Vondeih Kep Ding – 129 (Dimno’ Pa)

Vondeih Kep Ding – 129 (Dimno’ Pa)

Tawngno,
Tawngno aw, dam in laikhak hong gelh kik ing. Kum dangtawh kibang lo-in tukum ei kiang ah khuadam diak leh kilawm sa mah ing.Ko kiang khuadam dan bel kumdang tawh kilamdang lua kei, cih ding hi.

Tuhun ciangin mi khempeuh phial in smartphone khatta nei kim in, ihmut sip lo siah phone mekmek in kibuai ngeingai tek hi. Mawtaw khawl kawm, annek kawm na ngawn in phone ki-en kawm a, ihmu dinga kithawi diaidiai laitak bang notifications ging za leh a tho kik bang ki om liang hi. Research a kibawlna khat ah ni khat phone khat in average in notification ging bekbek pen 63.5 vei bang ngah hi, ci uh hi. Smartphone lo tawh nungta zo kei ning, aci bang ki-om liang ta hi. Ahi zongin mat le zet in i phone i etet thapaih pen na hoih tuak het lo hi.

Google Company ah product manager a sem ngei Tristan Harris in a gen na ah, “Hih Silicon Valley te-in phone, app leh social media ah i awk theihtheih na dingin bawlbawl uh a, mi tampi in a zat semsem theihna ding, hun sawtpi a etet theihna ding, i suai semsem theihna dingin na tampi tawh bawl a, sumtang khia in kimawlna Slot machine tawh kibang hi.

Slot machine sungah sumtang khia leng bangteng ngah ding, ahih kei leh bangzah ngah kik ding cih i lamet bang danin social media khat peuhpeuh ah lai i post ciang ahi zong, liim leh maan khat peuhpeuh i post ciang ahi zongin kua teng in Like hong pia, kua teng in hong Comments, kua tengin Reaction hong pia, kua teng in hong Share sak cih kilam en kik a, tua i lam et kikna in, i phone pen mat le zet in hong en kikkik sak hi.” (Gun dung ah zusa siah in i giak ciang thaang kisai ta in teh,’ cih in mat le zet in i vil nop pahpah dan hi lo dia maw!)

“Amau kiang sum tampi a lut theihtheih nadingin i hun tampi i piak theihtheih nadingin hong bawlbawl uh hi, App te a programming hi lo zaw in, mihingte hong programming hizaw hi,” ci hi. Adang khat panin cileng hong zolzol in hong, zawl-ai tawh i limzat theihtheih nadingin hong bumbum uh suak ding aive!

Tua bek hi lo-in Facebook ah VP a sem ngei Chamath Palihapitiya in zong hih social media te in hong suksiatna thu na limgen mahmah a, “Kum 7 sungah nih vei, thum vei val post lo ding hi ing, ka zat loh zawh kum tampi paikhin ta hi,’’ ci-in 2017 November kha in Stanford Graduate School of Business te tawh a ki interviewed na ah na gen hi.

En lah nikhat in sagih vei bang post nuam in, midangte’n kum sagih sungah sawm vei zong post lo ci mawk bel! Tawngno aw, phone zat leh social media zatte, a diakdiak in facebook zat kidawm zo in kidek zo hi le hang tu leh tu tawm in hamphatna i ngah pah kei zongin sawtpi adingin a kideklo te sang hamphatna ngah zaw dingin lam en ing!

Social media zatdante tawh kisai in na pa in ka khensatnate bel nang zatdan ding nong theihsak ma in hong theisak hamtang ning.

Hong it,
Na Pa

Columbus, Oh
January 28, 2018