Kim Tuang vaitawh kisai ZRA panin Statement khahkhiatna

Kim Tuang vaitawh kisai ZRA panin Statement khahkhiatna

HILHCIATNA (19th April, 2018)

Nimit 15th April, 2018, nitak a Tauleng khua a thupiang toh kisai in Eastern Command, Zomi Revolutionary Army (ZRA) in thu hilhciatna hih anuai a bangin kong bawl uhi.

Pa Pau Kim Tuang in Eastern Command, ZRA pen a taktak in omlo hi, athu bek a om hi, ci-in a kampauna kiza kik koikoi a, tua bekthamlo-in social media te ah zong tam veipi mah na pulak koikoi lai hi. Hih thu tawh kisai-in thudik teltakin kam mahmah tawh ahi zongin, leh media tungtawn mahmah in zong thuhilhna tamvei pi mah na kinei hi.

Ahi zongin, hih thuhilhnate thusimlo ahih manin, sawtpi pek panin thagum tawh thuhilhna hunlem masa pen a neih dingin zong phasakna na kinei hi. Hih hunlem masa pen nimit 15th April 2018 in Tauleng khua-ah hong om ahih manin, phasakna sa bangin thuhilhna a kinei ahi hi.

Hih hun pen Zomi Siamsinte in Tauleng khua ah Free Medical trip a neih ni uh tawh kituakkha citciat se ahih manin dahhuai kisa mahmah hi. Hih bang thukimna sa sepkhiatna tawh kisai hi a, Zomi Siamsinte simmohna leh neu-etna hipeuhmahlo hi, cih kong gen phapha uh hi. Tua ahihman in Zomi Siamsin te, nu leh pate, khua leh tui, u leh nau kuamahpeuh in lunghimoh leh patauh hetlo dingin kizasak hi hang.

Zomi Siamsinte in Free medical trip kumsim a kinei pen, Zomi mun tuamtuam a omte, a diakin khua gamla a teengte, a dingin phatuamna lianpi nei hi cih kimuthei ahih manin Eastern Command ZRA zong na ki-angtangsak mahmah in, na lungdam mahmah hi ung.

More: Zomi Siamsin Kipawlna panin ZRA vaitawh kisai Thukin Tangkona

Tua ahih manin, mailam hunah zong kuamahpeuhin Eastern Command, ZRA gamtatna toh kisai thucian tellopi in mawhsakna thu na suahlo dingin kizasak hipah hang. Tua banah hih bang thu pen limhtak ngaihsutna a kineihkhit ciangin a kisem khia ahih manin nautangte patauhna dingin na ngaihsun kha nawn kei un. Tua banah social media leh Internet te ah zong a kisaipihte theihpihna kihello-in thu-leh-la tuamtuam na khahkhia nawnlo dingin hong zasak phapha hi ung.

(COLONEL JOHNSON)
Eastern Command,
Zomi Revolutionary Army