A lamdang vanzat
Tuipi tunga khualzinte lakah, “Mutiny on the Bounty” a cih tembaw khat pen a minthang mahmah hi. Tua tembaw tungah Bligh a cih pa pen makaipi, (Captain) ahi hi. A gitloh luat manin a nungzuite kipawlin a langpan uh hi. Tembaw neu khat tungah a mah leh a mah a pawlpih teng a khakhia uh hi.
Langpang lamte in tembaw a ngah zaw uh hi. Tua bangin a paipai uhleh New Zealand leh South America kikal, Pitcairn tuikulh a tung uh hi. A tembaw ‘Bounty’ pen a haltum uh hi. Tua tuikulh-a teng mite pen gilo mahmah uh a, kum 10 a phakin tua langpang mite khat bek om lai-in a dang teng tuikulhmite in a thatlum khin uh hi. Tua a om lai pa pen Adam a cih hi a, a lawmte kithat khinin a mah bek a nungta lai ahi hi.
Nidanga a tembaw hal’ uh sungah singkuang hoih sim khat om a, tua sungah Lai Siangtho bu khat a om hi. Tua Lai Siangtho pen Adam in a sim’leh a piangthak ngiau hi. Tua banga a pianthak ciangin tua tuikulha teng mite’ lakah Pasian thu a hilh pah hi. A sawt lo-in khanlawhna piangin, tuikulh migilo hontang teng a piangthak khin-gai hi. Pasian in zatmawh khat beek zong a nei lo ahi hi.
GUI-AWK LO KIK
Khatvei Mark J. Goodger a cihpa in South Carolina ah Lai Siangtho kammal kigelhna laidalno (tracts)a hawm hi. Innkhat a lutna ah innteekte sapna, konggei-a ki mek siklong a mek hi. Kong kihong theilo ahih manin, huging a zak mateng a mekmek hi. Tualeh thakhatthu in kong hong kihong ngawh gawpin, innteekpa nak heh lua mai hi. Lai hawmpa in zong a laidalno a piakleh sut-ngawh gawpin thakhatin kong a kikhak nelh kik pah hi.
Goodger’ maitang nangawn kong khak in a vatgawh kha lai hi. A kal kik ciangin laidal hawm mahin tua inn mahah va pai leuleu hi. Tua ni-in kongkhak manlang takin kihon ziau hi. A kal masa-a Goodger in a tracts hawmin, tua innkong a honpak lohna pen, amah leh amah a gui-awk lum dingin a kithawi laitak a na hi hi. Tua a laidalno(tracts) a sim phot tadihleh tua hunin a na piangthak pah ahi hi.
KIPUMKHATNA IN SUAHTAKNA
Kum 1964 February kha 29 zan-in Russia gama Khristian mi 150 te pen Barnaul khua-a Alexander Gusheinte’ inn ah a kikhawm uh hi. Thakhatthu in galkapte hong lutin hawlkhiat mang a sawm’leh ut hetlo mawk uh hi. Mat a sawm’ uhleh, “Ka vek un teeksia, naungek dongin hong man khin vet un, ko pen innkuankhat ka hi uh a, ka kikhen thei kei uh hi” a ci uh hi. Galkap mangpa in tuate enen a, “Hihte in thusia phuang kei buangun teh” ci-in a nusia lel uh hi. Tdkhen
Comment piaknop aomleh...