Pasian kitaisan theilo ~ Suangh Dal

Pasian kitaisan theilo ~ Suangh Dal

Pasian kitaisan thei lo cihteh minam it lo ding, minam taisan ding cihnopna hi masa loin, Khrih thu hangin ih minamte in hong mudah leh taisan ngam a Khrih ih zuat ngam ding thuhilhna ahi hi. Luka 1: 57-66na sung ih sim ciangin, Tuiphumpa Johan’ min tawh kisai thu kimu thei hi. Zekhariah le a beh a phungin a ngeina a om bangin a tapa’ min Zekhariah mah phuah ding sawm uh hi. Ahi zongin Topa’ deihna pen a nu Elizabeth gen mah bangin Johan kici ding ci hi.

A tawpna ah Topa’ deihna mah bangin, a beh a phung’ ngeina taisanin, a om ngei lo “Johan” cih min a phuah ciangin Zekhariah ong pau thei kika Topa’ min a phat hi, kici hi (Luka. 1: 64). Cihnopna ah Pasian kitaisan thei cih ding sangin ci le sa, nam le beh tawh kisai ah taisan ding tampi om hi zaw hi, cih LST’ ong hilhna a gen nuam ih hi hi.

Minam le Pasian kitalsik sakin khat zawzaw teel loh phamawh sak ding ih hihleh ih minam, ih nu ih pa, ih ta ih tute, ih beh ih phung taisan zaw-a Khrih nung ih zuih ding Topa Jesuh in ong hilh zaw hi. “Hih leitung nuntakna a hon nuamte in a nuntakna taktak taanlawh ding a, keima hangin a nuntakna a taanlawhte in a nuntakna taktak a ngah ding uh hi” na ci zaw hi (Matt. 10: 39).

Nuntak tawntungna tawh kisai ah, minam kitaisan thei in Pasian kitaisan thei lo hi cihna hizaw hi. A kulzawk leh minam pen kitaisan thei zaw a, ahi zongin Pasian pen nuntak tawntungna tawh kisai ah kitaisan thei ngei lo ding hizaw hi. “Taisan thei” cih ciangin mawhna hi lo cihna hi a, ih taisan hangin Pasian’ thukhenna thuak lo ding cihna hi. “Kitaisan thei lo” cih ciangin, a taisan teitei leh “mawhna” cihna hi. Banghang in mawhna hiam cihleh “taisan thei lo” cih nungsangin taisan teitei cih pen “thumanlohna” hi a, tua pen mawhna ahi hi.

Tua mawhna ah Pasian in thukhen ding hi. Pasian in thu khen ding ahih manin Pasian kitaisan thei lo a, mihing in thukhen lo ding ahih manin mihing kitaisan thei hi. LST sungah “…Pumpi a thah khit ciangin kha a that thei lote na kihta kei un. Hell khuk sungah pumpi le kha a nihin a susia thei pa na kihta zaw un” na ci hi (Matthai. 10: 28). A kitaisan thei pen lauhuai lo a, a kitaisan thei lo pen lauhuai hi.

Kha thu tawh kisai ah ih taisan ding tampi om den hizaw hi. Minam in gupna ong pia ngei lo dinga, gupna ih ngah nadingin Khrih min hangin taisan ding tampi om hizaw hi. Leitung ci le sa tawh minam kepcingna in nuntak tawntungna ong guan zo lo dinga, minam le a ngeinate vei luatna ah kitaisanna piangpiang a, tu-in hong tung khin zo hi zaw hi. Minam ualtung sak nuam lua kisa-in Pasian’ min ih lawhkhialh khak ding lauhuai penpen hi. Minam a kithupit sak luat ciangin thumaan le Pasian’ ziate kinelhsiah kha pahpah thei hi. Lai Siangtho in a kitaisan thei lo tua Pasian min tawh mivom mikang, numei pasal, sila le to cih bangin minam kideidanna om nawn lo cih thu lim hilh zaw hi. LST sungah “…hih minam nihte khenin gal a piangsak dalna pen Khrih in ama pumpi tawh a satkham hi” na ci hi (Efesa 2: 14).

