2007 – 2012 ZYA nasepna ~ Sia Kham Sian Pau
ZYA Birthday & Concert (2007) :: Thukhise thukimna om bangin ZYA Birthday & Concert thupitak bawl in Sisan hopna Zomi sungah tangko ding cih lunggulhna tawh ZYA in kivaihawm pah hi. Kalaymyo khuasung nu le pate kiang huhna kingen a ZYA makaite ni 6 sung kivak kawikawi a, nu le pa inn 61 tung pan Ks. 477,000/- (teng li le tul sawm sagih le tul sagih) kingah hi. 17 January 2007 ni-in ZBCM huang sungah Concert thupitak kibawl a, Sisan hopna thu tangkona zong kinei pah hi. Evan. Langh Do Khup in khangnote i minam le i Pasian ading mapang dingin hanthawtna hong neihsak hi.
Dr. Thang Lian Kap le Dr. Goih Khan Nuam in Sisanhop a lauhuai-lohzia le thupha ahihna thu hong gen uh hi. Falcon Band-te in music hong tumsak uh a, Zomi Lasiamte in la hong sa ziahziah uh hi. Gelna om bangin thupitak le lungkimhuai takin kibawl zo hi. (Ref. ZYA Meeting Record Book I, Pp. 63-76).
Zum neihna
Thukyise thukimna om mah bangin ZYA in nasep ding tampi gelna kinei-a, Zum neihloh phamawh kisa ahih manin Zum inn ding kivaihawm hi.
Zum Inn khatna
Pinlong 9, Bogyoke Road (tu’n Tazin veng) a Pa Nang Khan Cin (Nangkuh) inn hong kawmsak nadingin makaite in cikhum le bawngnawi tawh kingen a Pa Nang Khan Cin in minam le Pasian a itna tawh a sap bangmah la loin zum na ngakzawh ding uhleh zanglua un, ci’n phaltakin hong pia hi. 2007 January 5 – 2008 January 17 dong kumnih sung nuamtakin kizang hi. Pa Nangkuh inn zum in a kizat hunsung khempeuh Sia Peter Khual Lam Mangte (Canaan Land) in a phone uh phaltakin ZYA zum phone in hong zangsak uh hi. (Ref. ZYA Meeting Record Book I, P. 61).
Zum Inn nihna
2009 ciang Pa Gin Khan Langh (Zuasiam)te inntual buk zat dingin makaite in cikum bawngnawi tawh kingen a, amau zong minam le Pasian a itna uh tawh saploh in 2009 January 17 ni a kipan 2010 January 17 dong kumkhat sung ZYA zum in hong zangsak uh hi. (Ref. ZYA Meeting Record Book II, Pp. 47, 46).
Zum Inn thumna
2010 ciangin Zum inn ding geelna bangin hong lemloh ciangin tawlkhat zum inn ding kizong kawikawi hi. Hibanga ZYAte tavai in zum inn ding zongin a vak kawikawi lam Pa Theu Khan Dal in a zak ciangin ama inn hong zangsak nuam cih thu kiza hi. ZYA President Pa Ngul Do Tuang le ZYA General Secretary Sia Kham Sian Pau va hawh in Pa Theu tawh va kimu uh hi. Pa Theu in, “Zomite kipawlna buang Zum inn ding cimawh cih ka zak pen ka lung nuamhet kei, kei inn zattheih dingin a omleh ka innnuai khan (First Floor) kumkhat sung saploh in zang un, tuaban na zatnoplai uhleh zong ahunhun in kiho toto ni,” hong ci hi.
ZYA makaipi gel in a et uh ciangin Pa Theu inn pen Building hoih mahmah khat ahih banah a sung limtak kipuah sitset ahih ciangin lungdamlua uh ahizah liangin Pasian hoihna a mu ding kisa lo uh hi. Zang ding zanglo ding cih kikup zong om man nawn loin President Pa Ngul Do Tuang in Topa tung lungdamkohna le apna neipah a, kum khat khitteh sap dingin kiho in tuni dong kizang hi.
