Tedim leh Chin State Nai-ngan-ye ~ Khup Khan Thang

Tedim leh Chin State Nai-ngan-ye ~ Khup Khan Thang

Kawlgam in suahtakna a ngah khit ciangin, Chin Special Division a’ding in, Constituent Assembly members mun 6 (Six) hong kipia hi. Donghu (Provisional) Minister Chin Affairs ding kitel uh aa, Vomthu Maung (Kanpalet) in ngah hi. U. Liam Tum in Chin Affairs Council Chairman ngah aa, Capt. Mang Tung Nung in Chin Affairs Parliamentary Secretary ngah hi.

Kawlgam Constitution zui in Chin Special Division in, Members of Parliament (MP) 14 ngah ding ahihi. Pyithuh Hlawdaw ah MP 6 leh Hlu Myo Suh Hlawdaw pan MP 8 a hihi. 1951 kum kitel ciang in, a gualzo MP atam zaw a ngah Chin Congress Party (CCP) te’n Chin Minister a ngah ding hina pi in, U Nu in, Chin Minister ding Chin Affairs MP sung kidem sak aa, U Zahre Lian (CCP) in vote 10, Capt. Mang Tung Nung Chin National Organization Party (CNO) vote 3 tawh zo hi. Paletwa MP pa meeting ah omtheilo hi. (Ciapteh na dangte ah U Zahre Lian in vote 8, Capt Mang Tung Nung in vote 6).

Prime Minister U Nu in a iit, alawm Capt. Mang Tung Nung Chin Affairs Minister a piak nop hang’in, mee (Vote) lel ahih man’ in, upmawh mah bangin, Prime Minister U Nu in, U Zahre Lian Chin Minister dingin, khangno (Kum tawmlua) lua hi ci in nial hi. (A nih tuak in, U Nu Party hilohi.) U Nu in U Shein Htang Chin Minister ding in tel hi. U Lum Pum in Chin Affairs Council Chairman sem in, U Zahre Lian in Chin Affairs Parliamentary Secretary sem hi. U Nu in a maa party AFPFL pan a piak ding MP omlo, Chin Political Party pan vive a hih man’ in, a deihsak, a iit alawm, Capt. Mang Tung Nung a piak nop ziakin, Constitution zuilo in, amau MP sung a kidem sak ahihi.

1956 Kum Chin Special Division kitelna

1956 kitel ciangin, Tedim gam pan AFPFL (Phasabalah) U Lun Pum, U Mang Cin Khup, U Hau Za Lian; Falam gam pan U Zahre Lian, U Thang Lian; Haka pan U Ro Thang, U Ral Hmung, U Hrang Nawl; Kanpalet pan U Shein Htang, U Htun Aung; Matupi pan Sang Ning, Mang Tling; Paletwa pan U Saw Hla te ahih uhhi.

U Zahre Lian in Chin Minister ngah in, U Lun Pum in Chin Affairs Council Chairman leh U Htun Aung in Chin Affairs Parliamentary Secretary sem hi.

1956 kum Tedim Uk sung kitelna

U. A. Lun Pum, Pu Mang Cin Khup, Pu Hau Za Lian te in, Tedim Township telcing M.P ngah uhhi.

Beh le Phung vai khauhpai semsem a, nupa kal, ulehnau kal, sunghlehpu kal nangawnah Nai-ngan-yee hang in kimai nopmawhna tampi hong piang hi. MP meekuang lui atamzaw, laitan sang nei omlo hi. Laitan nei, pilna nei te zong ih gam maakai ding in a kisap lam mipi in, theinailo tawh kibang hi.

1958 kum pawl-in, Pha-sa-ba-lah phelnih inkitam aa, U Nu leh Thakin Tin maakaihna “Clean AFPFL’ leh U Ba Swe leh U Kyaw Nyein maakaihna “Stable AFPFL” a hihi. U Nu government pen kimuanglo na (No-confidence) lai ki tin hi. 1958 kum Sept 26 ni-in, U Nu in Kawlgam ki-ukna General Ne Win tung ap hi. Gam kem/cing kumpi ki-ukna, Caretaker Government ki ci in General Ne Win in Prime Minister leh Defense Minister Sem khawm hi. Kawlgam in British te Parliamentary system of Government zui a hih man’ in, Prime Minister a kikhek ciang in, Minister dang teng zong a khawlphot uh kul hi. Chin Minister zong a khawlphot hong kul hi. Caretaker Government in 1960 kitel ciang dong gam hong kem hi.

