Singapore ah innteeng nasemin aom Lhai Nei Kim inntungpan kia in si
Singapore gamsung ah nasem in aom Myanmar gammi numeikhat inntung panin tuaksuk in si cih DVB pan kiza hi. Tua numeinu minpen Lhai Nei Kim kici a, Singapore, Hougang vengsung aom Block 476B ah innteeng nasem “Domestic Worker” in aomkhat kici hi.
Zanni Monday (Feb 26) zingsanglam 6am hunpawl in Hougang vengsung anasepna inntungdawl 12 Floor panin lengkhia in, hongnusia kici hi. (Facebook tungah pawlkhat te’n alengkhia hilo in, puan apho laitak akiasuk acizong om uhhi)
Lhai Nei Kim pen kum 33 aphakhin khat hi a, Myanmar gamsungah Tamu khuasungah ateengkhat ahihi.
Singapore ah innteeng nasemding in apaizawh, atunzawh pen kha 6 bek phapan kici hi.
Lhai Nei Kim ii apasal in agenna ah hihbangin azi in anutsiatziau pen ka umzokei hi. Nungdiak mahmah inzong Video Call tawh kaki ho uhhi. Kim ii anu apa akua mapeuh inzong umtheilo uhhi. Kuamahtawh ki khasiatna omlo a, hihbangin hongnusia cih kazakvat uhciangin ka khasia mahmah uhhi. A nasepna innteek Boss tetawhzong alemlo om cihbang hong genngeilo hi ci’n apasal in genkhia cihi.
Hongnusia Lhai Nei Kim pen pasal neikhin hi a, tazong 2 aneikhin ahihi. Atate pen khat kum 13 phakhin a, aneuzaw pen kum 7 bekbek aphapan ahihi. Innkuanpih nulepa, apasal, ataneu te nusia in Singapore ah nuntak anopzawding lunggulhna tawh sumzongin akuankhia hiding a, hihbang thute ihzakkhak ciangin ihdipngek hongsukha mahmah hi. Athu ala akicianzaw in atheipeuh Comment panin ahizongin ki Update totoni.
2017 kumsung inzong Singapore ah innteeng Domestic Worker in aom Zin Mar Oo kici numeino khatzong inndawl 19 panin lengkhia in anuntakna beilawh ngeikhin hi. Zin Mar Oo pen Myanmar, Rakhine State pan ahihi.
More: Singapore ah Myanmar innteeng nasemkhat inndawl 18 pan kia in si
Tuaban ah 2016 kumsung inzong Singapore gamsung mahah innteeng nasemin aom Chin State, Dimpi khuapan Nu Piang Ngaih Don in hongnusia hi. Nu Piang Ngaih Don zong ataneu nusia in Singapore gamsung ah nasemin akuankhia hi a, innteekte bawlsiatna hangtawh anuntakna aneilawh hilhial hilawmlawm a, khasiat huai phadiak hi. Sawltak #zomidaily
Kham says
A khua atui anu apa te min khawng zong homg at sam ve vua guai te.