Jesuh in beh lungsim, nam lungsim bulphuhnate hanga dalna tuamtuamte zong a huamin a satkham ahi hi. Kibatlohnate bei ta hi. Jew mi, Gentail mi, Chin mi, Zomi, Vaimi, Kawlmi cih om nawn lo ding hizaw hi. Tuate taisan ding, tua bang thute bei ta ding hizaw hi. Pawlpi sungah, pawlpi mi ding pen minam tawh kila thei lo a, Jesuh Khrih Tanpa le Topa in a sang thu-ummite tawh kila hi. Pawlpi sungah minam lungsim ih bei sak ding kisam zaw hi. Mihing tawh kipan biaknate ah bel minam vai bei loin, kibulphuh zaw hi.

Tua pen minam vai-a biakna hi a, Christian thu upna tawh a kituak zo taktak lo thuhilhna ahi hi. Pasian taisanna pen mihing kilaitakna le mihing’ thu bulphuh luatna panin kipan hi. Minam laitat thuhilhsyate in Lai Siangtho pen minam ngaihsutna vive tawh suut uh ahih manin, tamvei pi hilhkhial zo uh hi. Tua hilhkhialhna pen mipite in a maan sa uh ahih manin nakpi takin kitamin siat lawh khin zo uh hi.

Tuhun pen ih minam tek panin paikhia-a, ih kibatlohna tua ih minam lungsim ciat suahkhia-in, Khrih sungah ih kipawl ih kituah ding hun hizaw hi. Minam tawh pawlpi phuh pen khial lo-a, ahi zongin minam dang khat pawlpi mi a suah theih nading pen kua minam hiam cih thu tawh thukhen ding hi lo a, Khrih a um a sang mi ahi hiam cih Thu tawh khen ding hizaw ta hi.

Tulai in Pasian’ thulaigil Lungdamna thumaan thutak gente a minam in taisan zaw hi. Nang na delhdelh hangin na minamte in ong taisan hi. Judah mite in zong amau a honkhia ding Judah suan pan ong suak Jesuh taisan uh hi. A minam lungsim hangun a taisan uh ahi hi. Minam vai tawh kisah ah, Judah (or Israel) mite pen Jesuh a um lo a sang lo minam in kiciamteh a, ahi zongin mimal in a um a sang tam mahmah uh hi. Zomi te leuleu pen Jesuh a um, a sang minam in kiciamteh a, ahi zongin a mimal in a um lo a sang lo tam mahmah uh hi.

Judah mi (or Israel) te in a kitaisan thei lo Thu taisan uh ahih manin thukhenna thuakthuak khin zo uh hi. Pasian kitaisan thei hileh thukhenna thuak ngei lo ding uh hi. Taisan thei lo na cih hangin mitampi takin Pasian a taisan mah vevua, khatpeuh in na ci kha ding hi. Tua thu mah a kikum ih hi a, a kitaisan thei lo ding pen mah a taisan teiteite’ tungah thukhenna om ding hi cih a gen nuam ih hi hi. Tua ahih manin Pasian kitaisan thei lo a ci ih hi. Pasian a taisan mite hangin Pasian kitaisan thei hi, cih pen Christian minister khat adingin a gen huai lo thu hi a, Christian te’ theology luanzia ding zong hi lo hi. Pasian kitaisan thei lo a, ih mihing hihna taisan kul (self denial) den hizaw hi.

Kawl biakna makaite in zong minam kemcing thukhun bawl khin ta uh hi. Kum 2015 kum sungin kumpipa in letmat thuh khin a, innpi dawltungnung pan kipsakna kinei khin hi. Kawlte mahmah in Christian suah ding pen Chin minam suahna sa uh hi. Minam taisanna sa uh hi. Kawlte khat Khrih sungah a pianthak leh a nu le a pa, a minam a taisan dingin thukhun a bawl uh hi a, hih thukhun a kipsak suak uh leh nuntak tawntungna kongvang amau le amau a kikhaktan uh hi dinga, thukhen ni ciangin tua amaute’ bawltawm minam taisan theilo thukhun in amaute’ langah tetti hi ding hi.

