Minam lian (khen nihna) ~ Thang Khan Mang

Minam lian (khen nihna) ~ Thang Khan Mang

Leitungah pau nam 7000 bang om hi. (National Language laibu). A khasiat huai mahmah khat ah ni 14, kalnih, khalang ciang in pau namkhat ta bei hi. “2100 ciang in alang bek omlai ding hi” ci’n paulam thukansiam te’n gen uh hi. Hih 7000 lak ah ei Zimi te zong khat hihang.

Zomi te tangthu tawh kisai in tangthusiam te genna kibangkim lianlo hi. Kei’ ngaihsutna leh kei Philo ah, hunkhat lai aa kipan Zomi cih kiom ahihman in tuni in kei kaom aa nangzong naom hi. Nanglehkei Zopau in ihpau aa Zopau tawh ih biak Pasian ihphat hi. Pasian in nanglehkei Zomi in hong piangsak aa Zomi ding in hong tawisang hi. Nidang in singnuai gamkawm khat ah Zomi te ihteng aa tuni in leitungbup tuam’in ih tengta hi. Pasian in namlian te lakah ama nasem ding leh ama hoihna pulak ding in gamnuam ah hongkha hi.

Laisiangtho sung ah,“ lonona ah kei hong paipih hi” ( late 23:2). Minam lian te bangmah in innhoih nono sung ah hongtengsakin pilna sang pipi te hong sinkhawmsak hi. Nasep hoih, nasep lian pipite alen thei ding hongsiam aa China, Japan, India, American te tawh sumkibawl khawm ziahziah thei ta hi.Tua ahihman in Zomi te pen abeibei ding te ih hikei aa akhangkhang ding te ih hihi. A kiam kiam ding te ih hikei aa akahtoto ding te ih hihi. Minam lianpi ihsuah dong kahtoto ding in Pasian in geelna hong neihsak hi. Laisiangtho sungah, “ama min ading in thuman lampi ah kei hongkha hi” ( Late 23:3) acih bang mah in thumaan na leh cihtakna ih khahsuah kei ding aa Pasian thupha piak minam ih hihna leitung buptuam in ih tangsak ding hi.

Tuni in Minam lian thulu nihna konggen kik nuam hi. Tuni thugen ding pen khenpi nih in ihkhen ding aa abeisa theihhuai tangthu te leh mailam kalsuanzia ding cih thunih i gen ding hi. Banghang in or bang ngimna tawh Zomi namni kibawl hiam?

Zogam tangthu tawh ki sai in,

1885 ciang in kawlkumpi te’n hongsim uh aa gam pawlkhat hong laksak uh hi. Mundang khat ah 1882 ki ci hi. 1890 ciang in Kawl te khutsung aki tung khin ta hi. 1896 ciang in amau aa ki hita hi.kum 10 sung bang sawt hi.

Ihpu leh ihpa te’ in gam kiukna law/ thukham neiloh uh hang in ngeina leh thuzuih kinei in tua te kiptak nalen uhhi.1907 kumciang in British ten thugui leh thukham hong bawlsakin tua tawh gamsung kiuk hi. Gamhuam neuneu te auk ding in ukpi te hong koihsak uhhi. Tua ahihman in ukpi te’ hun cihkhat ih tangthu ah kinei hi. Hoihpen kisalo in 1928 kum ciang in Mindat, Matungnung khua ah gamvai kipawlna thak khat kinei’ in tualai ah “suahtak theihna ding” cih thu kiphongkhia hi.Tua thu hong khang semsem in 1939 ciang in British te’ tung ah thu nam 9 kingen hi.

1947 kum, Burma in British khutsung pan suahtakna hongngah ciang in Parliament nih, Upper leh lower ( tung leh nuai) hongom hi. Tua parliament ah Zomi te tang ding, akihel thei ding kiteelna 1948 kum Feb 19-22 sung in Falam khua ah kibawl hi.Tua bek thamlo in tua kihoppi ah thunam 6 nasiatak kikupna kinei hi. Tua lak ah “ ei leh ei gam khat aa din zawh na ding leh No minam ni cih thunih tuni ngaihsut ding thupi ka sa hi. Ih pu te’n banghang in Zominam ni na lunggulh uh hiam cih leh,

• Nuamtak kipawlkhop theih na ding
• Mipi deih Democracy kiukzia akip zawh nading
• Zomi sung ah thumanna ( justice) leh (Equality) mimal kim kikim in kihuai kidon zawh nading

Hih thu 3 hang in Zominam ni hogn phongkhia uh hi. Zomi namni neih ding lunggulhna pen khat leh nih bek thukim na puehmah lo mipi 5000 lak ah 4993 lungkimna tawh vote kila in “Zomi namni” cih leitungah hongsuak khiahi.Tu ni in Zomi namni pen kum 65 bang upa ta hi. Ahizong Zomi te in ih biak Pasian ih neihlai teng Zomi namni teek ngeilo ding hi.

