Naungek khat utbangin aki lotgawp, peigawp laitak Video ki khahkhia
Malaysia, Kuala Lumpur khuapisung ah gamdangmi khatin naungek a utbangbang in huihlak ah lawnto in aki mawlpih laitak Video ki khahkhia hi. Tua Video pen Zayl Chia Abdulla akici ii Facebook tungpanin aki khahkhia hi a, Second 90 khawngbek sawt hi.
Video sungah gamdangmi Caucasion pasal khatin naungek khat akhepan lenin a utbangbang in peigawp, huihlak ah lawntozel cihbangin cikziat huaitak in kimawlpih mawk hi. Hihbangin naungek akimawlpih pen amawk gamtat hilo a, Street Performance abawlkawm in sumngetna, sumzonna in anei kici sawnsawn hi.
Hih thupiang pen Kuala Lumpur, Changkat Bukit Bintang vengsung aom lamngei khatah thupiang ahihi. Tua naungek pen kha 6 bekbek phapan kici a, gamdangmi khualzinpa tawh bangci kinaina om cihpen kitheicianlo hi.
Video: LINK
Hih Video akhahkhiapa in hihbangdan gamtatna pen naungek adingin lauhuailua mahmah hi. Banghang in Malaysia kumpi thunei te’n hihbang cikziat huai gamtatna te mipi muhdingin laksak ahiam? Hihbang gamtatna pen naupang bawlsiatna tawh kibangin, hih agamta te matkhiat huai, thusitna bawlhuai hi ci’n gelhkhia hi.
Facebook thunei te’nzong hih Video pen kamukhin uhhi. Aki Delete nailohna ahangpen thunei te’n tua naungek ahotkhiat theihding lametna tawh akikoihlai hi ci’n gelh uhhi.
Hihbangdan in naungek utbangin lotgawp, veigawp pen Russia gamsung ah Legal takin kiphal cimawk hi. Pawlkhat in Baby Yoga ahih keileh Dynastic Gymnastics ci’n naupang kimawlpihna namkhat in ngaihsun in, ahoihlam in la uhhi.
Ahi zongin atamzaw in hihbangdan naungek utbangin lotgawp, peigawpna pen bawlsiatna namkhat hi ci’n mawhsak mahmah uhhi. Hih Video amukha atamzaw in hihbangin naungek abawlgawppa pen matkhiatding, thusitna bawlding vive in Comment gelhtek uhhi. Malaysia kumpi thunei te’n bang acih uhdiam? Sawltak #zomidaily
Comment piaknop aomleh...