Singapore ah numei te kisil laitak Video azaihsim Myanmar pasal khat thongkiading

Singapore ah numei te kisil laitak Video azaihsim Myanmar pasal khat thongkiading

Singapore gamsung ah numeikhat akisil laitak Video aguk zaihsim Myanmar gammipa thukhenna kineita cih Straits Times pan kiza hi. Tua Myanmar gammipa pen anaseppih numei pawlkhat tawh inn asaapkhawm uh ahihi.

Tua inn asaapkhopna sungah dailenbuk Toilet leh kisilbuk pen akizom in inndei khatsung ah aomkhawm ahihi. Myanmar gammipa in kawmvang panin “Hidden Camera” akici Video zaihna aneukhat zaihsa in nusiasim cihi.

Tua Myanmar National akicipa ii aminpen Pyae Phyo Aung kici a, kum 32 aphakhin khat ahihi. Nungkumsung October 23 leh 24 kikalsung in alawm naseppih numei te akisil laitak in Video aguk zaihsim pen 9 veibang zaihsim cihi.

Tua Video Clips tepen asawtna Second 20 panin Minute 10 ciangciangbang asau vive cihi. Tuabang in numei te atheihlohkal in akisil laitak Video aguk zaihsimna hangin thong kiading in thukhenna akibawl ahihi.

Zanni Thursday (November 09) ni in amawhna kiciantak in kimukhia ahih manin, thukhenmang te’n thong kal 20 sung akiading in thu piata uhhi.

Pyae Phyo Aung pen Singapore Polytechnic sanginn ah sang akah in “Student Pass” tawh aom hi a, Nautical Studies akici tembaw zuite nasepzia asinlaitak ahihi.

Deputy Public Prosecutor Raja Mohan in agenkhiatna ah a innsaappih numeite khatin tuabang in Video azaihsimna Camera neupen muhkhiatsak cihi. Toilet sungteng siansuah in Cleaning abawl laitak kawmvang panin meitang “Green blinking light” mu ahih manin, tuapan in Pyae Phyo Aung in Video agukzaih simsim ahihlam ki theikhia hi.

Tua Camera neu pen tua numeinu in innneite tungah appah a, tuapan in Police Station ah ki apsawn hi. Pyae Phyo Aung in hih Camera neupen anei theikeng ci’n nialmasa himahleh, ama neihsa, ama thangsiah ahihlam kitheikhia veve hi.

Tuaciang in kalawm naseppih numeite akisil laitak Video ka gukzaihsim hi ci’n genkhia a, tua Video tepen Laptop tawh ama omna inndei sungah ka enkik hi ci’n genkhia hi.

Pyae Phyo Aung ii Laptop zatsung aki etsak ciangin numei kisil laitak agukzaihsak Video Clip bekbek akigawm in 9 bang ki mukhia hi.

Pyae Phyo Aung ii Lawyer ahi T.M. Sinnadurai in agenkhiatna ah “Pyae Phyo Aung pen Trainee Ship Officer khat hi a, Maritime and Port Authority panin “Class 2 Certificate of Competency examination” kici laihuanna zong azota cihi.

More: Japan gamsung aom zintunbuk khatah Video gukzaih nadingin Camera kithuah

Singapore Polytechnic panin alaisin Nautical Studies azosiang hita a, tembaw ahawlthei Marine Caption apiangding hita cihi. Ahi zongin apilna, asiamna te na zangkhialkha ahih manin, thongsung alutphotding ahihi. Sawltak #zomidaily