Kawlgam bup Kitelpi 2015 Result Lungdam Huai leh Lungngaih Huai

Kawlgam bup Kitelpi 2015 Result Lungdam Huai leh Lungngaih Huai

Kawlgam tangthu enkik leng Zomite lotawh tangthu kisut theilo ding Kawlgam bup kilam zia ahih lam a thei ciat dingin lamet huai kong sa hi. Tua hi-a tukum General Election result tawh Zomite aading alungdam huai thu pawl khat leh kideihsakna thute ih sut nuam hi.

Amasa penin, Kum tampi ih pu ih pate’n Kawl kumpite bawlsiatna a khangkhangin kithuak toto a, tu-in tua hakkol (USDP-ukna) kisut khia zo taktak ta ahih manin lungdam huai phadiak hi. Lam khat pan mi nautang thutheilo pawl in bel thu theihloh luat man ci ding maw, angsung ding khual luat man maw vote a pialai zong ki om kiaukiau veve sam hi. Deih bangin hun hong hoih toh leh Kum 2020 kitelkik ciangin Zomite sungah tua bang om nawn samlo ding ih lamen uh hi.

Anihna-ah, lampi tuamtuam tawh Zomite maban hong khaktan ciatciat den ih sanggam Chin kici deuhte sung pan Chin Party min tawh MP hong ngahzo hetlo uh ahih manin ka lungkim mahmah hi. Pasian in deihna khat nei hamtang ding hi. Zomite hun hong tungsak kik ta hi ci-in ka kipak hi. Mi pawl khatte upmawhna-ah ih Pawi lamte pen kithu tuak uh, makaite cih bangin NLD buakhuan ziau uh hi aci zong om hi, tua zong thu khat hi veve mah hi. Ahih hangin CNDP, CPP party cihte in meekuang alui veve uh hi a, ngahzo uh hileh Candidate teng a cing nuam vive mah uh ahihi. Mipi lungsim la zolo uh ahih main a cing zolo uh hi zaw dingin ka lamen hi. Party khat aitangin candidate pa/nu khatin midang party khat peuh/NLD party pia zaw un ci ngei lo ding theihsa ahi hi. Lam khat leuleu panin enkik leng, amau pawl pen a zo ding party, thunei thei dingte lamah a tai kawikawi maipha ngah nuam, hamphatna deih bek lungsim kician dinmun kician taktak aneilo, mi gina hetlo nam hizaw uh hi. Hamphatna ding bek en, ngahna ding a om nak leh amin uh zong khel ngam lel, A vom pen A kang a kicih leh zong ci thei mai lel uh hi. Tua bang mite leitungah muantak belhtak hilo hi.

Athumna-ah, Zomite bangkua sung, khua leh tui, vaihawm dingin ZCD party pan MP 6 sitset mipite’n ih telcing zawh manin ka angtang mahmah hi. 1990 kum pan tuni ciang dong tupna kician sinsen tawh haksa ta leh thuak keikai-in Ngal hapaksa tumkiklo, thuak ding aom leh a thuak ngam makai nei ih hih lam Zomi buppi in ih theih ding, mipite in makaite nung thuapin ih panpih ciat dinguh deih huai kasa mahmah hi. Tutung kitelna-ah mi pawlkhat in ZCD ih piak theihnai loh hangin kuamah kimawhsak ding om kasa kei-a, mimal suahtakna, thumuhna leh ih koltanna kibanglo leh ih vanpuak kikim nailo-in ka ngaihsun hi. Tutung-a vote hong pia thei nailote’n zong kitelkik leng vote hong piathei ta ding uh ka lamen veve hi. Tua hi-a party dang a pia zawdeuh khua pawl khat ih nakphunsan luat pen ZCD support-te thanemna khat mahin ka ngaihsun zel kawikawi-a ka lungnuam thei tuankei hi. Mailam saupi enzaw-in Buipi leikei mah bangin, ih pau ding, ih gamtak ding ciangin kidawm siam ciat leng cih tha kong pia nuam zaw hi. Zomi a sangzo nailo, Chin a kisasa lai, USDP hakkol a kisuansuan lai, Porter puapua lai ki-om ahih manin nasep ding tampi omlai, maban saupi tak neilai ih hi cih telsiam leng ih van zangin mailam nasep ding Planning kibawl thei pah ding hi.

