Pasian’ Kammal Lungngaihna ~ Pu Thangboi

LST sung ah akideih penpen mun koipen hi’n na um hiam ?
Late 23 hi peelmawh ding in ken ka um hi.
Bang hang in hih ki deihpen aitam ?

– Mihing in ih pian nak leh aguallel, alawh cinglo, milak ah hak ngamlo aa
a om khiankhuan nuam kuamah omlo hi.

– Lonona leh tuikiang ah lum hilhial aa ih galte’ mai ah sabuai pha tawh an
nek hithiat ding khawng ki uttek ahih man aa hih Late 23 aki deihtek hi
kha ngel ding hi.

Inn tung dawl nihna ih tun theihna ding in dawl khatna nawk masak akul mah
bang in hih Late 23 aa kigente ih nuntakna ah hong tangtun theihna ding in
aneu (taang) khatna nawk masak loh phamawh hi.

Late 23 : 1 ah
“Topa pen tuu bang aa kei hong cing Pa hi aa bang mah ka kisam kei ding hi”
ci hi.
Hih kantanlo in anuai aa te kingah theilo ding hi.

“Tuu” suah masak kul phot hi. Topa in tuubang aa hong cin theihna ding in
tuu ih bat kul photphot hi.
Tuu pen biakpiakna tau tung aa ki balnen ding ahi hi. Biakpiakna tau atun
kei leh tuu taktak, tuu gina, tuu sana hilo hi.

Zawhang alian 10 sung ah tuu leh tuu cing Pa’ kizopna thu kician tak in na
gen hi.

1. Tuu te in a cingpa’ aw za in anung zui uh ci hi. (Zawhang 10:4)
– Leitung leinuai aa thupiang khempeuh za in thu na theih mahmah hang na
Tuucing Pa’ Aw na zak nai kei leh sanggam aw dah huai mahmah ding hi.
– A aw za napi in na zuih kei leh zong na nuntakna in khiatna nei nai
tuanlo ding hi.

2. Tuute in midangte’ nung zuilo ci hi (Zawhang 10:5)
– Tuni in bang ii nung zuizui ih hiam ki ngaihsut phat huai hi
– Tuucingpa ahilo adang khat zuizui lai ih hih mawk leh tuu asuak nailo ih
hi pah hi.

Tuucingpa Pasian’ mai ah Tuu ih bat nai kei leh hong cing, hong kem, hong
huai ding a omlo himawk aa ahawlna a omlo mawtaw khat atuangtuang tawh ih
kibang ding hi.

Akuama peuh in “Topa pen tuu bang aa kei hong cing Pa hi aa bang mah ka
kisam kei ding hi” acingam setset ding in Pasian in hong siam hen.

(Tuni 2016 kum October 30 ni Agape Zomi Baptist Church, Dallas Forthworth
pawlpi ah ka thugen kong tomlak kik hi)

Lungdam
Mung Laan Thang
Tawmvei USA