Bektham loin, Kawlbiakna makaite ii bawltawm minam kemcing thukhun in amau’ minam sung mahmah ah buaina le maizumna tun lel zaw kha ding hi. Mihingte in a mawhna uh tawh Pasian taisan a, Pasian in a thumaanna le a hehpihna thu tawh hong taisan thei lo hi. Thu ong khen veve ding hi. E’n ih taisan hangin ih taisan Pa in ong taisan kei peuh leh a kitaisan thei lo suak hi. Tua thu ih bulphuh leh Pasian kitaisan thei hi cih ngam nading thu om lo hi. Minam kitaisan thei lo ahih leh Pasian zong kitaisan thei lo sem ding hi cihna ahi hi. Mihing in Pasian a taisan leh Pasian in mihing thukhen dinga, Pasian in mihing a taisan leh mihing in thuak ding hi. Pasian na taisan leh thu ong khen dinga, amah’n ong taisan leh na thuak ding hi.

A taktak in cilehang mihingte in Pasian kitaisan thei lo a, Pasian in ong taisan thei hi zaw hi. Mihingte in ih taisan hangin amah Pasian in ong taisan kei peuh leh ih vai a veng lo ding ahi hi. Na mawhna Pasian in ong taisan lo dinga, thu ong khen teitei ding hizaw hi. A mawhna a kisik nuam lote Pasian in a thumaanna bulphuh in taisan tuan lo dinga, a mawhna kisikin Khrih umin a sang mite zong Pasian in a hehpihna bulphuh in taisan tuan lo ding hi. Hehpihna a ngahte in vangam luah dinga, thukhenna a ngahte in hell gam luah ding hi. Hell gam mun pen Pasian’ ong taisanna mun hi ta dinga, ahi zongin hell sung tunna pen Pasian a kitaisan thei lo ahihna a lak tetti hi ding. Hih thu pen Pasian ih taisan theih lohna thu bulpi hi.

Topa’ min hangin mite in hong sang loin hong taisan uh hangin, Pasian in thu-ummi nang le kei ong taisan lo ding hi. Eite in ih taisan phial zongin Pasian in ong taisan ngei lo hi. Tua pen Pasian a kitaisat theih lohna thu ahi hi. Amen! Mite in a zontawm uh pasiante bia uh a, Christian te in amau a zong Pasian um uh hi. Eite in ih zon loh hangin ong zong Pasian ahih manin kitaisan thei lo cihna hi. Eite in Pasian ih taisan zel a, sawmvei zavei ih nungtolh hi. Ahi zongin Pasian in ka tatsa mi bangzah vei a puk zongin ka phong kik ding hi ci hi. Thu ummite in Topa kisaisan zo lo hi. Tua pen ong hehpihna hang ahi hi. Haleluijah!

Ahi zongin lungdamna thudang, tahum gospel thuhilhsya te’ gen “Minam kitaisan thei lo a, Pasian kitaisan thei hi,” thuhilhna pen pawlpi’ thuhilhna a deep sak dingin hun kipiapia ta hi. “Taangte hong po-in a vuih hun ciangin tahum kungte zong hong lianin hong kilang hi” (Matt. 13: 25-26). Hih Lai Siangtho mun’ gen ciangciang hileh phadawm lai a, tuhun pawlpite’ sungah bel tahum kungte hong lianin hong kilang bek hi loin hong deep hi.

Hih tahum khaici (or tahum gospel) thuhilhkhialsyate pen tulai-a limsang khamitna, ciamnuih gualnop thuhilhna, hauzo damzo, hun zang siam tak ei ih cih namte tawh a kizopna uh lian mahmah ahihmanin, Lai Siangtho bulphuh mahmahna, thungetna le Kha Siangtho’ lamlahna bekmah tawh a kidal zo ding ahi hi.

(Limsang cihteh Tuiphum sungah zong om, AG sungah zong om, UPC sungah zong om, RC sungah zong omte huamkim a, Tuiphumte, AG te RC te UPC te Limsang ahi uh hi cihna hi lo hi) Evan. Suangh Dal