Australia, Adelaide ah Zomi khat mawtaw tuahsia in hongnusia (Mangpi, kum 42)

Australia, Adelaide ah Zomi khat mawtaw tuahsia in hongnusia (Mangpi, kum 42)

Update: Mangpi pen amin taktak PAU LIAN MANG hi a, nungkum November khasung in Malaysia ah zinin zi neihi. Azi minpen HOIH KIM MAN hi a, tulaitak azi pen Malaysia, Subang vengah om hi. by: Thang Hawi

Australia gamsung Adelaide, Port Wakefield ah Zomi khatin mawtaw tuahsia in hongnusia cih kiza hi. Tua hongnusia Zomi pen amin Mangpi cihciang bektawh kithei a, amahpen Salisbury khua ah ateengkhat hi ci’n Daily Telegraph te’n genkhia uhhi. Mawtaw akiphukha pen 3 tak hi in, mawtaw tezong avekin naksiat mahmah hi.

Mangpi pen kum 42 aphakhin khat hi a, Port Wakefield, Augusta Highway lamzikpi tungah nasem kuandingin apailaitak in ak bekbek apua Truck mawtawpi khattawh ki maiphutkha uhhi.

Mangpi pen Mitsubishi Sedan mawtaw khattawh amahguak atuang hi a, aki phutkhakna aphual ah sisuakpah hi.

Police te pulakna ah Wednesday zingsanglam 6am hunpawl in Augusta Highway tungah thupiang ci uhhi.

Mangpi ii hawl Mitsubishi Sedan tawh aki maiphutkhak masa pen Truck mawtawpi hi a, tua ahawlpa zong nakliamlua mahmah ahih manin Royal Adelaide Hospital ah vanleng tawh kipuak pahhi. Tua Truck Driver papen kum 43 aphakhin khat hi a, amahpen Tanunda khuasung ah ateengkhat ahihi.

Truck mawtaw sungah ak bekbek akigawm in 3000 val akipua hi a, mawtaw tawh asungah akipua ak khempeuh avekin kangtumgawp hi.

Mangpi ii mawtaw nungah azui adang mawtaw khatzong tuahsiatna ah kihelkha hi. Tua mawtaw sungah mi 4 atuang hi uh a, mi 2 pen Chin State pan hi in, adang mi 2 tepen namdang kici hi. Tuate zong avek un liam uh a, ahi zongin sihlawh liangdingin huaisia samlo uhhi.

Hih mawtaw tuahsiatna pen huaisia mahmah ahih manin, Northbound Traffic te ki khakcipsak in, Balaklava leh Copper Coast Highway ah kitawnsak hi. Southbound Traffic tepen Nantawarra lamah kitawnsak hi.

Tuahsiatna aphual ah bangcibang taktak in tuahsiatna piang cih asitcian dingin “Major Crash Investigators” te kipanpah uhhi.

More: India ah mopawi pawisiimding apai mawtaw khat tuahsia in mi 25 si

Mangpi vaipen Facebook tungtawn in pawlkhat akizakna ah amahpen voksasai, vokgawhna ah asem kici hi. Nungdiak mahmah inzong Malaysia ah zineiding in apai ci a, tulaitak zong azipen Malaysia ah omlai hihtuak hi. Athu ala akician in atheipeuh in Comment pan ahi zongin ki Update totoni. Sawltak #zomidaily