A kikhel Kawlgam Media nasep le Zomi ~ Zam Thuam

A kikhel Kawlgam Media nasep le Zomi ~ Zam Thuam

Gam khat a kidin leh tua gam ah thunei mi om hi. Tua thuneite in thuneihna thum ahi ukna, thukhun bawlna le thukhenna cih ahi hi. Democracy gamte ah hih thuneihna thumpen mipi tel mite in hawmin len uh hi. Ukna a len pawl, thukhun bawlna alen pawl le thukhentheihna alen pawl ci in gamvai mipil ten gamkhat a dinna ding akisam khuampi thumte ci uh hi.

Tua teng banah gam khat a din nading akisam khuampi lina cih khat hong om lai hi. Tua pen media ahi hi. Media i cih pen thu kitheihsakna ding palai cihna hi in, Democracy gam picing khat hih nangin hih media suahtakna kisam hi. Hamsatna tampi nawkto in a picing democracy gam khat hih ding a manawh Kawlgam sungah zong aciangtan hun hong naih toh tawh kizui in democracy i a lim a hi media suahtakna zong nasiasak semsem ta hi.

Media cih ciang radio, TV, newspaper cih pan kipan internet, laibu cih dong ahuamto ahimanin magazine, journal cihte manman asimkhat in a nipi sim, a khasimin akikheldenna kimu hi. Zomiten a zakding na ngawnin a kihtak gamvai tawh kisai pilna te zong a kim a pam sukhalo in gelh ziahziah ta uh hi.

A olzaw kammal khatin gen leng thunei lamte thanem hang a piangthute caarton tawh hong lak kiaukiau theita hi. Hih thute a Hunthak le Khangthak 12 mukhate in tuma kha guk lai leh tu kikal kikhelnate telpha mahmah ding kong um hi. Suahtakna lam amanawhkik Kawlgam media hangin mipil tampite in gam ading lametna hoih tampi nei uh hi.

Zomi sungah ahihleh media pen thuthang, thuthak nengnengzak nading bek inlamen kha pan i hiam ci in khatveivei ngaihsun ing. Gam khat a dinna ding akisam khuampi lina in i ngaihsuntheih nailoh khak ding lauhuai hi. Media thahatlo lua i hihman hiam? thanemna khat peuhhong kikawk leh khasia nuam thei hi hang.

Na hihna bag tungah hong kigen a, na thuakzawhna in mipi lungsim (civilization) na neihna ahi hi. Tua bang thute na thuakzawh kei leh a picing democracy tawh na kituak nailohna thu lungkimtak na santheihding hong kisam ding hi. A diakdiak in i zahtak mikhat in thanemna lianpi a neih pen kithei ciat ci ni. Aih hang tua thu a matung va hilh ding pen nuam kisalo hi.

Za kiatna ding zong hi kha thei ding hi. Tua thupen a pualam mikhatin hong genkhia leh a khialh lam hong kithei ding a, maizum in a heh hang a septheihna pualam ahihna tawh tuapa tung bangmah nawngkaisak theilo ding hi. Tua hi in gamkhat hihtheihna ding khuampi lina a hi media in ahihleh a piang thutebek genkha ding a, a ma ngaihsut tawm lungsim puakzia te tawh cikmah hun in thu a genkhiat loh ding kisam leuleu hi. Zam Thuam