Alina-ah, Kawlgam bup huampi-in NLD in lametna ombang mahin hong zo leuleu uh ahih manin lametna teng ni hong suak taktak ta hi. Pawlkhatte muhna-ah NLD in zo kei leh ZCD ih piak hangin a mawkna ahihi a ci zong ki-om a, tua zong thudik khat mah hi veve hi. Ahi zongin NLD in zawh ding leh zawhloh ding pen Kawlgam bup mipi lungsim tungah kinga hi-a, Campaign bawlnate ih et ciangin zo mahmah ding uh hi cih pen muhsa ahihi. A zawhloh ding uh ei patauh huai hi deklo hi. A zenzenin ZCD in kuang luilo-in gambupah NLD in zo mah leh zong Zomite thu a gending neituan kei leng kisum zaw kan lai ding hi. USDP in a zo zongin NLD in a zo zongin Zomite thu a gending, Zomite vai ahawm ding Zomite mah a kisam ih hihi. Tua hi-a, ZCD lotawh Zomite a khuasuak ding ih hih loh lam mipite’n ih tel sitset ding kitang sam pha mahmah hi. A beisa hun lai-in gambupah USDP in zo-a, Zomite veve mah in Tedim leh Tonzang-ah USDP party tawh gualzawhna angah hangun bangmah ih hamphat pih om vetlo cih ih theihsa ahihi. Thumu leh atheite in bel USDP te khutnuai pan hamphatna bangmah lamen lo lel mah uh hi. A mi hilo zawin a party kisam zaw hi ih cih nopna ahihi. Tua mah bangin ZCD omlo-in NLD bek hi leh zong ei aading omtuanlo ding hi veve hi. Mihing ih hih mah bangin ei angsung tek mah kikhual masa zaw a, a khial hikhin zenzen lo hi.

A tawpna-ah, Kawlgam bup pen Zomite lotawh ahi theilo gam khat ahihi. Kawlgam suahtakna ding Pinglong thukimna, Insein kidona, leh tu-in Pinglong lungsim a pholh khiakik ding ZCD in mun hong ngah kikta ahih manin ih lungdam lua mahmaha, minsial kawmin hanla sa-in thau lawn ziahziah thei leng ut huai pha mahmah hi. Tua hi-a, Zomite khat leh khat kimawhsak nawn kei ni, mailam ading enkawmin gamta kalsuan ni. Census lai-in Zomi langpang ta leh tutung kitelna-ah ZCD vote pia keita leh Zomi leh a party ZCD hong lunglut theihna ding uh nasem ciat ni, kam kuppih ciat ni, genpih ding hanga hong lunglut hunhun un Zomi ahihna uh phunlo paulo lungkim takin muakin ih san ding hi lel hi. A mit keuhnailo, a lungsim kihong nailo, khua phawkthei nailo Zomite a lungsim hong kihei hunhunin sang siam ding, a telsiam dingin kideihsak mahmah hang. No khua, ZCD vote hong pialo te, no pawl, zandiak a Zomi ut pante ki cih sesete pawl zang khalo ding hi hang. Tapa taimang thu ngaihsun zel ni. Zingtunga vaikuan khat leh sunnung lama vaikuan khat zong a thaman kibang veve hi cih LST sungah ih muh bang mah ahi hi. Sisan kibang laigul kizom minam khat ih hi cih thei ziau ni. Lungdam theihna lungsim puaciat ni ci-in kitelna result tungtawnin ih lungdamna khempeuh sungkhia kawmin tha kipia hi ni ei.

Mimal kim lungsim vakna hong piangta hen.

Titus Zomi