Breaking News & News update: Russia – Ukraine vai Update (March 15, 2022)
1. US in Ukraine gam ah humanitarian assistance ding in $186 million kipiakhia leu leu ding hi ci in US Secretary of State Antony Blinken in tangko khia hi. Abeisa hun in zong galvan leh humanitarian assistance ding US in $ 600 million val pia khia khin uh hi.
2. Ukraine capitol Kyiv ngei teng ah Russia buluh te leh Ukraine galkap te nasia takin kikap hi mah ta leh EU makaipi thum te ahi the Poland Prime Minister, the Czech Republic Prime Minister leh Slovenia Prime Minister te Meileng tawh Kyiv ah va hawh uh aa, Ukrainian President Volodymyr Zelensky tawh holimna va thei uh aa, thupi leh hang kisa mahmah hi. Ukraine gam pen EU sung member khat aa lut ding ahanciam lai tak uh ahi hi.
3. US news minthang khat ahi Fox news correspondent khat ahi Ben Hall pen gal kikapna Ukraine gam sung ah news alak lai takin kikap liam aa tulai tak zato alup lai tak ahi hi. US State Department in belh hi vai tawh kisai huh theih zah in kihuh ding hi ci uh hi. Nung Monday ni in American journalist Brent Renaud zong Russia te kaplum uh aa, Ukrainian President Volodymyr Zelensky in acian lai a innkuanpih te tung dahpihna lai khak hi. Russia buluh te inn Taden (News) la Journalists te na leng thahlum uh ahih manin International thukhun te pelh hi ci uh hi.
4. Russia kumpi pa Putin in Thukan (intelligence) lam agol pen khat nasep pan paikhia sak hi ci uh hi. Ukraine gam abuluh ma un Ukraine mipi ten akumpi te uh zong deih nawnlo ahih manin Ukraine gam I sim leh ol no takin la zo lel ding hi hang ci in Thukan makai pi pa in Putin tung a gen (report) na tawh kizui in Putin in abuluh hi aa, ahi zongin tua thukan makaipi pa gen tawh kilehbulh in Ukraine mipi te in akumpi te tawh kibawl in lehdo kik uh ahih manin tu ciang dong agimna tangtung zolo ahih manin Putin heh mahmah kici hi.
5. Russian ten Ukriane abuluh zawh uh nipi thum bang hi mah ta leh a capitol leh gam khua tampi la zo nai tuan lo uh hi. Ukraine galkap te leh Teritorial Defense Force te in nasia takin do kik uh ahih manin Pu Putin ii ngimna bangin Ukraine gam la zo nai tuanlo uh ahih manin Putin nak thang pai mahmah hi ci uh hi.
6. Leitung gam 30 kipawlna ahi The North Atlantic Treaty Organization (NATO) pan makaipi teng mai nipi sung Brussels khua, Belgium gam ah kimuh ding geel uh aa, tualai ah US President Pu Biden zong kah ding hi ci in US official lam ten kipsakna nei uh hi. Adiak diak in tulai tak akibuai Ukriane vai kikum ding uh hi ci uh hi. Abeisa hun in Pu Biden in NATO pen Russia-Ukriane kidona ah kihel zen zen hi leh Leitung gampi thumna piang ta ding hi ci in genkhia hi.
7. Russia state news channel minthang khat ahi the Kremlin’s falgship TV Channel in Russia-Ukraine kidona vai ataangko lai takin tua TV channel ah asem Maria Ovsyannikova akici numei khat in “No War” cih poster tawi in Gal deihlohna thu pulaak khia aa, leitung gambup kizel mang hi. Putin in gal ado nop hang agam mi ten gal dona adeih loh loh kilang mahmah aa, Mipi te in Russia gam mun khempeuh ah zong galdona deihlohna lungphona nei uh hi.
8. Leitung gambup in Russia pen mun khempeuh mah khaktan in sanctions bawl uh ahih ahih manin agam sungah haksatna lianpi tung ahih manin Russia in China te tungah Galvan (Military), Sum leh Paai (financial assistance), leh nek leh dawn (food assistance) te ngetna nei hi. US kumpi in China kumpi kiangah Russia te huhna na piak uh leh buaina hong kizom to to dingaa, kilemna om thei lo ding ahih manin hoih tak ngaihsut ding zasakna nei uh hi.
9. Russia ten Ukraine buluhna hangin mipi in Ukraine gam pan apai khia 2.8 million pha ta hi ci in United Nations High Commissioner for Refugees (UNHCR) in genkhia uh hi. Gamgi akizom Poland, Romania, Hungary, Moldova gam te ah gal tai uh hi. Russia ten Ukraine buluh zawh aa kipan tuni ciang dong mpi 636 si ta aa, mpi 1125 liam uh hi ci in UN Human Rights office (OHCHR) in genkhia hi.
10. Ukraine-Russia kikal kilem nading thu kikup a 4 veina pen abeisa Monday ni in nei uh aa, haksatna tampi om ahih manin ni khat sung khawl bawl phot uh hi ci uh hi. Ukraine President Zelensky in belh “a haksa mahmah thukikupna hi” ci in genkhia hi. Russia leh Ukraine thunei te kikal a 4 veina thu kikupna kinei khin hi mah ta leh tu dong ciang buluhna atawp theih nang bangmah thu kimna nei zo nai lo uh ahi hi. A 5 veina kikupna pen zingciang (Wednesday) ni in kinei ding hi.
More: Russia & Ukraine tuukpeng kidemna ~ Bob Tuangpi
11. Ukraine President Zelensky in zingciang (Wednesday) ni 9:00am in US Congress ah virtual (Zoom) tawh thu genna nei dingaa, Congress palai te tawh kikupna nei ding hi. Abeisa hun in US Congress in Ukraine gam aading huhna huhna 13.6 billion piakkhiat ding vote tawh khensat (pass) uh ahi hi. Tuni in zong Congress pan Republican lawmakers ten Pu Biden kiang Ukraine gam Gal vanleng puak ding ngetna nei uh hi. Ref: CNN breaking news, Twitter *** News Update zong LIVE tawh kikhah ding ahih manin kimu tek ni…. Thomas On Sian Mung (Thomas Mung Guite) Washington D.C March 15, 2022
Comment piaknop aomleh...