Singlamteh ciaptehna hongpiankhiatna leh akhiatna ~ Rev. Fr. Damian Dal

Singlamteh ciaptehna hongpiankhiatna leh akhiatna ~ Rev. Fr. Damian Dal

a) Singliamteh ciaptehna hongpiankhiatna – Singlamteh ciaptehna ahi, “Pa, Tapa, Khasiangtho mintawh, Amen”, ci in, thungetna in Christian akici Jesu Topa nungzui te in kiciaptehna in hong zangmasa penpen ahihi.

Antioch khuapi ah Siadaw (bishop) sem in, nungzuipi John zalaih, St Policarp khitciang, athumna ahi, St Ignatius (St. Ignatius of Antioch) in AD 144 kum in, amasa penpen in Singlamteh ciaptehna hong bawlkhia hi. Tua hun tualai tak in, Jesu Topa asanglo, a umlo, Jew minam te leh Roma kumpi te in Christian akici Jesu Topa honpa le gumpa a asang, amanungzui te thatin, manin, mei ah hal in, nasia takin simmawh bawlsia uhhi.

Tua bang gentheihna athuak laitakin, Jesu Topa a umtaktak mite khat le khat kitheihna ding, Jesu Topa a umlo mite lakah Christian te kiciapteh nading leh, ih pumpi tung mahmah ah, Jesu Topa hong gupkhiatna Singlamteh pua in, Topa ii Singlamteh tunga hongsihna hangin gupkhiatna angah ihih nathu te nisim teci panna dingin, ahongbawl khia ahihi.

AD 196 kum in, Tertullian (one of the first great theologians and Father of the Church) hici bangin, nagelh hi:

Kongit nu le pa, u le nau te aw, eite in koikoi ah pai in, bangbang isem a, puansilh in, anne in, lumin tho in, ciahin kuanin i omna khempeuh ah, Sianglamteh ciaptehna tawh kipan in, Singlamteh ciapteh na tawh thu ikhup dending i mangngilh ngeikei hi. Bangbang nasem zongin, Singlamteh ciaptehna tawh pantawntung inla, Sianglamteh ciaptehna tawh nasep nabawl nate khup tawntung in. Tua sangin ahoihzaw bangom dingin nangaihsun hiam. Topa’ Singlamteh in nang adingin khamuanna hongpia ding hi. Nata natanu te uhzong hibang Christian gamtatna hoih nahilhsawn dinguh namangngilh kei un.

Hih thute i etciangin, AD 144 pan kipan in Singlamteh ciaptehna nakizangkhin in, Christian akici Jesu Topa honpa le gumpa aa asangtaktak mite in, apumpi tung mahmah uhah Topa hongsihna Singlamteh lim ciamteh in nanungtaakpih uhhi.

b) Singlamteh ciaptehna akhiatna

• (i) Jesu Topa pen honpa le gumpa in sangin, um a, a manungzui te hi, Christian te kiciaptehna
• (ii) Jesu Topa tawh Singlamteh apuakhawm Christian te ihihna teci panna (lk 9: 23)
• (iii) Singlamteh tungah Topa tawh isihkhawm mahbangin, Topa tawh athokik khawm ding ihihna thu teci panna (Kolose 3: 3)
• (iv) Singlamteh in leitungmihing te gupkhiatna i ngah nadingin Topa hong kithatna ahihna phawktawntung na leh teci panna
• (v) Christian te khat le khat kikhenthang lo in, kipumkhat na limlah na (1Corinthians 1: 10).
• (vi)Pa, Tapa, Khasiangtho, thumgawm Pasian khat ahihna teci pan na (Mt 3: 16-17; Lk 3: 22; Mk 1: 10-11; 1 John 5: 7)
• (vii) I taltang tung mahmah ah tuuno leh honpa gumpa ahi Jesu Topa in Singlamteh tawh honggumkhia ahih manin, amamin in “Gumpa” ahihna ciapteh na (Mangmuhna 22: 4). By Rev Fr Damian Dal (Leuven, Belgium)