Dimno’ Nu laikhak – 19

Dimno’ Nu laikhak – 19

Dimno’ nu, kong laikhak loh zawtsim ta ei. Khat veivei ciangin laigelh ding zong haksa mahmah a, nai (3 ) sung bang gelh dingin ka kithawi hangin lai gualkhat na leng ka tutzawh loh hun tam mahmah hi. Tua thute zong kong gen kikkik loh hangin nang zong na theih khit sa mah hi. Kongngaih loh kong phawk loh man hi kei.

College ka kah lai-in ka khanvuah siate hong pai loh ciangin lawmte teng tawh thuciin thutang gen in ciamnui in nuam kasa thei zel uh hi. Khat peuh thu ahoih lo lam ka gen uh ciangin ka lawm uh khat in, “Khaiguai lawmte, khawl bawl phot in, thudang kikum ni! Mi’ thu gengen nawn kei ni!”ci-in ka migensiat sawm uh hong khawl sak thei zelzel hi.

Ka omna, innlak ka vakna leh ka hawh ka ciah na-ah khat peuh hoih lohna kagen sawm ciangin kalawm’kammal phawk kik in tua-in hong kham tawn tung hi. Tuin kum ( 10 ) val bang hi ta-a, ahi zongin ka bilkha ah mang thei nai mahmah lo hi. Ka lawm hong gen thu, nang zong hong zasak nuam ing. Ahi zongin mi gensia sia teh ci-a hong ngawh hi kengh!

A diakdiak in no nupi te pen ko pasal te bang lo-in nih leh thum khawl khawm le uh cin mi ommuang khat peuh gen thei mawk hi uh teh! Tua zong nang hong mawh sak kei lai ing. Ahi zongin khat peuh hoih lohna i gengen tawh khantoh na ding omlo ahih manin na lawm nupite na gei ah hong pai-in khat peuh hong gensiat pih ciangin bilnei lo, kamnei lo bangin na om le cin hong deih ing.

Na lawmte mai ah nang leh nang khawng na kiphat nop manin mikhat peuh kisai lopi-in va gensia kha peuhmah kei in maw, Dimno’ nu! Hmmm…kakiim kapaam zong gamdai ta-in, kei zong nuamtak tawlnga nuam ta ingh! Mangpha!

Hong it tawntung,

Dimno’ Pa
September 14, 2013
Columbus, Oh, USA.

P.S. Mi’hoih lohna ka gen ding hong kham tawntung kalawm it Siampi @ Thawng Sian Siam (Yangon) hih lai tawh zahtakna pia ingh.