1. Nuamtak kipawlkhop theihna ding

Kammal dang khattawh gen leng hih pen, ” ki pumkhatna”cih hi. Abeisa leh tuni mahmah dong Zomi te kitangsap alian penpen hipah hi. Kipumkhat cihciang in vekpi in kibangkim cihna hi pahlo hi. Khatlehkhat kitelsiamna, kisansiamna leh khantoh theihna ding deihna tawh kilamdangna te gawmkhawm, hualkhawm cihna hi zaw hi. Mang pau ah hih kipumkhatna sung ah “Harmony” cih kammal khat nazang uh hi.

Nam tuamtuam om mah taleng tua te “kihualsak” cihna hi. Guiter khauizang kibanglo zaang 6 pen amau gin ciatciat tawh kihualkhawm sak cihna hi. Zomi sung ah phunglehbeh, nam tuamtuam kiom ngengai mahtaleh kilamdangna khempeuh kikhualkim, kidomkim ding leh kilam kimding tuampaih leh neubawl cih omlo ding cihna hi.

Zomi te kipumkhat nading pan hong dal ihneih natna bang teng hiam?

Zomi sungah kikawmna, khualehmual ten honghal in paulehham, awkaih te kidang ahihman in tua in hong midang ngaihsunsak hi. GTN: Spanish pau pen leitung ah gam 20 bang in kizang hi. Gambup pianpih pau aa azang gam 6 om aa gamsung ah munkhatkhat ah azang gam 7 om hi. Gam khatlehgamkhat kiho ciang in pau kibang uh ahihman thulehla khat peuhpeuh vaihawm baihsa tuampah uhhi.

America ah Spanish pau kizang aa gamtuam tek pan hita le uh unaukhat gamkhat bang in kihothei kilawmta thei pah uh hi.Pau kibang lo te tawh kimeltheihna, kilawmtatna leh hawlpih gualnopna hamsa hi. Pauki thei kei leng itna, hehpihna, khualna leh hehnemp nate kihawmp ding hamsa tuam hi.

Tua ahihman in Zomi khatlehkhat paukibanglo, awkaih kibanglo, omna khua kibang lo cih, kibatloh na khempeuh kitelsiam hunta hi. Kipumkhat theih ding kisam hi. Itna in pumkhat hong suaksak ding hi. Tua ki-itna in ih biak Pasian a hihi.

Nungzuisiam kitawmlua

Mangkang te’n paunak khat nei uh, ” nungzuisiam te makai siam te hi” ci uhhi. Ei Zomi sung ah natnalian mahmah khat i nei hi. Hih natna in khanglui khangthak te khuaksung ah lutmangkhin aa minam buppi haaitum mangzo ding zahin thahat hi. Hih natnapen Hiv, Aids hilo, TB zong hilo, Cancer zong hilo, ” MAKAI TE HAWMTHAWH” natna hi. Hih natna banghang hong pianghiam cih leh, “makai khat ahihnak leh bangkim ah picing ding, thei ding, siam ding hi” cih pianpih ngaihsutna pan hongpiang hi.

Tua bangmah in makai te’ lungsim ah pianpih natna lianpi khat omden aa “ken thei kahihman, siampen kahihman, kilawmpen ka hihman, makai sem hing, kei aa hoihpen” cih pianpih natna neiuh hi. Hih pen manlo hi. Zomi te’n ih paunak ah ” kim citciat tangzang kiguang” ci hi hang. Mawhna zonsak ding sang in panpih, puakpih ding kisamzaw hi.

Socrates minthanna lian penpen khat in, “I know that I know nothing” ci hi. “ka theih thukhat om aa tua in ken bangmah thei keng” cihna hi. Makai khempeuh in bangkim theikim tuanlo aa a thei peuhpeuh zong makai suah pahpah lo hi. Nungzuisiam omlo in makai pa nasep gualzo ngeilo hi. Tua bangmah in makai omlo in nasep kizolo zel hi. Makai omlo in mipi te lampial hi.

Khatvei lai in Greek philosopher khat in leivuitung ah limsuia hi. Tua leh midang khat hong pai in, ” Sia aw bang hong huhding kahiam?” ci’n dong hi. Tua leh mipil pa in dawngkik aa ” na kihem in” ci hi. Tua adin munpan kihemkhiat pen mipil pa ahuhna hi gige hi. Makai te ih seppih kei leh langdo lo, nawngkai sakloh ding thupi hi.

