Vondeih Kep Ding – 151 (Dimno’ Pa)
Tawngno, Naupang khat bangin hong ngaihsun kha zel in khat veivei ciang hilh dinga a kilawm lo zah dong dingin hong thuhilh in, hong tawng kha zel ing. Lamkhat panin lungdam huai hi. Hong it taktak leh hong deihsak taktak te bek in hong tawng hong tai ngam bek hi. Ko na nu tawh hong tawng in hong thuhilh kei le un, kua’n nang hong thuhilh in, ko gente hong ngaihsak kei le cin nang kua gente ngaihsak mawk ding na hiam!
Na pu a dam lai-in, “Hong tawng ding aom lai teng lungdam un!Nidang ciangin hong tawng ding mi om nawn lo ding hi,” hong ci thei zelzel hi. Hong nusiat khit ciangin hong thuhilh ding, hong tawng hong tai ding khat a om nawn lo hitak pi pah hi. Ko bangmah in na gamtatna bangbang ah hong thuhilh ngam, hong gen ngam na lawmte mudah lo-in, na it in.
Ei pasalte ading panin nungak hoih i sakte kiangah, hong ngai ing, i cih ding haksa khol lo napi numei khat in pasal hoih a sak khat, hong ngai ing, ci masa ngam peuhmah lo hi. Tu hun ciangin meel hoih sak manin a kiteng tampi om ta-in, a hoihna a bei ciangin kilungkia-in a kikhen mi tampi om ta hi. Ih khua ah zong om ding hi. Malaysia, Singapore, Ausi ah zong om dinga, US ah zong tampi mah om hi.
Pasian gawm innkuan hi kei leh kilawm sa ing. Pasian hong gelsak pen mah tawh kituak kha-in, innkuan khat na lam ding hong deihsak ing. Tua manin thungen in Pasian kiangah na ap ding hong gen nuam ing.
Pasian gawm loh nupate pen kiten kum tam semsem, khat leh khat ginat lohna kimu semsem, thanemna kitel semsem in, khat leh khat ki itna kiam semsem hi. A tawpna ah kimudah in tua-in nupa kikhenna pian sak hi.
Ahi zongin Pasian gawm nupate ahih leh kiten kum tam semsem, kihehpihna khang semsem in, ki itna zong khang semsem hi.
Pasian lam innkuan lo buang, innkuan khat lam ding piang thei sa lo hing. Tua manin thungen in Pasian ko in, Amah ap in. Ama hong gelsakna pen a hoih penpen hi.
Nidang lai-in nupate thatang tawh kitawng, kivua-in innkuan kikhenna pian hi.
No hun ciangin thatang tawh hi vanvan nawn lo kha thei dinga, socials app tuamtuam panin nupa kitawtna, nupa kikhenna, innkuan sung kilem lohna hong piang kha thei ding hi. Tuate ading zong kiging khol in pilvang in om le cin ut ing.
Na nu tungah ka lungdam mahmah na thu khat in innkuan sung kilem lohna, nupa kal kilem lohnate pen a nungsang lam ah na tun pahpah lo-in, gen dinga a kilawm ciang bek a na tut manin lungdam mahmah ing. Nupi pawlkhatte-in thu khempeuh a nungsang lam tun pahpah ahih manin amau innkuan sung thusia lasia in tuam hi. Tuadan thu tampite kong ciah ciangin kicing tak kikum beh ni!
Hong it,
Na Pa
August 18, 2018
Columbus, OH
Comment piaknop aomleh...