Singapore ah innteeng nasemkhat kongkhak ahahsiang laitak anuai ah kiasuk

Singapore ah innteeng nasemkhat kongkhak ahahsiang laitak anuai ah kiasuk

Singapore gamsung ah innteeng nasem in aom Maid khat inntungpan akiat laitak Video kizaihkha in Social Media ah ki thehzak hi. Simei vengsung aom Housing Board Flat khatah Thursday ni in thupiang ahihi.

Tua innteeng nasemnu pen Indonesia gammi kici a, Block 233 Flat panin zingsanglam 11:30am hunpawl in akiasuk ahihi. Hih numeinu pen amahleh amah aki sihbawlsawm tepawl hilo in, innpualam akilkawm ah dingkawm in tawlet “Windows” te ahahsiang laitak in akiasuk hiding kici hi.

Aki thehzak Viral Video sungah numeinu pen akiatsukdek laitak in inndawl 2 na aom pasal khatin aluzang asam panin akaih teta laitak kimuthei hi.

Adang Video Clip khatah tua numeinu pen leilak ah kiasuk khinta a, leilak ah lumleulau hi. Agei aom avengte khatin Emergency Helpline te azaksak laitak kimuthei hi.

Tua Video azaihpen tuavengsung aom innteeng khatmah ahi Facebook min Grace Mayzon kici in azaihkhak ahihi. Tua Grace Mayzon kicinu pen Myanmar gammikhat hihtuak hi.

Tuanu in Straits Times te tungah agenkhiatna ah zingsang innpualam ah puanpho in ka omlaitak, inntung panin khelangkhat aki khailenglang ka galmuh hi. Tuaciang in innnuai ah kakumsuk saisai a, huhna ka ngetsak hi ci’n Grace Mayzon kici Myanmar gammi innteeng nasemnu in genkhia hi.

Tua inntungpan akiasuk numeinu pen inndawl 3 na aom apualam puanphona in akizang guatawn lenkha in, ahi zongin damdam in anuai lamah tolhsuksuk hi.

Inndawl 2 na ah akiatsuk ciangin pasal khatin nahuhsawm in asampan nakai teta hi. Ahi zongin lenkip zolo in, numeinu pen apuanteng ki tolkhiagawp hi.

Video amunuam te’n Grace Mayzon ii Facebook ah ki entheiding hi Link >>>

Tua inndawl 2 na ah aomkha pasal pen amin Azman Jalil kici a, kum 56 aphakhin Painting Inspector khat ahihi. Ama genna ah tawlet ah khekhat ka galmuh a, apualam ah ka etkhiatleh numeikhat kawmkil ah ading kamu hi ci’n genkhia hi.

Akhe panin amansawm hangin mankhalo in, kitolkhia a, tuaciangin numeinu pen apuansilh tengzong avekin ki suahkhia hi. Ahi zongin asam panin mankhasam hi. Ahi zongin asampan in ki lenkip theilo ahih manin, anuai ah kiasuk veve hi. Tua asampan alen pasalpa zong akawng natlawhliang hi.

Tua inntungpan akiasuk nupinu pen silo bilbel a, ahi zongin leilak ah atuksuk ciangin sibup in liamna tuamtuam tawh Changi General Hospital ah zatui kibawlding in kipuak hi.

More: Singapore ah innteeng nasemin aom Lhai Nei Kim inntungpan kia in si

Police te’n hihvai tawh kisai in Ministry of Manpower (MOM) te zasak uh a, Foreign Domestic Worker (FDW) te nasepzia alauhuaipi akisawlkha hiam cihte akipan hihbuaina vaitawh kisai in kumpi thunei te’n hoihtak kancianna neiding uh cih kiza hi. Sawltak #zomidaily