Sinlai gu bang hongzen lua e (Laitui pawisiim te tuahsiatna)

Sinlai gu bang hongzen lua e (Laitui pawisiim te tuahsiatna)

Laitui khua ah Khuado Pawi siim in bawlung kidemna ah akhatna ngah in aciah lam uh ciang un mawtaw tawh a tuahsia ih sanggamte’ vai ih zak ciang in ih dipngek na mahmah hi.

Zomite mawtaw tawh tuahsia a ih lomsihna atamzaw pen lungdamna leh Pawipi khawng tawh ki memat deuh kasa hi.

2009 kum in Tonzang ah mopawi siim a paitote zong aciah lam un mawtaw kibungh in mi tampi si.

2010 kum Cope kum 100 cin pawi lai in zong mawtaw kibungh in mi tampi si. Zomibup hong linglawng sak.

Tutung a zong Khuado siim a ciah mah hi leuleu. Ngaih suthuai sa ing. Ih lampite mahmah sialua maw ? Mawtaw tuang tamlua maw ? Lungdam khengval maw ? Sinlai gu bang hongzen lua e.

2009 kum a Tonzang pan a ciahsuk a atuahsiate’ thu ZoNet ah ka suahsak pen hong khahkik ing.

(photo pen tutung hong nusia numei 4 lak ah khat ahi Sayama Hau Ngaih hi)

Adah akap khempeih Hehnemsiam Huhpa Khasiangtho in hong hehnem hen.

Dahna lianpi tawh
Mung Laan Thang
Zangkong

Related: Taingen leh Hiangzing kikal ah mawtaw kibung, mi 5 si

From: “M L Thang” <kaputhang [at] gmail.com>
Date: Oct 26, 2009 1:52 PM
Subject: Zomi 5 Si
To: <zomi [at] yahoogroups.com>

Zanni (October 25- Sunday) in Tonzang ah Mopawi siim leh vai dangdang tawh aciahtote Kawlpi lam zuanin aciahsukkik laitak Tai Ngen khuakhang atu’n ciangin brake ngah nawnlo in kamsiatna tak tawh kenkia uh hi. Amun ah mi 5 sipah in tampi liam uh hi. A mawtaw pen Pu Gin Lam Cin @ Cinpi ii hawl hi aa Dyna mawtaw ahi hi. Tuahsiat hun laitak pen kawlgam hun in naitak lam nai 3 kiim khawng hihtuak hi. Aphual pan hong sihsan pahte anuai aa bang hi.

• 1. Tg. Pau Suan Lian (Mawtaw nungzui) Tonzang Pa Go Khan Thang nau
• 2. Tg. Mang Than Thang Kalay Pa Gin Lam Cin Tapa
• 3. Nu Man Za Lun Kalay Pa Neng Khen Dal zi
• 4. Pi Cin Ngaih Hau Kalay Pa Khual Do Pau zi
• 5. Li Ciin. Lun Cing Kalay Nu Cing Zam Hau tanu

Hih a nuai a teng pen nasia liam mahmah ci hi.

Pi Ning Zam Cing (Zam Cing) (Pu Dam Pau zi), Pa Khup Gin Hang (Nu Dal Cing pasal), Lian Mung Piang, Nu Kham Cing (Pa Sua Kham zi), Pa Thang Hen Pau (Pau Hoih).

A dawn’ ding in kawlpi (Kalay) pan in ah Rev. Fr. Martin Suan Khan Mung mawtaw, Charitas te mawtaw, leh Haimual mawtaw te pawl khat in dawn uh cih thuki za hi.

Zogam ah Zomi akiam mahmah kawmkal ah hihbang thu hongpian ciangin lungzuan huai simtham hi.

Hehnemsian KST Pasian’ in adah akap khempeuh hong hehnem hen.

Thangboi
Zangkong