Zum Nasem (Sizong)
Thukyise thukimna ommah bangin ZYA-EC in zum nasem (full time) koih ding hong vaihawm uh a, ZYA zum ah fulltime in na sem ding minam a it a vei mi kideih a 30 January 2007 ni interview sam ci’n laihawm tuamtuam pan tangko uh hi. Tua ma sung EC committee sungpan zing le nitak kikhel in zum ngak uh hi. Tangkona om mah bangin 30 January 2007 ni’n ZYA zumah ZYA fulltime nasem ding interview-na kibawl a, Zomi a it Zolia 5 le Zotang khat interview hong lut uh hi. EC in dothuai sakteng kidong mark kipiaciat hi.
A tawpna ah tua mark piak teng gawm in tamngah penpen Tg. Cin Khat Thawn Khai @ Nauthawn (173/13 Pinlong, St. RC) kitel hi. Ahi zongin sum tam kipia zolo ding banah piakzawhloh hun zong om thei ding ahih manin minam a it, avei taktak deihna hizaw a, khasum zong tam kipia zo hetlo takpi hi. Bektham loin khacin ciang EC Committee teng koi i zumngak khasum ding nang bangzah khiazo ding ci’n kidong thiamthiam-a kipiak hun zong tamveipi om hi. Tua hun-a kipan tuni dong a mi a kilaih hangin Zum nasem (Sizong) kineisuak hi.
Zum Ngak (Office Assistance)
Lia Man San Niang
ZYA in Office Assistance khat fulltime a koih ding hoih kisa a bangmah kipia zo nailo ding ahih manin Lia Man San Niang (Actress Cope Topa DVD) tung huhna nget dingin thukimna ommah bangin Committee in huhna kingena aman zong minam a itna tawh December 2009 a kipan bangmah la het loin hong sepsak hi. Tualai-in ZYA Zum Zuasiamte inntual buk hi-a, nisim in zum hong kah den in ZYA sisan hawm saziante a kipan a kitangsam tampitak hong sepsak hi. (Ref. Meeting Record Book II, Pp. 98, 102,)
Lia Gin San
ZYA inn neipa Pa Theu Khan Dal tanu hi-a, 2010 amau inn zum inn a, a kizat a kipan ZYA Office assistance dingin kicial ahi hi. 2010-2012 Office Assistance in kizang a, 2012-1015 dong Office Assistance le Accountant in kizangkhawm hi. Amah Office Assistance a i zat a kipan vai tampi hong lemtang hi. ZYA Zum amau inn ahih mah bangin kisapna a nei khat peuhpeuh a sun a zan cilo ZYA zum ah na tai thei in ZYA nasepna 24 hrs. nuamtak hong kikalsuan thei suak hi.
Motor Cycle neihna
Nasepna hong tangzai semsem a nisim in sisan kisam li le nga hong paiden hi. ZYA in Motor Cycle kinei nailo ahih manin Sisan hawm dingte cycle (Setbing) tawh zongin puak pen hunlap hetlo ahih manin motor cycle vaihawm dingin kikhensat hi. (Ref. ZYA Meeting Record Book I, p. 87).
Motor Cycle masa
Sisan hawm ding mi zon na’ng Motor Cycle kisamlua ahih manin Kalaymyo khuasung nu le pa mi 71te kiangah inn vak-in huhna kingen a, Ks. 16,32,000/- kingah hi. Motor Cycle Kenbo 125 licence nei khat Ks. 12,31,300/- in kilei hi. October 1, 2007 (Mon – 8:00 AM) in Pa Am Za Khen inn ah apna hun kibawl hi. General Secretary Sia Kham Sian Pau in hun makaih in Rev. Hau Go Kham in ZYAte thapiakna le hanthotna tomno hong neihkhit ciangin Motor Cycle Topa tung apna hong neihsaka, tua ni a kipan a kisapna om bangin Motor Cycle kizang pah hi. (Ref. ZYA Meeting Record Book I. p. 87, 88, 90).
