Singapore Changi Airport, Terminal 2 sungah meikang

Singapore Changi Airport, Terminal 2 sungah meikang

Singapore Changi Airport sung aom Terminal 2 ah tuni nitaklam in meikang cih CNA pan kiza hi. Terminal 2 Departure Hall ah akang hi a, Fire Alarm tepen nitaklam 5:40pm hunin gingpuak ngeingai hi ci’n Changi Airport thunei te’n genkhia uhhi.

Changi Airport Emergency Service Team tezong aphual ah amanlang, ahunlap in delhpah uhhi. Nitaklam 6:45pm hunciang in meikuang pen ki phelhsiang khinta a, meikatna ahangzong ki theikhin hi ci’n thunei te’n genkik leuleu uhhi.

Ahi zongin Airport Terminal 2 ah vanleng alengkhiading leh atuding te nawngkaina tampimah piangsakman veve hi. SCDF (Singapore Civil Defence Force) te genkhiatna ah meikuang pen Hosereel Jet kizang in ki sumit khinta cihi.

Changi Airport thunei te’n agenkhiatna ah Airport Terminal 2 panin alengkhiading vanleng tepen tawlpikhat ziakaiding hi. Operation akizopkik theihding ciangin hongki zasakkik dinghi ci’n tangkona nei uhhi.

Transport Operator SBS Transit te’nzong Airport meikatna hangin Bus Services 24, 27, 53 tepen Terminal 2 Bus Stop ah khawllo in taisuakding uhhi ci’n pulakna nei uhhi.

Vanlengtual Terminal sungah meikhu alut ciangin asung aom mipi te ki hemkhiasak in, ki patau manmahmah cihi.

Terminal sungah meikhu alut ciangin Passengers honkhat asungah ki lutsak ngamlo ahih manin, vanlengtual Tarmac kiphah tungah khetawh ki hemkhiasak uhhi.

Kum 27 aphakhin Sales Manager khatin agenna ah meikat laitak in apasal pen Kuala Lumpur zuanding in Changi Airport ah aomlaitak cihi. Terminal sungteng meikhu tawh kidim in Customs Counter ah lutdingzong kiphallo cihi.

Kum 31 aphakhin Business Development Manager khatin agenna ah Departure Gate ah ka om laitak in Passenger honkhat vanlengtaina Tarmac leitangtung ah khetawh ki paikhiatpih kamu cihi.

More: Singapore gamsung MRT meileng Station gei ah Taxi khat meikang in puakkham

Ama omna pen meikatna lam hikhalo ahih manin, adendeuh ciangin Singapore Airline tawh ka lengkhiathei uh cihi. Ahi zongin adang vanleng pawlkhatpen alending hunin ki lengsaklo in ziakaicip cih kiza hi. Singapore gamsung ah meikang kinawh simtham hi. ZD Sawltak #zomidaily