Selayang vengsung damaih ataih Myanmar gammi 3 te amin ki pulakkhiata

Selayang vengsung damaih ataih Myanmar gammi 3 te amin ki pulakkhiata

Malaysia, Selayang vengsung ah zanni in Durian azuak pasalkhat damiah kitaih in ahiamkhattawh ki dawtliamgawp hi. Tua adawtliam damiah te lakah khatpa kimankha in, tuapapen Myanmar Refugee gambel khat nahi sawnsawn hi.

Hihvai tawh kisai in Sentul OCPD Asst Comm R. Munusamy in tuni in agenkhiatna ah damiah te lakah aki mankhapa pen limtak in thusitna kinei cihi. Tua damiah akimanpa thusitna akineihna tungtawn in alawm aki thuahpih damiah tepen Myanmar gammi vive cih ki theikhia hi.

Zanni Tuesday (June 17) ni in buaina apiankhit ciangin damiah khat ki mankha a, tuapa pen thusit, thudotna “Interrogation” hoihtak kibawl hi. Ama tungtawnin aki theihkhiatna ah alawm aki thuahpih damiah tepen kum 20 gualpawl vive hi uh a, nasepzong aneimel kuamah omlo uhhi ci’n Sentul palik thuneipa in genkhia hi.

Tua aki thuahpih te lakah ataimang ami kiciantak in akitheikhia tepen amin Farok leh Ali kici a, tulaitak Police te’n matdingin alimzonsan mahmah laitak uh ahihi.

Hih damiah tepen Malaysia gamsung ah atawmpen kum 2 peuhmah omkhinding uhhi ci’n Sentul police headquarters ah tuni Wednesday ni in Reporters te tungah gencianna kineikhia hi.

Hih buaina apianna munpen Pusat Bandar Utara Selayang vengsung aom mawtawlui akizuakna mailian ah ahihi. Durian azuakpa pen akidawtna nakliam mahmah in, sitawh kidim zihziah hi.

Durian azuakpa pen kum 23 aphakhin khat hi a, innpan in Durian singgah zuakdingin apaikhiatzawh asawtlo in damiah atuak ahihi. Tua damiah tepen gamdangmi 3 cihciangtawh zanni in ki genkhia masa a, ahi zongin avekun Myanmar gammi Refugee vive kicita hi.

Damiah mi 3 te’n Durian Seller pa asum neihteng asuhsawm uhciangin Durian Seller inzong na lehbuankik hi. Ahi zongin Damiah te’n Screwdriver tawh tamveipi na dawtliamgawp uhhi.

Hih buaina apian hunpen Tuesday zingsanglam 7:30am hunpawl hi a, khuasung mipi te leh Police te’nzong mukha uh kici hi. Ahi zongin Police te’n avek un banghangin aphual ah mankhiapah ngamlo uhhiam ci’n Malaysian Netizens te’n Online ah ciak ngeingai uhhi. Tuaban ah gamdangmi Refugee te agamah avekun puakkik mengmeng un cihbangdan Comment zong tammahmah a, Myanmar gammi tepen hongki mudahtuam mahmahding himawk hi.

More: Selayang vengsung ah Malaysian gammi Grab Driver athatlum Myanmar numei khatleh pasal khat kiman

Ataktak in tua damiah tepen Rohingya tepawl hihtuak a, ahi zongin Myanmar gammi cihtawh hongki bulhziau ahih manin, adiakdiak in Selayang vengsung aom Zomi te vaksuk vaktohna ah kidop siamding thupi mahmah khading hi. Nungdeuh mahmah inzong Selayang vengsung mahah Myanmar gammi te’n Grab Taxi hawlkhat damiah taihin thatlum uh a, tuazawh asawt hetlo in hihthusia aki zakbehto leuleu ahihi. Sawltak #zomidaily