Donald Trump Pangzang khua ah ~ Pu Thangboi

Donald Trump Pangzang khua ah ~ Pu Thangboi

Mihing te’n pen ei minam pen minam dangte sang in athupizaw a ngaihsutna “Ethnocentrism” kinei baih mahmah hi. Apil deuh te’n tua lungsim akilangh saklo bek uh hi a, asungtawng vuah minam dangte neumuhna om thei gige lel hi. Eimi sung nangawn ah zong “Ei pen nampite hihang” aci mawkmawk khawng om hi.

Zimbabwe kumpi gilo minthang Robert Mugabe bang akhangno lai in nak pianthak mahmah hi. Mikang missionary te’ inn khat ah Bible Study (LST thusinna) bawlkhawm zel uh hi. Tua mikang missionary te’n zong itbawl ahih man in nuamsa mahmah hi.

Ahih hang:

Nitak khat bible study bawlkhit teh Robert Mugabe innlam zuan in aciah leh avan khat mangngilh hi. Amah zong kileh kik in missionary te’ inn lam ah paikik hi. Innpua pan in a etsim leh aden a bible study abawlpih missionary te’n ama’ tutna teng lungnoza nakap uh hi.

Amah zong khasia in lutnawnlo hi. Tuani a kipan abil puak lian hi. “Hong it taktak nahi kei mawk ve uh e. Ong neumuh mahmah uh nahi veh e maw” ci’n akhantawn mikangte mudah in tu a tan atung ahi hi. Minam dangte neumuhna akinei ciat mah ahi hi. Ei leh ei minampi a kingaihsutna pen hong lutbaih mahmah hi.

Ataktak in bel:

Minampi, mi thupi deuh cih bang aom hituanlo a, ih khankhiatna kimlepam tawh kisai hizaw hi. Zomi khat America ah khangkhia leh American te zahmah in hong pillel ding a American lungsim hongpua lel ding hi.

Tuamah bang in:

Donald Trump zong Pangzang khua khawng a piang hileh Teizang pau in pauding a, Teizang LST bu bawlding khawng tawh buai mahmah ding hi.

Minampi cih atuam a om hilo hi. Ih khankhiatna kimlepam leh ong kipattahna in saizaw hi. Genkhiah aom leh ngaidam, Mung Laan Thang (Tonzang, Zogam)