmahna hi a, Muslim te tammahmah ahih manin, buaina zong atam mahmahna hipah hi. Tua ahih manin, galgim nammahmah denin, abeisa inzong Southern Philippines gamsung ah buaina tamveipi piangngei khin hi.

Bomb apuakkhapna munpen Jolo Island kici tuikulh tung aom Catholic Church ah zingsanglam Morning Mass kikhop hunlaitak in apuakkham ahihi. Amasa pen biakinn sungah kikhop hun laitak in apuakkham hi a, tuazawh asawtlo in biakinn apualam ah khatbei puakkhapbeh leuleu hi ci’n Region Military Spokesman khatin genkhia hi.

Asi aliam atamzaw pen biakinn kikhawm in apai te leh galkap tezong pawlkhat kihel uhhi. Tua biakinn minpen Mount Carmel Cathedral kici a, biakinn akizepna Glass tepen puakkham in kithehzak zihziah hi.

Asi mite lakah khuasungmi Civilian 12 kihel a, tuaban ah galkap Soldier zong 5 takin sihlawh uhhi. Tuabek thamlo aliam bekbekzong mi 83 bang phahi ci’n Region Military Spokesman Lieutenant Colonel Gerry Besana in genkhia hi.

Regional police chief Graciano Mijares in apulakna ah misi pen 27 ci a, aliampen mi 77 pha hi ci’n pulak a, AFP te pulakna tawh ki lamdangpian hi.

Bomb anihna apuakkham pen biakinn apualam ah akikoih Motorcycle tungpanin apuakkham ahihi. Motorcycle ii avankoihna Utility Box sungah Bomb akikoih hi a, tuapanin apuakkham kici hi.

More: Indonesia biakinn sungah Suicide Bomb asukham te innkuankhat ci

Aliam agimlua ahuaisialua tepen Helicopter tawh ki puakhia in, ageinai aom Zamboanga City sung aom zato te ah zatui kibawl, Medical Treatment dingin kipuaksak hi.

Hihbangin gitloh ngongtatna pen abeisa in ahici gamtatdet ahi Abu Sayyaf kici migilo kipawlna te mah hidinghi ci’n kumpi thunei te’n genkhia uhhi. Sawltak #zomidaily