Mitmuh tawh khentat pah kei in! ~ Nk Khanno

Mitmuh tawh khentat pah kei in! ~ Nk Khanno

Leitung aa sang hoih minthang mahmah khat ahi Havard sanginnpi’ Pawllutang pa tawh akimu dinigin nupa kopkhat pawllutang zum ah hong lut uhi. Pawllutang pa zumkhan aa lai-at nu in hih nupa te a et ciangin etpi na ding a silh a ten te uh hoihlo in, tual puan bang peuh a silh ahih manin thupit simlo in pawllutang pa tawh na kimuh nop vua leh ngak kha ding, hiah tu unla ngak vo” ci’n aw tol tak in vaimuak hi.

Nai 1 khit bang a sat ciangin lai-at nu in pawllutang pa sap sak nailo hi. Pawllutang pa sap sak kei leng hihmite ciahkik lel un teh cih ngaihsutna tawh na sep san hi. Silh le ten a hoih a nasia tak tawh hong pai mite ciangin awkhum tak tawh vai muak in pawllutang pa khan sungah puak pahpah hi.

Papipa in bel thukizaksakna laihawm khat sim in tu hichiat hi. Nupi nu in nui hiuhiau sa in tua zum lai-at nu nuih san phei zel in. A tawpna ah lai-at nu in muhthadah sa lua ta hiam om thei nawnlo in pawllutang pa a va gen leh pawllutang pa in zong hong luttum sak o ci’n vaikhak in tua nupategel pawllutang pa zumkhan sung lutkhuan ngah ta uhi.

Zumkhan sung a lutsuk khit uh ciangin maipuam tak tawh sal gega sa in “bang thuphamawh om ahia?” ci’n Pawllutang pa in dong hi. Nupi nu in “aw tua kong paina uh pen hi bang dan hi. Ko tapa khat bek ka neih uh pen sanginnpi (university) ah kum khat a kah khit ciangin hong nusia vat hi. Tua ahih manin ko nupa in ka tapa phawkna bawlna in hih sanginnpi ah na khat peuhpeuh bawl nuam ungh” cin hong dawng kik hi.

Pawllutang pa zong lungkimlohna awging tawh “Hih sang ah kah cih na hangkhat tawh hih sanginnpi ah marn khat ahizong, suanglim (statue) khat ahi zong hong koih saklo ding hi ung” ci’n gen vat hi. Tua panin Nupi nu in zong “Tua dan hilo hi Siapa aw, sanginn khat a lam nuam ka hi uhi.” ci’n hong dawngkik hi.

Tua panin pawllutangpa in zong a mitte telela sak in amaute puansilh nikteente a en pah hi. Tua khit ciangin “Sanginnpi khat lam ding cih pen sum a tul a then aa bei cih na thei uh na” ci’n etnau na kammal tawh hong dawng kik hi.

Tua panin nupinu in a pasal kiang ah houa khiankhian in dollar awn khat val bek khawng bei ding ci. Ei sanginn ding ei man lam lel ni ci’n hong ciahkhia kik uhi. Sanginnpi pawllutang pa in bel tuni a bang ci mite tawh kimu kha ka hi tam maw ci’n a nua ah phunphun san hi.

A zingciangin thuthang laihawm sungah Billionaire mihaupi nupate ahi Mr and Mrs Leland Standford te in Standford sanginnpi lam ding uhi cih thuthang a muh ciangin zani sun aa a kimuh pih nupate pen mihaupi ahih lam nungphawk san in kisik kik mahmah hi. Standford sanginnpi pen 1891 kum in kihong hi. 1930 kum dong amawkna in lai kisin thei lai in, tua khit kumte ah sanginnpi lut man, tuition fees cih te kidong ta hi.

Laibu mai et bek tawh hih laibu manpha maw manphalo cih kikhentat theilo hi. Tua mah bangin mikhat i a puatham kizepna te bek etziauh na tawh tua mihing i manphatna hauhnate thupitna te kikhentat theilo hi. Mi neumuhna pan ki kem ciat ni! Sung maw, Pua, Nang koi thupi sak zaw? Nk Khanno (14.9.2014)