Motor Cycle nihna
ZYA nasepna min hong thei semsem in nasep zong hong tam semsem hi. A kawl a vai cilo cimawh dongtuakte ZYA zum ah hong pai uha, ZYA in zong minam biakna deidan nei loin huhzawhzah in kihuh hi. Sisan zon na’ng bek zong motor cycle khat hong kicinglah mahmah ta hi. Tua ahih manin kalkhat sung nasepnate ZYA Weekly News ci-in internet ah a kikhah banah motor cycle khat a kisap beh mahmah na zong pulakin 16 March, 2009 a kipan huhna kingen hi. Singapore a om Pa Pau Za Mung in hih lai a muh ciangin Pa Pum Za Kam (Kalaymyo) tawh na kithuza in Motor Cycle Kenbo X 125 licence nei khat na na leisak hi.
Tuakhit ciangin ZYA thu hong zasak uha, April 4, 2009 (5:00 PM) in ZYA zum ah apna le sanna hun kibawl hi. Pa Pau Za Mung (Singapore) palai Pa Pum Za Kam in a vankim in ZYA tung apna hong nei-a, Pa Ngul Do Tuang ZYA President in sanna hong nei hi. Evan. Lang Do Khup in hanthotna tomno hong neihkhit ciangin Pa Pau Za Mung (Singapore)te innkuan ading thungetsakna le Motor Cycle Topa tung apna hong nei hi. (Ref. ZYA Meeting Record Book II. p. 68).
Motor Cycle thumna
Kalkhat sung nasepnate ZYA Weekly News ci-in internet ah khahna le motor cycle ngetna tungtawn mahin USA ah Ph.D sin a om Rev. Zam Khat Kham omna a om Zomite kiangah na pulak in sum hong na donsak hi. Siapa in June 2009 in Kawlgam hong ciahin Kalaymyo ah 4-5 June, 2009 sung om thei ding hi’ng, ZYA Motor Cycle kong leisak nading uh US$ 1500 & something ngah ung, Motor Cycle na dawpkhol un, ci’n Secretarypa tung na zasak hi. ZYA in motor cycle Ks. 15,00,000/- kim man ding kizong pah a deih bang kimu zolo hi.
A tawpna ah Pa En Za Thang (AMC) India Hero Honda (Street Smart) licence nei khat Ks. 15,00,000/- in kitangnget in aman zong minam a itna tawh hong piakhia hi. Rev. Zam Khat Kham hong tun ciangin ZYA Committee in va kidelhpah a, India Hero Honda, Street Smart zong amah lakpahin aman piakkhiatna zong hong nei pah hi. ZYA Advisor Pu Thual Za Thang in sanna hong nei a, Rev. Pau Khan Khai in thapiakna le Topa tung apna hong neihsak hi. (Ref. ZYA Meeting Record Book II, Pp. 82, 85).
ZYA Motor Neihna
ZYA in mailam ah tangpi tangta in nopna dahna ah i zat theih ding Zomi Motor, Zomi Innpi (Zomi Hall), Zomi Tualpi cihte neih ding kilunggulh hi. Bekthamlo oxygen kisam damlote zong oxygen piakzawh ding lunggulhna kinei hi. Ahi zongin hite koici bang hong piang ding cih pen thungetna lo ngal ZYA in bangmah vaihawm zawh kineilo hi.
ZYA Motor Masa
ZYA ngimletup tampite lakah nopna dahna a zattheih ding Zomi motor vaihawm masak dingin kigel hi. Tua ahih manin 17-6-2008 ni a Evan. Langh Do Khup in Pate ni a a thugenna ZYA in sponsor in Zomite nu le pate zahtak ding deihna tawh hawmkhia-a, Sum kingahte ZYA Motor lei nadingin zat dingin kikhensat hi. Hibangin ZYA in DVD tawh ahawmkhiat theih nading phalna Evan. Langh Do Khup kiangah a kinget ciangin tuabang ahihleh “A Side pen ka thugenna teng ci pah ni-in, B side ding Nute itna hong zaihsak ning” ci-in “Tunnu Awnem” DVD hong bawlpih hi.
