USA, Ohio, Cincinnati School Official te’n abeisa January 24 ni in sanginnsung Locker Room ah kibawlsiatna CCTV Clip khahkhia uhhi. Tua Video pen kum 8 aphapan pasalno khat aki bawlsiatna, simmawhna Video hi a, tua simmawh bawlsiat athuak pasalno pen tuazawh ni 2 khitciangin amahleh amah ki khailum cimawk hi.
Carson Elementary School ah thupiang hi a, simmawh bawlsiat athuakpen Gabriel Taye kici naupangno khat ahihi. Gabriel Taye pen sanginn Bathroom kiukhat ah tukcip in Minute 5 sungbang khuaphawklo in lumcip hi.
Khuaphawklo in alupcip laitak inzong agei panin khetawh kisui, kisik, kituan cihi. Anunung ah School Officials te’n theipan uh a, Gabriel Taye pen honkhia hi.
Ahi zongin Gabriel Taye pen kisimmawh in kibawlsia cihpen anu tungah kuamah in ahibanglian in genlo cihi.
Sanginn ah simmawh bawlsiatna athuakgawp khitzawh ni 2 khitciangin Gabriel Taye pen amahleh amah aki khailum ahih manin, thunei te’n hihvai pen limkansan mahmah uhhi. Alupna inndei Bedroom sungah Necktie tawh amahleh amah aki khailum, Suicide ahihi.
Ki simmawh bawlsiatna leh Suicide ki khailupna ki koicizop cih limtak in kikan a, kizopna kiciantak in aki muhkhiatleh sanginn ah abawlsia tezong mithat ci’n “Criminal Charges” kibawlding cihi.
Video etnopleh: Protesters believe 8-year-old was bullied to death
Naupang kum 8 aphapan khat amahleh amah ki sihbawl, ki Suicide cihpen lamdang leh up haksa mahmah kici hi. Ahi zongin hih naupangin bangzahtak limsim natna nei cihpen sikhin tamawk ahih manin kuamah in ki gencianthei nawnlo hi.
Hih thuthang tungtawn in naupang neite’n ngaihsut huai hi. Ih tate sanginn ah nuam asa uhhiam? Alawm agual te’n abawlsia, asim mawhkha uhhiam cihpen amau ngiat tungah dot akul banah khatveivei alawm agual te tungpan inzong dot kiaukiauding kisam hi.
Tate mailamding, sangkah nading, pilna zonnading cih paulap in gamdang atung Zomi pawlkhat suntawh zantawh nasem in buaicipden uh a, tate zong donzo nawnlo uhhi. Tate tawh nikhat khatvei akimulo nulepa pawlkhat ommawk hi. Tuate’n tate bangci makaih in thuhilh zo mawkding?
Related: Kum 15 sangnaupang khat hawkguam pan asumbawm atopsawmleh akhutme nih kitan
Nasep kuanhun leh sangkah hun cihte tawh innkuan kimuhding alemkeiphial lehzong mikim in Phone neisam ahih manin, innkuan pihteng kiho zelzelding zong thupi mahmah hi. Azi apasal tawh innah lupkhop hunding aneilo pawlkhat nasepna ah naseppih tetawh nupa bangin aki limthuahzaw cihkhawngzong kiza kiaukiau tamawk hi. ZD Sawltak #zomidaily
Comment piaknop aomleh...