Singapore ah pasal khatin losan “Firecracker” lawn ahih manin kiman

Singapore ah pasal khatin losan “Firecracker” lawn ahih manin kiman

Singapore gamsung ah nungdiak in akibawl Deepavali pawi ah pasal kum 37 aphakhin khatin losan “Fireworks, Firecracker” lawn ahih manin kiman cih Stomp pan kiza hi.

Deepavali pawi cihpen Hindu Festival minthang mahmah khat ahihi. Deepavali pen meivakpawi cihbang inzong ki ciamteh a, Hindu te’n losan naklohthei mahmah uhhi. Ahi zongin Singapore gamsung leuleu ah losan Fire Cracker, Firework cihte pen khuasungah mawklotsak hetlo uhhi.

Ahi zongin pasal khatin abeisa Deepavali (October 18) ni in Block 307A Ang Mo Kio Avenue 1 vengsung ah Fireworks lawnkhia hi. Zanlam 10:27 hunpawl in alotkhiat hi a, agin ngaihmahmah kici hi.

Hih Fireworks alotkhiat laitak in azakha avengte khat ii genkhiatna ah ginngaih mahmah a, Minute khatsung bang akizom in gingziahziah hi. Amasa in Bomb namkhat apuakkham omkha hidinghiam ci’n ka lunghimawhman mahmah cihi.

Hih Fireworks atheikha, azakha aveng apaam te’nzong alung himawhna uhleh, alung kimlohna uh Facebook leh Social Media tuamtuam ah pulakkhia uhhi. Tuaban ah Police Report zong hongkibawl hi ci’n Police Spokesman khatin genkhia hi.

Hihbang in mipi te teenna khuasung ah Fireworks alotna hangin kizong khiapah a, Ang Mo Kio Police Division te’n October 20 nitaklam 1:30pm hunpawl in tuapa pen mankhiathei uh cih pulak uhhi.

Khuasung ah mipi te aluathawngsak, alauhuai Firework alawn tepen kum 2 sungbang thong ki kiasakthei a, liausum zong $2000 panin $10,000 bang ki liausakthei ci a, hihpen Singapore gam ii thukhun, thukham “Section 3(1b) Chapter 72” ahihi.

Tuaban ah Police te’nzong Public khuasung mipi te’n Firework pen khuasung ah mawklottheih hilo hi ci’n mipi theihsakna neiphapah uh a, zumkong mangkong kitunthei cihzong limgenkhiat mahmah uhhi.

Deepavali pawini Fireworks lawnpa hangin aliam cihbang omsamlo a, ahi zongin athu hoihtak kikancian in, thu kibawlding cih kiza hi.

Singapore gamsung ah Firework, Fire Cracker cihte pen National Day, New Year, Chinese New Year leh Christmas cihte ahzong aki ciangtanna munbek ah sawlna ngah thunei te bekin lawnthei uhhi.

Malaysia gamsung leuleu ah Fire Cracker pen utbangbang vengsung ah kilawn ziahziah hi. Chinese New Year ciangin Sen te’n lawnziahziah, Deepavali cianglah Hindu te’n lawnziahziahzel, Malaysia National Day cianglah gambuk in lawn, Tamil te’n atuam, Christmas leh New Year cihte atuam, amau thangah hunhun in agin ngaihtheithei kidem in lawndamdam uhhi.

Kawlgam sungahzong nung meivakpawi sungin losan kinaklot mahmah cih kiza kawikawi hi. Hih losan Fire Cracker tepen adiakdiak in naupangngek leh piteek puteek te’n thuaklah, agin ngaihlua, agimzong katgim himawk ahih manin, ki thuaklah mahmah hi.

Related: Taingen leh Hiangzing kikal ah mawtaw kibung, mi 5 si

Malaysia bel thutuam cipakni in, Kawlgam, adiakdiak in Zogam leh ihvengsung tekah mipi khualna in hausa upa tetawh kikumkhawm in, khuasung ah losan phenglotlohding kikham theileh hoihtuakzaw hi. Losan gimnam hangin ak pulthei cihzong kigenzel a, mipi adingin phattuamna apialo gamtatna tepen hausa upa te’n khamcip huai hi. Sawltak #zomidaily