Saudi leh apawl te’n Yemen ah mi 60 that leuelu
Oct. 31, 2016: Saudi leh a pawlte – Arab coalition kici ten USte galvan piakte a hoih mah hiam cih sitna neihna dingin vanleng zangin Yemen gam-a Houthi rebels kicite ukna thonginn va kap uh a, mi 60 in sihna tuak a, tuate lakah thongkiate zong kihel hi ci-in uliante leh siavuan ten zan in pulak uh hi. Houthi rebels-te uk sabanews.net in sihna tuak mi 60 pha a, 30 in liamna tuak a, siluangte inn ciim in a vuk khum lak panin lak khiat ding tampi om lai hi ci-in gen hi.
Al-Zaydia district sunga security chief len Abdel-Rahman al-Mansab in sihna tuak a tamzawte pen thongkiate vive hi a, thukham palsat hon khat leh thusitna tuak ding a ngak lai thongkia 115 omna thonginn hi ci-in gen hi. Saudi leh a pawlte kapna thonginn pen dei nih in kikhen a, khat pasalte omna, khat numei omna ci-in kikhen a, tua hun in numei om lo hi. Saudi leh a pawl ten tua thonginn a kap khit un tua mun en in ka va pai leh sihna tuak a kimute pen emsa vive suak uh a, a mel ding uh kithei zo lo hi ci-in gen hi.
Saudi leh a pawl ten a gamtat uh kisiamtan’ nuam in a kikapna mun pen Houthi ten military command leh control centre dingin a zat uh security complex sunga om “central security building” kicihna mun kikap hi ci uh a, galdona mun-a zuih ding thukham “protocols and procedures” kici kizui hi ci zaw lai uh hi. A kap hun un thongkiate leh thongcingte bek om uh hi.
Hodeidah health office director Abdel-Rahman Jarallah in bel sihna tuakte galkap ahi lo tualsungmi (civilians) vive hi ci-in DPA news agencyte kiangah gen a, thonginn ciim in a vuk khum lak panin si luang leh a suakta om hiam cih kizong lai hi ci-in gen hi.
Nung kha in zong Saudi leh a pawl ten Sanaa khuapi ah sivuina mun kap uh a, nautang/tualsungmi 140 val in sihna tuak hi. Nung Kiginnin in zong Salo ah mipi teenna mun a kapna uh-ah mi 17 a sih banah mi 7 in liamna tuak hi. Source: Al Jazeera News And Agencies/ Thang Khan Lian
Comment piaknop aomleh...