Ettehhuai limpha: Luan Dim LCCI

Ettehhuai limpha: Luan Dim LCCI

UK gam pan LCCI sang lam thuneite in 2018 kum Myanmar gambup sang hoih pen pahtawina a piakna sungah a khangmoi lai mahmah tangval no khat zong kihel hi. Tua pen LUAN DIM ( LCCI ) siapi pa sia Singpi ahi hi.

Leitungbup le Myanma gambup sangnuapang a mark sangpente pahtawina zong thupi takin kumsim mah in kipia a, Zomite in zong a hunhun in kingah toto hi.

LUAN DIM ( LCCI ) sang pahtawina laipi a sang pen tangvalno khat hi citciat ahih manin, thupi le lamdang kisa in angtanhuai kisa diak hi.

Tua pahtawina a sang pen Sia Singpi pen LUAN DIM ( LCCI ) sang siapi pa hi a, Siamah Luan Dim nau ahi hi. Siamah nu pen tu laitakin USA ah a innkuan in om uh hi.

Siamah Luan Dim, Sia Singpite pen Vangteh khuami Mandalay a teng pa Kham Khua Nang le nu Zing Lam Vungte tate ahi hi.

LUAN DIM LCCI TRAINING CENTRE ( Kawlpi ) sang pen Siamah Luan Dim in 2006 kum pawl in a pat ahi hi. Kipat cil lamin hamsatna lungkiatna tampi tuak hi. LCCI pen a thei tam nai loin kilunglut zo pak lo a, sangnaupang 1 le 2 bek khawng tawh kipan ahih hangin tintan vial 3 vial 4 na khit lam ciangin sang naupang kibehlap toto hi.

Kum khat khit kum khat lawhcing to semsem in, Kawl le Zo cih om loin minam kim in kizuan ziahziah hi. Mi tampi in kinop tuam pih mahmah in kawlpi khua sungah minam ong tawisang mahmah sang thupi khat ong suak hi.

2010 kum ciangin innkuan vai tawh siamah Luan Dim in USA zin ding cih thu a om ciangin sang vai a thanem khak ding in kilung himawh mahmah hi.

Ahi zongin siamah nu nungah a nau sia Singpi in LUAN DIM ( LCCI ) sang mabante hoihtak ong zom to thei leuleu hi. Amau unau sang vai maban ong kisang to diamdiam uh a, Sia Singpi hun ciangin zong lawhcinnate kibehlap to semsem hi.

Tu laitakin hih sang pan in kumsim in sang naupang 300 kim bangin lai kisin den ta hi. Zomite bek hi loin kawl le vai minam kim kikah hi.

Khangthatte pilna siamna tampi ong hilh bek hi loin minam dangte lakah minam ong tawisang mahmah khat ahih manin Sia Singpi le LUAN DIM ( LCCI ) sang hangin i kipak mahmah hi.

Tua banah Sia Singpite unau nasepzia le kalsuanzia in khangthak Zomite ading a ciinhuai limpha tampi ong lak bek tham loin tu lai Zomite in biakna vai gam vai, innkuan sung vai, nasepna vai, kipawlna vai, Jonior le senior kikal, mun khempeuh phialah I siamlah mahmah gige khat ahi panmun le maban kikheksiamna ( Hand over ) pen pilvang takin na kantan thei uh ahih manin akua maciat in I etteh theih ding limpha khat zong ahi hi. Lian Tuang