5 December 2008 sun in zum ah Dr. Gin En Cin hong hawha, “Kawlpi a om Zomi Pawlpi khempeuh tawh ankuang umkhopna,” khat neih ding a lunggulhna pulak hi. Zum pan zong ZYA nasepna teng le ngimna tupnate kigen a, nopna dahna ah zat ding Zomi Motor le Zomi Hall khat neihzawh ding cih kipulak hi. Dr. Cin in, “Ken hih motor neih ding thupisa ing ei, Motor leina’ng sum hong khia hipah ning ei,” ci-in Ks. 30000/- (tul sawmthum) hong pia pah-a Motor lei nading sum kingah masa pen hong suak hi.
Tunnu Awnem DVD sum a kikaihkhop ciangin abeiteng banah Ks. 17,00,000 (teng sawm le teng sagih) amet kingah a ngahlai ding pawlkhat zong om hi. Tua laitakin PCMte in a motor uh Ks. 50,00,000/- (teng sawmnga) in zuak, dek leng hong khiamthei kha ding cih thu kiza ahih manin sum zonbeh a tua motor lei dingin kihanciam hi. Tua laitakin Rev. Dr. Chin Do Kham ZYA zum ah hong hawha ZYA nasepna teng le maban hong dongin hong kiholimpih hi. ZYA panin motor lei nuam mahmah ung, teng sawmnga neileng a kilei zo ding khat om cih kipulak hi. Dr. Kham in no bangzah nei cih hong dong a, teng 20 kim nei ung kicih hi. Tua ahihleh teng 30 kim zonbeh ding ahihleh maingaphuai mahmah in LZI min tawh ahi zongin hong hanciam nung cih hong kamkhap in motor va en ni hong ci a, a en ding a kipai le motor na vakkhia in Dr. Kham kilak theilo sawnsawn hi.
Dr. Kham in hong kamciam om mah bangin US atun ciangin LZI ah athu hong na sunsak a, LZI in nakpitak hong hanciamsak ahih manin sum a tengza a sim kingah ding cih Dr. Kham in hong zasaka, motor ahoih piankhat na lei un cih hong vaikhak hi. Tua laitakin Mandalay ah Kawl phungzi khat tawh ZYA Presidentpu hong kitheikha a na deih uhleh ko min tawh motor a thak without lei leuhcin kingah lel, cimawh dongtuakte huh nading ahihnakleh ko hong vaihawmpih theilua ung ci, cih thu hong om hi.
LZIte hong leisak ding ahih banah Zomi min tawh motor om masa penpen ding ahih manin motor hoih khat mah ngahzawh ding ZYA in kilunggulh hi. Dr. Do Kham in zong 13 July, 2009 kim Kalaymyo hong ciah thei ding ka hih manin tua hun a ki-apna bawl thei dingin sum ngahtheihna khat peuhpeuh pan na la unla na leikhol un. Sum pen upmawh sang tampi ngahzaw hi, cih thu hong zasak hi. Tua ahih manin bangteng hileh ZYA makaipi teng Mandalay pai suk a, Kawlphungzipa tawh kimu in Mandalay pan motor hoih lei ding kivaihawm hi.
Tua mah bangin ZYA makaite Mandalay ah, Kawl phungzipa kiangah kihawhpah hi. Lamet hong banglo in phungzipa in hong vaihawmsak zolo mawk hi. Tua ciangin Mandalay khua sungah motor zon cihtakin kizong hi. Atawpna ah LZI hong leisak ding buang without lawmlawm lei kei ni, buaina khatpeuh omkhaleh hoih kei inteh ci-in leiba liangin Leicence nei Hilux hoih mahmah khat Ks. 150,000,000/-(teng za leh teng sawmnga) in kilei hi.
