Ka muhpak US Gamthu pawlkhat (26) ~ Awn Za Pau
Siangtho Mahmah Sa Ing
Kum 1983 kum Japan ka om lai in muntampi mah ka pha kawikawi a, department store khawng ah awngpaina (toilet)te siangtho mahmah in a om tei hangin khuasung veeng a tuamtuam a, adult picture kilahna cinema te ah a zunbuk a awngbukte ka va pai kha ngei a, siangtho lo in zunning mah nam henhan keei hi.
Tu hun ciangin amau kiangah zong siangtho khin ta lel maw, kibang lai maw cih bel ka thei tuan nawn kei a, USA ah pen amau inh ‘restroom’ a cih uh awng paina khempeuh siangtho sak sitsetin a gimnam zong kiza kha peuhmah lo hi. Kawlte pau leh a gik a za-angg pai sial in satpiangtui tawh a neu a lian in khut kisil tangtang hi.
Ahi zongin hi lam ah laipaa vive zangin tui na kilimzat hetlo bilbel hi. Ei tui zang photte adingin tui bek mah tawh siangtho zaw lai hi. Narita International Airport terminal ah khat vei awng ka pai a, tui tawh sawpna ding ci in hong kilahna bang a button ka meek leh ka taw ah lit ahih keh gulno khat peuh hong tum ding bangkhat in zeklua in (ka taw zia lua in) tawmvei sung ka ka ki-iip keeikaai hi. A sawtteh bel kingeinaseh ding dan bel hi veve hi.
Kawlgam ah kumpi nasem a ka om lai in ka vuanzipa a gik a hi a, a za-angg ahi zongin awng pai leh hong pusuah kik ciang a, a khut nul thuahna ding bang a pia masa nuam ka AEte uh a ki-tuh zawzen uh bang lo in, hih lamah a neu alian a kuamah peuh zattaang theih dingin kikoih pikpek a cidamna tawh kituak pha mahmah hi. Ngaihsut lah siam in mi khempeuh a’ding zong khual zo mahmah kicing sak zo mahmah ka sa hi.
Ei lam ah hi lam bang a, a zang taktak miliante a vuanzi za cih piante zat bek hi mawk tazen hi. Toilet (hi lamah rest room ci uh) pai khit sialsial a saban tui tawh khutsil tangtang ngiat pen mikim a’dingin sianthona pi pen khat hi a, cidam huai mahmah hi. Tua bek tham loh in zum sungah lungno khat peuh hong lut kha in teh cia upmawhna na neih sial aa khutbom nuh ding ‘hand sanitizer’ ci in khut bom nuh ding a baihsa in kikoih hi.
Asia gam sungah Singapore khuasung a siangtho pen dingin kigen hi. Tua mah bangin a khua sungah “ Nang hang’ in khuasung nin sak kei in. Tua bang aa na nit sak leh dan Singapore $ 10,000 hong kigaamh ding..” hi cih bang in kidop nading lai (caution sign) tampi tak kisuang hi. A hi zongin hih lamah tua bangin signboard khawng suan kul nawn se lo in a mipite in tel khin gai lel uh aa, a inn sung inn pua bek hi lo in a khuasung uh siangtho sak thei mahmah uhhi. (azom omlai hi…) Agelh: Awn Za Pau
Comment piaknop aomleh...