Chin Congress Party pan U Ral Hmung in Stable AFPFL lam pawlpih aa, U Shein Thang leh U Htat Hlaing te in zong na pawlpih uhhi. Chin Congress Party in Clean AFPFL lam pawl pih hi. General Ne Win in a Cabinet Member ding a tel khit hangin, Chin Affairs Council in, a Chin Minister dinguh telzo nailo hi. Banghang hiam cih leh Chin MP te Stable AFPFL leh Clean AFPFL ah sagih; sagih (7/7) tuak in kikhaikim uhhi. U Thang Lian (Lumbang, CCP) Chin Minister lam-et natawh, Stable AFPFL lam kihei/beel aa, Chin Affairs Minister in kitel pah hi. CCP Chin Party neu khat pan Kawlgambup Party gol Stable AFPFL a belh hang aa, Chin Affairs Minister a’ ngahpah a hihi. Party gol tawh pan khop ding a thupi na hi.

Gen. Ne Win in kha 6 khit ciang resigned ahih manin Chin Minister U Thang Lian zong atawp hong kul zel hi. A hizongin Gen. Ne Win in gamsung dai nailo ahihh man in, kum khat sung gam ki-ukna alet lai ding ngen aa Parliament in pia hi. Chin Affairs Council in zong Chin Minister tel kik ding hong hi leuleu a, Stable AFPFL lam atai sa U Ral Hmung (Haka) in, Clean AFPFL lam taikik leuleu aa, U Ral Hmung leh U Thang Lian Chin Minister sem ding hong kidem in, U Thang Lian in vote 5, U Ral Hmung in vote 8 tawh Chin Minister sem hi. U Thang Lian Chin Parliamentary Secretary kipia hi.

1959 kum ciangin, U Ral Hmung in, ama thuneihna luangkheng in zangh in, sum leh paai bei ding, midangte thukim, thukimlo cihte ngiahsun vet lo in, Falam District Head quarter Haka ah tuah sawm pah giap hi. Tua baan ah, Thlantlang gam ah kialpi tung hi ci in, North West Commander pa Col. Lun Tin Thlangtlang ah vanleng tawh antaang a khiat nadingin order pia hi. Chin Minister khat thu neihna, septheihna aanaa aval in zangh pah ziahziah hi.

Hih thu teng azak ciangin, Gen. Ne Win in U Ral Hmung kiangah, ama thuneihna luangkheng aa, a zatna te a’dawh kik nadingin order pia hi. U Ral Hmung in, ke’n order issue khin zo ing, ka dokkik kei ding hi ci hi. Tua ciangin Gen. Ne Win hehin, U Ral Hmung Chin Minister pan in thakhatthu in khawlsak pah hi. U Ral Hmung order issue sa tengzong thakhat in cancel pah lek hi. U Ral Hmung in, Chin Minister kha 10 dektak (Ni 300 cinglodeuh) bek sem man’ hi. Mi nam dangte maakai te’n, a minam aading leh akhua leh atui aading in, aamaa zaa leh ngal suplawh ngam pahlel hi. Ei maakai te e leh?

1960 kum February kha Kawlgam bup kitelpi kuan ciangin, U Nu in Kawl ngian zang in, kitelna azawh leh Buddha biakna Kawlgam biakna (State Religion) ka suaksak ding hi ci-in khaam hi. Tua hangin U Nu party ahi Tan Sianh Pha sa ba lah party in Kawlgam bup ah zozihziah hi. 1960 kum April kha ciangin U Nu in Prime Minister hong sem kik hi.

Ei, Tedim gam ah 1960 kum kitel ciangin, Parliament Pyi-tu Hlo-daw mun dingin, Ti-hme Pha-sa-ba-lah pan, Dr. R. Vung Swan M.B.B.S. ; Independent party pan, S.T Hau Go M.A, M.R.E. ; Tan-shin Pha-sa-ba-lah pan, U. A. Lun Pum B.A. leh CNO pan, Capt. Mang Tung Nung Kawllai tan 4, te’n Mee kuanglui uh aa, Capt. Mang Tung Nung in zo hi. Tua kum kitel lai-in, ei Tedim township pan MP telcing te lak-ah, Pu Son Cin Lian bek Jr. I.A. ciang kah ngei hi. (Pu Son Cin Lian pen KSVP phuan Pu Langh Khaw Thang tapa hi) 1960 kum ciangciang mipi in ih gam maakai ding laitan nei a thupi lam kiphawk nailo lai hi. A meetang zuak nangawn ki om mawk hi. Kuanglui ding meetang lei nuam om ahih man’ in aa meetang kizuak hi a, tua in corruption a hihi.