Motor leikhit leh Dr. Kham Kalaymyo hong ciah kituak thei pah ahih manin 13 July 2009 ni Motor apna le lungdamkohna pawipi thupitak in Kalaymyo Emmanuel Baptist biakinnpi ah kibawl hi. Motor lei na’ng sum a tamzaw hong vaihawmpih Leitungbup Zomi Innkuan (LZI) tung lungdamkohna in bawng khat kigo in Lungdamkohna Laipi zong kipia hi. Zomite hong it hong deihsak in hong angvan tinten Rev. Dr. Chin Do Kham pen “Hawmsiam Zuapa” minphatna (Award) kipia in a zi ading zong puandum kipia hi. (Ref. ZYA Meeting Record Book II, p. 44, 66, 62,66, 70, 89)
Motor Leiba
Motor leina LZIte hong piakban a cianlai teng pen a met tawh kila ahih manin na khangkhang hi. 3-5-2010 ni-in motor vai a leiba vekpi sazian limtak kisit a, sum a met a kila ahi manin Ks. 37,50,000/- na tungta hi. Hih thu mipi kiangah lah kigensiang ngam loin Committee in kibilpuak hi. A sawt ciangin tua hun laitak a ZYA Consultant ahi, Evan. Langh Do Khup in hong thei hi. Tua ciangin leiba dit zawh nadingin a nuai-a bangin hong vaihawmpih uh hi.
Sian Hong Hallpi ah mi sam
Evan. Langh Do Khup, Rev. Pau Khan Khai le Rev. Job Nang Khaw Thawngte makai in Sian Hong Hallpi ah Kalaymyo a om Zomi nu le pa muanzawk deuhteng samin limtak an kivak hi. Mawtaw leiba a om lam a thu limtak a kigen khit ciangin Zodial khatta ki-awksak in amau ngapzah ciang piak ding kikamciamsak hi. Pawlkhatte in a kamciam bangin hong piatek uha, pawlkhatte in anlah ne, Zodial lah ok in ciahpih napi un tuni tan bangmah hong pia tuanlo uh hi.
ZYA Series I bawl
ZYA Motor leiba dit nading mah bulphuh in ZYA Consultant Evan. Langh Do Khup in ZYA Kumcin Khawmpi thupitak hong bawlpih in ZYA Series ding Video limtak hong zaihsak a kizuak leuleu in, honpi khat mah motor leibal kidinzo hi. (Ref. Meeting Record Book II. P. 28, 30, 32, 34, Book. IV. 29, 33, 35).
ZYA Calender bawl
2011 ciang Hawmsiam Zuapa minphatna ngah Rev. Dr. Chin Do Kham Pahtawina le Sangmang Robert Cope hong paizawh kumzacin phawkna in ZYA 2011 Calender hoih mahmah bawlin kizuak hi. Sum ngahteng motor leiba mah kiditna hi. (Ref. ZYA Meeting Record Book II. p. 36, 102, Book IV. p. 6, 7).
Singapore le Malay paina
4 July 2014 ni-in thu kikupna kinei a, ZYA leiba teng ditsiang zawh nading, zum van pawlkhat behlap zawh nading le ZYA sumbul or sumlut pongman neihtheih nading lunggulhna tawh ZYA President le Secretary, Singapore le Malaysia a va pai ding un kikhensat hi. Ahi zongin Presidentpa lemtheilo ahih manin ZOFA min tawh More than a game trainning kah ding Sia Thawntuang le Sia Daltawng tawh ZYA Secretary a va kithuah dingun kikhensat hi. Gelna om bangin Sia Do Khup (OM) in makaih in vapai thei uh a Sia Thawntuang le Sia Daltawng trainning kahin tuasung Sia Pauno in Pa Hang Khan Liante inn tung in na ngak hi.
Nipini biak kikhop hun sungah ZIS in Sia Pauno ZYA min tawh thugenna hunkhat na pia hi. Lawm tegel a omloh hangin Sia Pauno deihtak thu na sunga, ZIS in zong ZYA tawh khut kilen in na sepkhawm ding na thukim uh hi. Trainning kah Sia Thawntuang le Sia Daltawng hong man uh ciangin Malaysia ah ZCFte innteekna tawh kipaiphei hi. ZAM in meeting hong sapsak in Zomi ZAM nuai a kipawlna innpi min tawh ma hong pangkim uh hi. ZCF biak kikhopna le mun dangdang-ah zong vak kawikawi uh a, mimal kim hong kihel ciat uh hi.
