Sang apna ah Lia leh Taang kizang thei tading

Sang apna ah Lia leh Taang kizang thei tading

2020-2021 Pilsin kum pan kipan sang apna ah Myanmar gam sunga om tualsuak minamte min mai a kisapnate tawh min kikhum theih nang Pilsinna Zumpi in thupia hi, cih thu kiza hi. A beisa hunin Ma leh Maung, U leh Daw cihte akizang ahi hi.

Hih thu tawh kisai in Pilsinna Zumpi pan April 1, 2020 ni in Division, State, District leh Township te ah abanbanin kizasak khin ci hi. Lia leh Taang, Nu leh Pa, Pi leh Pu cihte zat ding tawh kisai Zomi Lai leh Ngeina Kipawlna in abeisa 2019 kum pan kihanciam to hi in 2020 January kha in Ministry of Ethnic Affairs tung pan phalna kingah khin ahihlam Sia Pau in Tedim Post tungah gen a, adiakdiak Chin state,Tedim leh Tonzang Township sunga om mintap nei peuh mahin ih zat hamtang nading lunggulh mahmah ing ci-in genbeh hi.

Myanmar gam sunga om tualsuak minamte min kisapnate akithei phadiak ahi “Saw, Sai, Min, Naing. Salai, Taang, Lia, Mai, Naw, Nan, Nanh, Gah, Mih” cihte ahi hi. Source: Irrawady Media/ The Tedim Post

Paletwa Township Miletwa khua inn ki halsak

Chin State, Paletwa Township, Miletwa Khua May 26, 2020 ni sunhun pawlin inn 100 kiim kihal sak hi, cih thu kiza hi. Miletwa Khua pen inn 125, mimal 630 val omna khua hi. Myanmar Galkap te leh AA te kidona hangin abeisa April kha a kipan khuamite galtai gai uh a, inn bek aki nusia ahi hi.

“Hih vai tawh kisai kua hal hiam cih kigen thei lian kei’’ ci-in Chin State Sipen Vuanzi Pu Soe Thet in Myanmar Times te kiang gen hi. Inn kihalna tawh kisai ko hikei ung ci-in Myanmar Galkap te leh AA te kingawh tuak uh hi.

More: Paletwa ah galkap khatin numeino abuankhit ciangin thatlum

Rakhine State leh Paletwa Township sung Myanmar Galkap te leh AA te kidona hangin tukum January kha pan March kha dong mimal 258 in liamna thuak in mimal 101 sihlawh khin uh hi. Source : Myanmar Times, RFA/ The Tedim Post