Tan Sianh Pha Sa Ba Lah party pan in telcing U Zahre Lian in, Chin Minister ngah in, CNO pan Capt. Mang Tung Nung in Chin Affairs Parliamentary Secretary, U Son Cin Lian in Chairman of Chin Affairs Council sem hi. U Nu in, 1953 kum aa, amaa party hilo aa, adeihlo pa’ U Zahre Lian tu’n amaa party ahih ciang in Chin Minister pia pah hi.

Parliamentary Democracy hun sung, ih Tedim leh Tonzang MP te’n ihgam, ihlei a’ding asep khiat uh bang teng taktak om.?

U Zahre Lian in a te’n na’ding inn khat Falam khua ah lam, Ambassador ngah in, tawmvei bek teng man’ hi.

General Ne Win in Kawlgam aana (Coup d’etat) alak khit teh’ Capt. Mang Tung Nung Tedim khua ah hong tengto ngiat in, lokho pah aa, taangza ai hi. U. A. Lun Pum Rangoon ah teng suak. Khamtung lam sul hei nawnlo.

General Ne Win 1962 kum March kha ni 2 ni, zingsang 8:50 hun in Kawlgam thuneih na aa laksaklam (Coup d’etat) Radio pan taangko hi. Prime Minister U Nu, Minister 5 leh Chief Justice te man hi. Shan leh Karenni Chief 30 zong matbeh hi. A zingciang in, parliament khawmpi phiat in, Constitution zong zangh nawnlo hi. Gen. Ne Win in Fourth Burma Rifles pan amaa mi teng tawh Lumlet Kumpi (Revolutionary Council) hong phuan hi. Kawlgam Democracy tawh ki-ukna a bei na hong hipah hi. (The River of Lost Footsteps Histories of Burma, Thant Myint-U)

Chin Special Division uk ding in, Maj. Son Khaw Lian maakai in, galkap Bo lui 4 tawh Chin U- Sii Aphuaih ci in hong uksak hi. Tua hun in mipi thuneihna om vetlo a hih man in, mipi te nidang hun lai aa kitelhkhialhna teng na’ngawn aa maa hong dam zo phial hi. Chin U Sii te’n Tedim leh Tonzang gam a’ding asep khiat uh bang teng om. Chiarman pa Maj. Son Khaw Lian Rangoon ah teng suak hi.

1972 – 74 ciang Col. Khen Za Moong Chiaman sem in, Chin Special Division Security and Administration Committee in hong uk hi. Kawlgam in Myanmah Socialist Lansin Party Amyotti party pan Pyituh Party ci-in a min khek hi. 1974 kum in, Kawlgam ki-ukna Constitution athak khat ki at/gelh hi. Myanma Socialist Lansin Party bek political party om hi. Chin Special Division pan in, Chin State in kikhek hi.

Col. Khen Za Moong in Phai Gate (Phai Check Point) leh Tulsuak gate (Tulsuk Check Point) tegel hong phiat pah hi. Col. Khen Za Moong Rangoon ah teng hi.

1974 kum ciang gam uk ding Pyi-tuh kongsil a-sensen (Peoples’ Council all levels Functionaries) mee khiat kitelna ki nei hi. Kum sawm val bang mee kikhia ngeilo, tu’n mee khiat hong om kik ciangin, Zomi te ih ngei mah in ihngei kik hi. Mono party bek hi aa, political party dang kiphuan theilo ahih manin, tua party sung mah ah “A” leh “B” in ih kikhen zawzen hi. Ni dang bang in beh leh phung ban ah, biakna zong hong lut lailai hi.

Mipi in mee ihkhiat pong mawk hang, a candidate te Party Unit pan a kisehsa hi aa, mee kuang avom sungah kikhia taleh meekuang akaang sungah na kisung lel aa, zolo cih om ngeilo hi. Agualzo te in aguallel te ki gawisuk pah aa, kumpi nasemte khuadang ah transfer sak, mawhna zong thoh khiat ding dong kihanciam pah hi. Khuakhat bang ah, apawl agual te gum nuam lua kisa in, Party Unit Chairman pa in, “curfew” bang thoh zawzen hi. {Kawlgam constitution sungah Nai-ngan-daw Tamahdah (President of the Socialist Republic of Burma) longal, kuamah in “Curfew” thoh theilo ding} ci-in ki at hi.