Kal khatsung Malaysia ah kitam in tua khitciang Singapore kiciahkik a Pa Lian (Hang Khan Lian)te inn kitungin ZIS+ZYA meeting zong kinei hi. ZIS lungkimsa ZYA tawh atawm atam kiciangtanlo khut kilen a na semkhawm ding cih kipsakna kinei hi. Singopre ah zong Zomi a kuamah ciat kiang kipha kim in hong kipanpihtek banah khasim Ks. 100,000/- ta tawh tuni dong nasep khopna kinei den hi. ( Ref. Meeting Record Book IV. pp. 26, 28, 31, 34).
Motor zuak without khat lei
Bangzah takin hanciam in mawtaw leiba dit nading ih vaihawm hangin kum hong pai toto a vekpi in kidinkhinzo tuanlo ahih manin amet na khangkhangin tampi mah na phakikzel banah motor zong lui ta ahih manin kizuakkhia hi. Licence neilo (without) khat kileikik hi.
Yangon Paina vai
ZYA Makaipi Pa Khan Za Nang, Pa Kam Suan Mung, Sia Kham Do Dal, Sia Kham Sian Pau le Lia Cingpite in ZYA nasepna pulakna le Leiba teng dit zawh nading lunggulhna tawh Yangon paisuk uh in pawlpi tuamtuam ah nasep pulakna le huhna kingen kawikawi-in sum ngahzah a nuai-a bangin kong suaksak uh hi.
Motor leiba din
Sum i ngah masaksak tawh motor leiba i dittohtoh pen a dangteng kidinzo in teng 12 omlai hi. Hih teng 12 pen a kibat sawt mahmah ta ahih manin Committeete in Zongeina tawh cikhum bawgnawi tawi in a met hong lakleh zong tawm beek hong khiam nadingin va kithum hi. Ahi zongin a kibat sawtluata ahih manin lem theilo a, sumbul le amet gawm teng 24 kipia hi. Tua ni September 18, 2011 ni a kipanin leiba khempeuh kidinsiang zota hi. (Ref. Meeting Record Book. IV. p. 17, 35, 37, 39).
ZYA le ZOFA vai
ZYA le ZOFA pen kipawlna tuamtuak ahih mah bangin a kiphuat hun le a phuan (Founder & Founding Committe)te zong kibang khinlo banah nasep zong kibanglo hi. Ahi zong in a kipawl theilua a kigawmtheilua ding gegu Zomi sungah kipawlna tuamtuam tampi a om ding hoihsa lo a kipawl/kigawm ding a lunggulh Committeete sungpan pawlkhat hong om hi. Pawlkhat mah zong kipawl ding utlo hi. Hibang thuteng hangin ZOFA Committeete ZYA tawh kipawl ding leh kipawlloh ding nasia takin thu kikupna nei uh hi. ZOFA panin ZYA tawh kimukhawm nuam cih thu hong zaksakna uh tungtawnin ZYA in 6-1-2008 ni-in Pa Khan Za Nang (ZYA Vice President) inn ah ZOFA vai meeting kisam hi.
ZOFA President in ZYA tawh kigawm ding vai meeting sam in nasiatak ka kikum uh a, ZYA tawh kigawm ding mah ZOFA thukim hi, cih thusunna hong nei hi. ZYA GS in hi bangin kipawl/kigawm ding thu nong sun uh makaite picing hong sa ung. Ahi zongin no hong paiteng lakah ZOFA Secretary Sia Khampeek le Pa Cin Khan Lian omlo ahih teh amau bang a ci diam, cih dotna hong nei hi.
ZOFA President in hih pen ko ZOFA thukhensatna tawh kizui-in thu hong sung hibek unga, thu kikum thak ding hi nawnlo ka hih manun lungkimlo cih bang omthei nawnlo hi, ci-in dawng hi. ZYA panin “kipawl” i cih ciangin ZYA le ZOFA kikim ding maw, ahih keileh a lubawk zaw khat om ding maw, “Kipawl” i cih kammal tawm nong gencian beh thei ding uh hiam, cih kidongkik hi. ZOFA panin Pa En Khan Go (ZOFA) in Letter head ah ZYA tungnung cih ahih manin ZYA a lutang mah cihna hipah hi, ci-in dawng hi.
