China, Shopping Mall ii setkahlei in naupangno khat akhut zialkha

Video: China, Shopping Mall ii setkahlei in naupangno khat akhut zialkha

China, Hunan City sung aom Shopping Mall vanzuakna innpi sungah innkuankhat hunnuam zangkhawm dingin hong vakkhawm liailiai uhhi. Tualaitak lamet hetloh laitak in atapa uh kum 2 bekbek aphapan pen setkahlei (Escalator) tungah akhut zialkha in aban dongah tumsuak cih Xinhua News thuthang pan kiza hi.

Tuabang in tuahsiatna apianhun laitak pen CCTV paninzong Video Record kibawlkha hi. Tua Video aki etkik ciangin tua naupangno kum 2 aphapan pen Escalator tungah anu tetawh atuangkhawm hi a, thakhatthu in anunglam ah tuksukvat hi. Tuaciangin akhut pen Escalator kawmkal ah aset in zialkhawmsuk a, anu in adohkhiat saksawm hangin dokkhiathei nawnlo hi.

Tuabangin naupangno pen Escalator tawh anuailam ah kumsuksuk in, tualaitak amukha Security Guard khatpa hongdiangphei in, amanlang in Emergency Stop akici setkahlei akhawlsakna hong mekpheithei bilbel hi. Tuahun laitak in setkahlei Escalator pen anuai akhephung tungsuk dekkuanta hi.

Naupangno ii akhut pen setkahlei in asunglam ah zialtumsuk in, ki lakhiathei paknawnlo sawnsawn hi. Firefighter te’n nailang sungbang buaipih mahmah uh a, nailang sungbang aki buaipih mahmah khitciangin naupangno ii akhut a awkcip pen ki hemkhiathei hi. Tuaciangin naupangno pen amanlang in ageinai aom Hospital khatah zatui zaha Medical Treatment kibawlding in kipuakpah vingveng hi.

Hih tuahsiatna ah amanlang in akhawlsakna Emergency Stop amekthei Security Guard papen thupi kisa mahmah hi. Azenzen in tuapa in amanlang in nakhawlsak theilo hileh naupangno pen setkahlei tawh kizialgawp in, nakliam mahmahding kici hi. Hih naupangno pen akhut bangzahciang liamngawh cihpen thuthang te’n akician in pulaklo uhhi.

More: Italy gamsung meileng khawlna ah setkahlei (Escalator) nawhtaigawp in mi tampi liam

China gamsung ah hihbangdan Escalator tuahsiatna pen kizaknawh mahmah a, asi aliam zong kizathei zelzel hi. Adiakdiak in naupangno tawh akithuah nulepa te’n hih thuthang te lungngai kawmin, khuasung Shopping Mall leh Escalator akizatna munte ah ihvak ciangin ki dopsiamding thupi mahmah hi. Naupangno tepen Escalator tungah amauguak in paisaklo in, anu apa te khatpeuh in alet tawntungding thupi mahmah hi. Sawltak #zomidaily