Singapore vanlengtual ah migilo te ngongtatna aomleh thuhkikziading kisinna nei

Singapore vanlengtual ah migilo te ngongtatna aomleh thuhkikziading kisinna nei

Singapore gamsung aom Changi Airport ah deihlohpen thautawi migilo te’n ngongtatna aneihkhak zenzenleh bangci sepding cih ki sinkholhna tuzingsanglam in nei uh cih Straits Times pan kiza hi.

Hihpen Counter-terrorism Drill kici a, tuni Tuesday (October 17) zingsanglam in naikhat sungbang kisinna nei uhhi. Hih Drill kisinna ah Singapore Prime Minister Lee Hsien Loong ngiat inzong etcikna vaneithei hi.

Changir Airport Terminal 3 sungah Suicide Bomber khatin amahleh amah aki puakkhamsak bangdan in kineihsak uh a, hih kisinna ah Singapore Armed Forces (SAF), Singapore Civil Defence Force (SCDF) leh Civilian Agencies te kihel uhhi.

Hih kisinna Drill akineihkhit ciangin Prime Minister Lee Hsien Loong in Reporters te tungah thugenkhiatna nei a, Singapore gamsung adiakdiak in hih Changi Airport pen migilo te’n hong mitsuan, hongngim khinkhianthei hi.

Tuabang apiankhak, aomkhak zenzenleh bangci sepding, bangci vaihawmding cihpen akigingsa in ih omciatding thupi hi. Mipi te koilam kihemsakding, ihvek in bangci sepkhop, mapan khopding cihpen akisinkhol ihhihi ci’n genkhia hi.

Tuabang ah kumpi thunei Agencies tuamtuam tezong avek un semkhawm in, huntampi piakhia in ihki sinkholhding, tua hileh ahuntaktak ciangin akigingsa in ki omtheiding cihi.

Hih kisinkholhna pen asawmvei 10th Edition of Exercise Northstar ci a, Changi Airport Terminal 3 sungah akibawl ahihi. Hih kisinna Drill sungah Security Agencies, Changi Airport Group, SMRT, Ministry of Health cihte panin mi 650 bang kihel uhhi. Singapore Airport sungtaktak ah Counter-terrorism Drill alianpi in akibawl masapen ahihi.

Hibangdang Security Drill pen hongtungding October 28 ni ciangin Home Team Tactical Centre ah kibawlkik leuleuding a, tuapen Phase Two hiding hi. Tuni kisinna ah Suicide Bomber khatleh thautawi migilo 6 te’n mipi adim phitphet in aom Changi Airport Terminal sungah akapgawpna tawh kisinna ahihi.

Hih kisinna pen amun mahmahzong ataktak in apiang theiding munkhat himawk hi. Banghanghiam cihleh leitung gamtuamtuam te enkawikawileng Airport sungah migilo te’n Terrorist Attack bawl cihpen kizathei zelzel hi ci’n Prime Minister Lee Hsien genkhia hi.

Nungkumsung inzong Belgium gamsung aom Brussels Zaventem Airport ah Bomb puakkham in, mi 14 takin sihlawh uhhi. Tuahunlai in apuakkham Bomb pen Suicide Bomb hiding kici a, atawmpen mikhat in Suicide Bomb sukham hiding kici hi.

More: Nu Piang Ngaih Don tawh mei kizom, Zomite’ theihding thu pawlkhat

Migilo te’n agamsung ah buaina apiansakleh bangci thuhkikding, aliam abaai te bangci kepding cih akipan apatpan atawpding, akikapcil panin zato akipuakdong akimtak in abukim in asinsak uh ahihi. (Aki ginkholhlam akizaza khollo Myanmar, Naypyidaw Airport ahbel Sunday ni in Airport Security te’n thau, thautang honkhat mankhiaziau uhhi) ZD Sawltak #zomidaily