Thu ih cih in la, La ih cih in thu
Thu kigen khempeuh alim cisak leh akipsak, apicingsak in la ahihi. Lakhempeuh adeih nateng thu tawh kihilh ahihi. Athu om bang dandan in leitung minam khempeuh alungsim kihei sak, khuasa sak ahihi. Tua ahih man in LA in mi nuisak thei, kapsak thei, alunglengkhat lung nuamsak, aheh mikhat lungdamsak,akitawng dingkhat kilem sak theihi.
Tua ahih man athutawh kizui, lasaksiam leh thusut asiam, tanglai Zomi te sep zia tawm kong pulak nuam hi. Hih thulu zui in Nam (2) in i khen dinga, Nopna leh Dahna mun ah lasaksiam leh thusutsiam in koih seh dih ni.
1. Dahna mun ah thusut siam leh Lasak siam Zomi
Hih dahna mun san, adipkuat huaihun, alunglen huaihun, akhua ngaihhuai hun ah athu tawh kizui in ala damtak in awi in sa liailiai ahih man in alungleng khat, atha neem mikhat lung nuamsak kikzo in, alungsim leh ngaihsut na kihong sak ahi. Sih leh nat, khua ngaih lunglen athuak/tuak mikhat in amah bek in athuak lohzia te ala in sutsut a akhituiluang mikhat, hehneem zo ahihi.
Tua ahih man sih na mun bang ah sihla, nei pah in sanolhla nei-in, sihguiding ciang in kongkalla cih bang in khen diudeu a, a aw mahmah zong atuam tek hisak in akullo leh akisamlo na mun ah sa ngeilo hi.
2. Nopna mun ah thusut siam leh Lasak siam Zomi
Hih nopna mun ah gal aih hun, sa aih hun, Zu nun hun, samat hun, mo neih hun, Khuado hun, Pu te zukholh hun kihel ahihi. Adang zong tampi om lai ding ahihi. Tua ahih man in gal aih hun ah gal aih la, sa aih hun ah sa aihla, Zu nun hun ah Zu nun la, Samat hun ah samat la, Hanla, pu zukholh hun ah zukholh la, khuado hun ah khuado la, ahun amun athu zui in salian lian ahih man in tua lasak na hang in athu athupit na kilangsak limcisak ahihi. Hanla bang zong asatmat zui in kikhen lai ahihi.
Tuhun ciang in zong
Tuhunciang in zong nidang hun bang in la aw akibat zenzen loh hang in Zomi sungpan Lahong puak te khem peuh in Dah hun ahsak ding, Nop hun ah sakding, Minam hun ahsak ding, Khuado hun ah sak ding, Sialsawm hun ah sak ding, Christmas hun ahsak ding, Lia leh Taang kiteen hun mopawi hun ah sak ding Pasian biakpiakna hun ah sakding cih bang in aw 7 tawh kim tak in hong koih hong phuak uh hi.
Ahi zong in laphuak te deih nabang in ei “mi laphuak sa”, lasa ten aphuakte deihna mun ah ih sa het kei theihi. Biakpiakna mun ah Minamla kisa kha thei a, Minam hun ah biakpiakna lakisa kha hi. Khuado hun ah Love Song kisa vat thei a, Mopawi hun ah minam la cihbang in athu tawh kituaklo in la ihtel, ihsa, ih phuang kha sakha thei hi hang. Tua bang hun ciang in ihthupi bawlnop na leh alimcitna ding teng bang mah man lo thei ahih man in Laphuak te’n akicingtak ding a, hong koihsak sa late athu om bang in sak thei siam ding thu mahmah ahihi.
Hau Thang
Comment piaknop aomleh...