Pa Kam Suan Mung (ZOFA) ZOFAte ka kikupna uhah ZYA in Zomi Khangno khempeuh huam a, ZOFA in Bawlung bekmah huam ahih manin ZYA mah tangzaizaw a, ZYA mah lutang ding cih ka thukimna uh hi, cih hong pulak hi. Hibangteng khit ciangin a nuai-a bangin thu khensatna kinei hi. ZYA EC. 02/2008/01 – ZYA le ZOFA kigawm ding vai tawh kisai-in ZOFA President Pa Vial Khan Do in ZOFA le ZYA kigawm ding ZOFA thukimna thu hong sunna lungdam takin kisang hi.
ZYA EC 02/2008/03 – Letterhead tawh kisai-in ZYA min tungnung ding a, logo pen departmentte in amau a ciat zang ding uh hi. Hih ni a kipan ZOFA pen ZYA nuai-ah deparment khat in om in, Pasian minthan nading le minam khantoh nadingin kimawlna tawh nakpi-in mapang hi. (Ref. ZYA Meeting Record Book II. Pp. 1, 2).
ZYA Branch; Tedim ZYA Branch
Zomite khuapi Tedim ah ZYA Branch neihzawh ding lunggulhna lian mahmah ahih manin 17-6-2008 ni-in ZYA EC 9-2008/02 tawh kizui-in EC sung pan Sia Kham Sian Pau, Pa Kam Suan Mung, Pa En Khan Go, Sia Kham Do Dal le Pa Vungh Za Khupte Tedim va pai uh a, 18 June 2008 ni-in Tedim khuanu khuapate tawh thu kikupna va nei uh hi. Tedim Tuiphum LST sangpi le Tedim AG LST sangpite ah zong sisan thugenna va nei uh hi. Tedim khuanu khuapate lunggulhna tawh 24 June 2008 ni-in Zomi Khangno Kipawlna pan mi 24 mawtaw nih tawh Kalaymyo pan Tedim khua ah va paitokik uh hi.
29 June 2008 Nipizing kikhop CMBC, EBC le Sakollam Tuiphum biakinnte ah hun zangin sisan thu tangkona va nei uh hi. Nitak ciangin CMBC biakinnpi-ah Sisan Thu Tangkona Concert nasia takin bawl leuleu uh hi. ZYA in hi bangin veina tawh na a sepna tungtawnin, a kisap hunhun a sisan pia ding mi 216 hong kipiakhia hi. ZYA Committee Tedimte tungah hih sisan hawm nuam mi 216te ki-ap a, hite bulphuh in Tedim ah sisan hopna kipankhia hi. Anung ciangin ZYA kici nawn loin Tedim Sisan zong kipawlna cihbang khat kicikik hihtuak hi. (Ref. ZYA Meeting Record Book II. p. 20, 22, 23, 24)
Sisan Gospel paina
Kum 2007 panin Zomi sungah kipumkhatna, khat le khat ki-itna kilainatna hong om zawk nading leh zato a sisan kisam a, a si ding mite nuntakna hotkhiat ding lunggulhna tawh in December 29, 2006 (Fri) ni kipai in ZYA min tawh sisan hawpna patkhiat dingin khensatna kinei-in Kalaymyo sunga om Zomi makaih pawlpi 52 ah kum 2007 le 2011 kumte ah sisan gospel kipai-in ZYA ngimnate genna le sisan hawm thei ding khangnote kizawn in khangno tampitak tawh sisan hawpna tuni dong a kizom suak thei ahi hi. Sisan hawmthei ding mi tampi hong kipiakhia banah sisan hawm thei nawnlo nu le pate in sumlepai tawh tha hong pia in kilawhcing mahmah hi.
Oxygen Vai
Yangon a om Dr. Gin En Cin, Tg. Pau Lun Min Thang le ZYA Consultant Rev. Pau Khan Khai te hanciampihna tawh Yangon khua sungah inn ZYA in neih ding a ih lunggulh mahmah Oxygen vai innvak ngiat in huhna hong ngetsak uh a, tua tungtawn in Oxygen a kinei thei hong suak in minam itna tawh hong vansak Siate tung zong kilungdam mahmah hi. Hong piakhia teng min a nung ah hong suaksak ung.
