Zomi Siamsin Kipawlna panin ZRA vaitawh kisai Thukin Tangkona
19 April, 2018 :: Zomi Siamsin Kipawlna, Universities – Myanmar in AD 2011 pan kipanin Siamsin Medical Trip kipai den hi. Zogam sung kizopna lampi haksakna, Khantohna ziakaina, Zato tawh kigamlatna munte ah kum khatin khua khat bulphuh aa na kisem in, tua khua kiim aa om khuate zong kisamin Siamsin Medical Trip kumsim kipai hi.
2011 kumin Buanli, 2012 Suanghoih, 2013 Salzang, 2014 Pimpih, 2015 Langzang, 2016 Guasing, 2017 Haiciin leh 2018 kumin Tauleng khua ah kipai hi.
Zomi Siamsin Kipawlna ,Universities – Myanmar in AD 2010 pan kipan Kawlgambup Siamsin makaipite thu kikupna Siamsin Summit kumsim kinei den hi. 2010 kumin Mandalay, 2011 Yangon, 2012 Kalay, 2013 Hakha, 2014 Pimpih, 2015 Langzang, 2016 Guasing, 2017 Haiciin leh 2018 kumin Tauleng khua ah kinei hi.
Zomi Siamsin Kipawlna, Universities – Myanmar in AD 2011 pan AD 2018 dong Siamsin Medical Trip paina ah
- (i) Cina velna (cina & ha)
- (ii) Uham thusinna
- (iii) Naupang pattahna
- (iv) Khuasung mite nuntak khuasakzia leh kisapnate dotna (Survey)
- (v) Nitaksim a theihhuai cidamna, pilna, gamvai leh khantohna thute genna kinei hi.
AD 2018 kumin a (8) veina Siamsin Medical Trip Tauleng khua ah April 14-16 sung kinei hi. April 15 ni zan lametloh laitakin ZRA hi ung, akici maituam bulh uniform silh thautawi honkhat Tauleng khua hong zanlutin khuasung lamka bomte pan mi amuh peuhpeuh uh leh Siamsinte, Siavuante zinbuk sung dongah thaukeksa ngatin hong thawmvau gawp uh hi.
Tua bekthamlo-in Resource Person khat zong gamsung ah samkhia-in satgawp banah a nuntakna abei dingzah dongin thau tawh kaplup sawm uh hi. Hih bang buaina haksatna, kilin phawnna kawmkal pan Siamsinte in sepding bawlding geelna omsa bangin kisem veve hi.
More: Kim Tuang vaitawh kisai ZRA panin Statement khahkhiatna
Hihbang thusia hangin Siamsin mailam kalsuanzia, nasepzia ding vai tawh kisai a sawtlo-in Siamsin makaite, Siamsin Senior te, thudotpite leh Zomi sunga muan le suan makaipite thu kikup khopna (Consultation) kinei ding hi.
Zomi Siamsin Kipawlna
Universities – Myanmar
zoheisa says
Aw hidan himawk maw guai?