Singapore Changi Airport sungah numei khat kum 8 sung teengcip

Singapore Changi Airport sungah numei khat kum 8 sung teengcip

Singapore Changi Airport sungah numei khat kum 8 sung teengcip hi ci’n Lianhe Wanbao News in Wednesday (Jan 04) ni in genkhia hi. Tua numei pen kum 50 gualpawl hi a, Reporters te’n amin adot ciangin ki genkhia nuamlo hi. Amahpen abeisa kum 8 hunlai akipan sum haksakluatna hangtawh Tampines vengsung aom ama inn mi saapsak in amahpen vanlengtual ah aomcip cimawk hi.

2008 Financial Crisis hunlai in supna lianpikhat tuakkha a, sum haksak luatna tawh lungkham in ki diahcip hi. Cihnading theilo ahih manin, Singapore gamsung aom Changi Airport ah tawmvei agiakpak dingin akithawi hi a, aomsuaksuakna in kum 8 hunbeiziau cimawk hi.

Avanneih sunsunteng pen Airport ah akizang Trolley tungkhat ah koihziau a, niktee’n puansilh, nektheih leh nisim alotheilo vanzatpawlkhat cihbek aneihsa omlaimawk hi. Vanlengtual sung aom Airport Food Court ah an ne a, tuasungteng mahah Supermarket zong omlel ahih manin, nungta theitheilel hi. Kisil nading Showers, Air-conditioning leh Wi-fi zong amawkna in kizangtheilel ahih manin, omtheithei suaksuak lel hi.

Changi Airport Group te’n hihvai tawh kisai in Statement abawlna ah Airport sungah giahphual sat in abelhcipsawm aom kamuh uhciang in tuabangin aomloh nading un ki genzel hi. Hihnu vai tawh kisai in ahuhthei ding “Ministry of Social and Family Development” leh “Family Service Centres” te kiangah huhna ki ngetsakding hi ci’n genkhia uhhi.

More: Florida, Ford Lauderdale Airport ah mi 5 kaplumpa kimanta

Gamminthang, gamkhangto mahmah ihcih munte ahzong hamsa asamahmah naom veve a, inn neilo tampi mah omveve uhhi. Zogam ahbel ihzawn mahmah hangin inn kineitek bilbel hi. ZD Sawltak #zomidaily