Zusa kial huhna
Kum 200? in Zogam mun tamzaw ah mautaam in zusa langin ankung khempeuh zusa in netum mang ahih manin Zogam Zomi sungah kialpi hong tung hi. Hih hun sungin ZYA min tawh in Kalaymyo panin Sawbua khua ah Ngalzang khua, Suahlim khua le Siahkhente ah kihawmin Zomi tampi-in phattuamlawh mahmah hi.
MSI tawh nasepna
Marie Stopes International (MSI) Kalay panin makai Sm. Mang Za Kim (Kimboih) le Sm. Hau Khan Vung (Vungbuah) te hong pai-in MSI le ZYA khut kilenin cidamna lam nasepkhop ding thukimna kinei-in kalkhat nihvei (Tue & Fri) simin mi 20 ta samin ZYA zumah cidamna tawh kisai thusinna hong pia uh hi. Hih cidamna tawh kisai thusinna ah ZYA makai teng kikah masa in a zom ah ZYA tungtawn a sisan hawmsate leh sisan hawm dingte kikahsak in phattuamna tampi kingahlawh hi.
Galdotmual (႐ႈခင္းသာ) tui
Dr. H. Gin En Cin lunggulhna tawh Kalaymyo pan Zogam khualzinte khawlna mun ahi Galdot mual (½Icif;om) ah tui tunsak ding hong vaihawm in ZYA in zong hoih kisa in tuikhuk (Thanky) khat kibalw in a saklam tai 2 na pawl panin tuizawl (Pipe) tawh tui kila in tuni dong sumbei teng Dr. H. Gin En Cin in si-in thagui thatang kisam teng ZYA in kisem hi. Kisusia zel, tuizawl (Pipe)te kiguzel in ahih hangin hanciam in kisemsem hi. Puanin zun ciat ding hi hang.
ZYA Weekly News
Zomi sungah na nasepte uh thupi mahmah banah, Zomi cimawh khat in hong zuat theih nadingin kalsim thu kizakna khat nei zo leuh cin cih hong kilunggulh sakna tungtawnin kikupna kinei-in, February 20, 2011 nipan kipanin ZYA kalsim thuthang (ZYA Weekly News) cih kiphuan in, Pasian le Zomi a it te panpihna tawh tuni dong kizomsuak zo a, mimal (1300) kim tungah kihawmkhia hi. Hih tungtawnin ZYA nasepnate Zomi tampi in hong theihpih in nasepna tampi nuamtuam in i lungdam hi.
Tongsan vai ZYA Mapanna
Tongsan laihawm vai ah Tongsan Pu Sia Thang Sian Kham gamdang hong zin khit ciangin Tongsan vai ah vaipuakna a la Lia Kham Sian Lun le Tongsan pute kikal buaina kitelkhialhna lianpi hong om in ZYA in Zomi sungah hih bang buaina aom ding deihlo lua ahih manin kuama cial lohsa in nasia takin pan kila-in kilemtuah zo a tua khit tuni ciangdong Tongsan laihawm a kihawm suak thei ahi hi.
CCJ Bus Accident Vai
J.H. Cope Topa hong tun zawh kum 100 cin CCJ pawi simding a hong pai Bus khat kibungin ZYA motor tawh a phual pha in misi luang 4 kipua in Zato ah kitunpih hi. Hih tuahsiate huh nadingin huhna sumpiakna bung kikoih in ZYA in Ks 100,000/- val kingah sak in CCJ Committee tungah ki-ap hi. Tua khit ciangin Leitungbup Zomi Innkuan panin huhna sum Ks. 100,00,000/- val ZYA min tawh a munmun pha in pai-in huhna kipia hi.
B (ပိုး) kidalna zatui vai
Yangon a om Dr. Mangpu deihsakna tawh Yangon Sisan hopna phualpite tawh kizopna hong bawlsak in, tuate tungtawnin ZYA tungtawn a sisan hawm mi 200 te Kalay zatopi panin B (ydk;) kidalna zatui sutna kinei hi. Sia Kham Sian Pau (General Secretary, ZYA Magazine)
Comment piaknop aomleh...