Pasian’ ompihna sungah nuntakna

Pasian’ ompihna sungah nuntakna

Leitungah thupiangte lunghimawh nading leh patauh nading vive hong hiden hi. Bangbang ahi zongin Pasian’ ompihna bekmah a thupisak tek dingin hong hanthawn nuam ing. Ei thu-um mite’ adingin Pasian sim loh i belh, i muan ding leh i bukna ding a dang khat zong om tuan lo hi. Amah in eite’ adingin i munkip muanhuai, i kidalna lum leh i kihotkhiatna hi-a, a muanhuaipen leh a belhtaakpen Topa ahi hi. Tua ahih manin lungsim takpi leh lunggulhna lianpi tawh Topa’ ompihna i ngen ding hi.

(1) Daniel pen humpi kua sungah a kikhiat loh nadingin Pasian in dal thei lua, kipelhsak thei lua hinapi-in tua bang lauhuainate tawh kipelhsak lo zaw-a, tua lauhuaina sungah ama hoihna kilangsak zaw hi. A gilo mahmah humpite nangawn tawh omkhawm thei hialhial cih pen Pasian’ ompihna hang bek ahi hi. Daniel in hi bangin Pasian’ ompihna a ngah theih nadingin, amah in siangtho nuntakna tawh nungta bek tham loin, nisim in Pasian maipha zong a, Pasian tawh maan takin kizom den hi. Eite zong Daniel mah bangin Pasian’ deihna sungah nungta in, Pasian tawh maan takin i kizop nak leh lungkham mangbatna leh lauhuainate tawh i kipelh pah loh hangin, tua lungkham mangbatna leh lauhuainate sungah Pasian in hong ompih dinga ama’ vangliatna (ompihna)hong kilangsak ding hi. Amen 🙏

(2) Shadark, Meshak leh Abenago-te lawmta teng thum zong a nungta Pasian mai bekah kuun dingin a khentat vilvelte ahi uh hi. Pasian in zong meiphualpi tawh kipelhsak thei lua hinapi-in, kipelhsak lo zaw-a, tua meiphualpi sungah amah(Pasian)tektek in ompih hi. Asa mahmah meiphualpi sungah kikhul hinapi-in nuam takin om hilhial thei-a cimul them zong ton beek lo cih pen, Pasian ompihna hang bekmah ahi hi. Hi bangin Pasian’ ompihna a ngah theih nadingun amaute in, Pasian it in zahtak bektham loin milim mai-ah kuun nuam ngiat lo uh hi.

Milim biak ding sangin a nungta Pasian biak ding mah na teel zaw uh a, tua hanga thuak ding teng zong na thuak ngam zaw uh hi. Kumpi thuneite thupiakna sangin Pasian thupiakna mang zaw uh hi. Meiphualpi sangin Pasian’ hehna a thuak ding uh lauhuaisa zaw uh hi. Eite zong hih lawmta teng thum mah bangin i nuntak nak leh, Pasian in lauhuaina leh haksatnate tawh hong kipelhsak loh hangin, lauhuaina leh haksatnate sungah ama ompihna hong musak in, a vangliatna hong kilangsak ding hi. Amen 🙏

Tua ahih manin, “Topa in tuu banga kei hong cingpa hi,” i cih leh tuu huang sungah i om kul hi. Tuu huang sungah a om mite in, Pasian’ kepbitna leh ama ompihna taktak ngah ding uh hi. Pasian pen amah a beel mite limtakin a kempa ahihna i phawk gige dinga, ahi zongin amah beel kei in, amah muang kei leeng limtakin hong kem lo theipa ahihna zong i phawk gige ding kisam mahmah hi. I nuntakna sungah, Pasian’ bek mah beel in, ama ompihna bekmah i deih pen leh i lunggulhpen hi sak ding hi hang.

Pasian’ ompihna sungah bangmah in hong suksiat zawh loh banah lungnopna, lungmuan’na leh suahtakna cihte kicing takin om hi. Bangzah takin lauhuaina om mah ta leh Pasian’ bek mah muangin beel ni. Pasian’ ompihna i cih in, haksatna leh lauhuainate tawh kipelhna hilo a, tua haksatna leh lauhuainate’ sung panin bitna leh suahtakna hizaw hi. “Lai sim mimal kim tungah Topa’ ompihna athakin hong kilang ta hen. Amen 🙏

Khazih sungah, ✍️David Tuang