Pilna lam kiniamlai lua

Zomi paunak ah, “tuitanglo thuk” ki ci hi. Mipil taktak te kiniamkhiat in kipilsak lo uh hi. Kawl paunak khat ah, “tuidimlo bel kiloh hi” ci uh hi. A thei pian pian te kipilsak se hi.Mi kipilsak ten minpha (credit) zong deihdiak se uh hi. Zong kiphasak pah uh hi.Mipil laklawh te’n midang te neumuh ding lau uh ahihman in mun khempeuh ah makai sem nuam in midangte nung zuinuamlo uh hi. Pilna taktak anei mi tampi kisam hihang. Tua bek thamlo in Pasian neilo leitung pilna tawh pilna sang neite kiphasak in kilian sak uh aa mipi leh gam a ding in milauhuai pitak khat peuh suahthei uh hi.Pasian thutawh piangthak mipil te ahileh kiniamkhiat in gamleh mipi aa ding phatuamna tampi bawl uh hi. Pasian zahtakna in pilna bulpi, kipatna leh Pasian zahtakna in asia pelhna a hihi.(Pau 1:7, 9:10, Late 111:10)

2. Mipi deih Democracy kiuk zia akip zawh nading

Ih pu Ih pa te’n hih thu alunggulh zawh uh kum 65 val hita hi. Leitung hun te hong kikhel in tu’n ih gam ah Decocracy gimnam , kizata hi. Democracy kiukzia ih neih theihna ding in Democracy lungsim leh ngaihsut ih neihkul hi. Democracy cih ciang in, “government by people”, mipi tawh kilam kumpi gam , mipi tawh a ding kumpi cihna hi. Stanford University pan lai at khat in;

1. A political system for choosing and replacing the government through free and fair elections. (Kumpi te suahta tak leh thuman kiteelna tawh ateel thei leh alaih thei gam kiukna)

2. The active participation of the people, as citizens, in politics and civic life. (mipi te gammi lungsim tak tawh kiukna lam leh mipi nuntak zia ah lungsim taktawh kihel theihna)

3. Protection of the human rights of all citizens. (gammi khempeuh te in mihing khat ii neih thuneihna kemcing theihna )

4. A rule of law, in which the laws and procedures apply equally to all citizens. (gammi khempeuh te tungah gamthukham leh thukhun te kikim tak aa kizat na ding)

Hih thuluanzia mipi’n ih tel ding kisam hi. Tuni aa leitungbup tuamaa ihbawl Zomi namni pen hih kiuk zia ihngah, ihzat, ihnuntakpih theihna ding a hihi.

3. Zomi sung ah thumaanna leh mimalkim liangko kikim takaa kikep kikhual theihna ding

Khanglui laipeek in zomi te pen ” mi thumaan te ” cia hong kiciamteh hi.Tanglai dawi ih biaklai in thuman, thutak, mikhemlo, thuzuau genlo te hong kici hina pi’n, tu’n Christian hi ihih ciang Zogam ah thumann om nawllo.Christian ih suahciang Pasian tawh kinai zaw maw, kigamla zaw?.

Zominam ni ih bawlsialsial in Zomi te hongkiciamtehna, “thuman cihtak uh hi” cih ih kemcinglai hiam? cih kidotphat huai kasa hi. Leitung pen Satan gam hi’n zuauthu in aukna gam hi. Tuahihman in zuau phuak theilo te mihai kici ta hi. Ahizongin Topa Zeisu in zuauphuak te Dawimangpa tate na ci hi. Topa Zeisu in, “Keimah in thuman thutak ka hihi” ci hi. Ih biak Pasian in zuaukhemlo hi. Ih biak Pasian khaksuah kei ni. Ihpu ihpa te neihsa thumaan cihtakna khahsuah kei ni.

Zomi buppi in ih lunggulh, Zomi namni phuankhialiang aa ihnget hih thupha lianmahmah 3 pen ih biak Pasian bekin hong pia thei hi. Pasian in ki itna ni. Leitung buppi aa om thukham khempeuh in ki-itna kal hi. Laisiangtho sung ah;” Ki itna in Pasian kiang pan hong pai hi. A it theilo mi in Pasian a thei kei hi. Bang hanghiam cih leh Pasian in ki-itna hi”. 1John 4:9

Late 33: 12 “ Topa , Pasian a anei minam, amaluah ding in teelna a ngah minam te thupha ngah ahihi.”Hih sungah thu nih kihel hi. 1. Pasian anei minam 2. Pasian in ateel minam cih thupi mahmah thugui pi nih om hi. Pasian pem piangsak pa leh Ih biak ding aa ihteel ding kisam hi. Pasian abia mi te bek mah Pasian in ama mituam ding in teelzel hi. Pasian umlo bialo teeltuam lo hi.Hih thugui pi nih ihtel mateng, ih nuntakpih mateng minamlian, thuphangah minam ahihna kipsuak theilo ding a hihi.

Thukhupna:

Mimal kim in Pasian ih zong ciang in Pasian in Thupha hongpia aa thuphangah minam kipiang hi. Pasian azong minam te Pasian in ama luah, ama gaam (neihsa), ama suangmanpha ding in hongteel aa leitung khempeuh ah namdang te sang in tawisang zaw in ama minthan na ding in pilna, huahna, vangliatna leh siamna te guan hi. Zomi namni deihna mimalkim ciat tungah hong tung ta hen.Topa minthangsak minam ih hih zawh na ding Topa’n mimalkim thupha hongpia ciat ta hen. Mangpi (Thang Khan Mang) Miami, USA