Khensat ma in theihtel sawm in ~ Pau Khat Suan

Khensat ma in theihtel sawm in ~ Pau Khat Suan

Na theihtel loh thu ah nakpan lua, sihpan keka kha kei in. Na kisik hun ongtung kha ding a, lei bek sik in, ai mitdeh nabat hun ongtung khading hi. Na hahpan luat ma in na dinna, na siksan tel mahmah phot in. Na vangik in buannawng lak ah kidokkhia, kikaikhia zo nawnlo zah in ong hentum kha ding hi.

Theihtelna leh pilna tung a kinga itna leh deihsakna masuan mapanna bek in minam masuan khantohna leh thupina mual ong suahpih ding hi.

I itna leh deihsakna pilna leh thutheihna tung ah a kilam kei leh, (or) i pilna leh i thutheihna itna leh deihsakna tawh a kithuah kei leh Zomite’ maban photkik zawh nawnlo ding, a bungbu a nawmsawm in ong thallot, ong tuksak kha ding hi.

Kiptak len a na hahpan ma in, theihtel sawm masa in. Angsung thei leh ama’ mimal meetna ding bek lel a ong zangnuam pawlkhat in na pilkhak ding, thu na theihkhak ding patau in namai ong khak ding uh a, khemna tawh ong thuzawh sawm khading uh hi. Khawl tuankei in.

Pilna leh thu theihna in mi thupi ong suaksak ding a, hauhna leh neihna sang in a zahtak huai zaw, simmawh leh neu-et mawkmawk theihloh zahtak giugiau huai, khem mawkmawk theihloh mi thupi ong suaksak ding hi.

Na hihna khempeuh ah na muanpen nangawn ong neusek, bangmah manlo ong suahthei pen hithei ahihman in, na khensatna peuhmah “mi’n citah” ci a, nang’ ngaihsut tawm ahi lo peuhmah tawh khensat huai lo ahih lam phawk gige in.

Esau bang in an kuangkhat peuh, zingvai nitak vai khatpeuh tawh na thuneihna zuak kha kei in. Nek khat lel, khatvei gilkialna pan suahtak pakna lel in na khantawn genloh natu nata khang dong thu ong khen kha ding hi. Tua na khensatna pen na hihna khempeuh a sai thulianpi hikhathei ding ahihlam phawk gige den in.

Ak kitu na muhnopna lel, na mit lungkimna ding na ngaihsutna lel in na aklui gim le tawl thuak, si le nai suak in zawngkhal lawh, sihlawh sak thei ahih lam phawk gige in. Na khensatna leh na thapiakna na khialh man in na it na nu na pa, na sanggam u le nau, na minam dong in puklawh, zawngkhal lawh, sihlawh thei ahih lam phawk gige in.

Na khensat ma in theihtel sawm masa in. Na khensat ma in tel mahmah sawm in. Tha na piak ma in tel mahmah inla, na thapiak thu leh gamtatna i a zom a nungzui ding thu le la, a gah, asia apha limtak ngaihsun masa, khinkhai masa den in.

Mihai leh lungsim cinglo, a damlote bek mawk ot auau thei hi. Ahang teltum teng mel omlo, a deihna leh ahang gencian theih om mello a mawk ot auau pong peuh mit humsa in nungzuih kha kei in.

Na maban, na khensatna, na thapiakna na upmawh sang thupi zaw a, na gelna sang muibun zaw in, na ngaihsut sang gupha zaw hi.. cih phawk den in. Pilna leh thutheihna in na ma vangsak in, na mai tangsak ding a, vang ong pia ding hi. Pau Khat Suan