Ngap le Ngap, Pasal Takkheh! ~ Sia Pauno

Ngap le Ngap, Pasal Takkheh! ~ Sia Pauno

Minam khat sungah singnuai mi khatsang tamzaw a omleh tua minam pen ahamsia suak a, mipi gim apia zong hipah uhhi. Minam khat sungah singnuai mi pawl 2 pawl 3 om in na semkhawm diamdiam cihbel kivang mahmah kha ding hi. Semkhawm cih sangin kido kithah lawhzaw bekthamlo in minam kikhenkhapna, sikhat sakhat kimlai gal le sa a kineihna leh manthanna piangzaw ding ahi hi.

Anih un piang khat in piangkhawm, a piang kituaklian cih omngeilo ding a, khat zawzaw om masa ding hi. A omsa khat omkhin in tua nungah ah khat omkik cih ciangin a omsa pen a omkik pen in hawmthawh banah kihtalo in, ngap ahih manin akipan hipah lel hi. Ngap le ngap kisual cih pen a kingap uh ahih manin a lamdang hilo hi.

Ahizong in it ung a cih uh a minamte a dingin metna omkilkello in, minam kikhenkhapna, kikhasiatna leh gal le sa a kineihna piangsak hi. Tua sangin a asuksia zawlai in ngap le ngap a kipan uh kimlai, khat zawzaw in a lelhzawk uh ciangin minam dangte pangbel in, minam dangte kawi uh a, a mipih a sapihte, a sisan kibatpih, a laiguizom ngiatte uh namdangte thatawh kop in a gawigiap mawk pen uh ahi hi.(eg. I sanggam Karen-te).

Tuabang a namdangte kawi a, a mi asa a sual giapgiap ngamte pen minam it a kici uh hang un zuaupi hi a, Pasian min alawh kha uh zong amai zumhuaipi ahi hi. Ei minam sung thanemnate midang va kohkohna zong minam itna veina hilo in eisung suksiatna ding lampi sialsial i hi-a, siale zong phamawh asalote sepngam bek ahi hi.

Minam vei a, it takpi a, akipan i hih leh sepngam a kul mahbangin i sepnate zong ko mau mahmah sep hi, cih (Responsibility and accountability) genngam kul a vaipuak lakzong kul ahi hi.

Minam veina leh itna takpin tawh ei angsung khuallo a kipiakhia takpi i hih leh, Minam avei leh avei, minam a it le a it, kikupnop lohna ding thu a omloh mah bangin kipawl noplohna ding thu zong omtuan lo ding ahi hi.

Ei angsung khualna hilo in minam avei a it takpi i hih leh i minam vang kiamna ding, i it i mipihte maimialna ding, i hehpih mipihte gimtuakna ding lampi kiteel ngeilo dinga, i mipihte hu in don in kikem zaw ding ahi hi.

More: Pilna vs Veina ~ Sia Pauno

Bangbang i gen a i sem ahi zongin kithatang muanna, thagumsuahna bel kuitung ngeilo ding hi. Minam vei takpi a, mipi lungtang sapek tungah itna khaici a tamtuhzo zaw penpen lawhcing ding hilel ahi hi.

Tua ahih manin vei ing i cih i minam lim le vang khual in, it ing i cih ngakngak i mipihte, adon, akem le ahu ngiat dingin Topa’n thupha hong piakim ciatt hen, Amen. Sia Pauno #CCDI Speak Out, 2021/19