Sia Kam Khaw Thang in, ih Tedim Nai-ngan- yee pen, “en ih gualzawh leh ih langlam te tuancil dikdek ding in, en ih lelh leh amau zong hong tuancil kik dikdek dingin, ih thuakzawh kei leh lal ding himawk ai ve” ci’n nui khutkhut in gen thei hi. (Sadism)

1974- 1978 kum, First People’s Council hun sung in, Falam gam-uk sungmi, Lt. Col. Kap Cung Nung in, Chin State People’s Council Chairman sem hi. Tedim gam-uk sung mi, Lt. Col. Kim Ngin in 1978-1982 ciang, Lt. Col. Khai Mun Mang (B.A) in 1982- 1986 ciang, Col. Son Khaw Vum 1986-1988 ciang Chin State People’s Council Chairman sem hi. Galkap kumpi in Kawlgam ki-ukna a lak zawh 1962 pan 1974 ciang kum 12 sung Tedim uksung mi te in, Chin Special Division ah a sangpen thuneihna Chairman ih sem hi. 1978 pan 1988 kum ciang, kum 10 sung Tedim gam uksung mite mah in, Chin State ah a sangpen thuneihna Chairman ih sem hi.

Ihgam ihlei, Tedim leh Tonzang gam a’ding a semkhiat uh bangteng taktak aom aa leh? Hih ih Chin State Chairman te, Lt. Col. E.K Kim Ngin, Col. Son Khaw Vum Rangoon ah teng uhhi. Lt. Col. Khai Mun Mang in, Phai (Kawlpi) ah inn lam hi.

Galkap lui khat in “Ko galkap pension kahih nak uh leh, santhum (Stg) tungsiah in Myone kongsil (Township Peoples’ Council) ciang lam-et pah, sannih (Cpl) nuaisian ka hi uhleh, Hausa, Upa ciang a ngim pah ka hi uhhi” ci hi. Laitan, pilna kisamlo cihna ahihi. A kitel hilo kiseh cihna hi. (Not elected, appointed)

Myonee kongsil wan, khatin, thu maan’ gen mahmah aa, “Ko Party Unit te, Myonee kongsil wan te sia, khuisa (Bawngsa) tawi khat khawng hong ki puak pohle puk va nek thong kihui” ci hi. Golhguk ki nelua acih na hi. (Corruption)

1988 kum in Kawlgam milip in, kumpi tung lungpho-na kinei aa, Myanma Socialist Lansin party leh Pyi-thu- kondsil hong bei in, galkap te in, State Law and Order Restoration Council ci’n thuneina hong la leuleu hi. SLORC kumpi 1988 – 1990 kum sung galkap thuneihna tawh Kawlgam hong uk hi.

1990 kum in multi-party kitelna om aa, National League for Democracy (NLD) in zogawp aa, a hizong Galkap Kumpi in thu neihna a piak sangsek a maakai tampi matsak zaw sop hi. Zomi te zong Zomi National Congress (ZNC) min tawh kitelna ah dem aa, Tedim pan Pu Cin Sian Thang, Tonzang pan Pu Thang Lian Pau te in gualzo uh hi. Mipi cihnang’ kitheilo leuleu hi. 1990 kum pan Galkap mang te in, Galkap thuneihna (Martial law) tawh 2010 kum ciang hong uk leuleu hi. Amin State Peace and Development Council (SPDC) ci in hong khek kik leuleu hi.

2008 kum ciang in, Galkap kumpi in gamki-ukna, Constitution thak khat hong bawl leuleu aa, galkap te in Hlotdaw (Parliament) ah 25% telloppi tutna lak ding hi aa, galkap te in, mipi thuneihna sehli suah sehkhat (1/4) hong sut hi cihna ahihi.

2010 kum ciang in, Kawlgam Multi Party Democracy kitelna om aa, Galkap te panpih USDP in hongzo hi. U Thein Sein (Retd. General) in, Union of Myanmar President hong sem hi. Matupi gam uksung mi, U Hong Ngai (Brigadier) in Chin State Chief Minister sem in, Tonzang gam uksung mi Pu Hau Khen Kham in, Chin State Parliament Chairman sem hi. Tedim leh Tonzang in Chin State Minister pan mun 3 ih ngah hi. Ih MP 8 teng Galkap te tawh kipawl USDP (Pro Army) pan hi aa, ih gam ih lei a’ding naa sem nuam uh hileh, ahi ciangkhat sep zawhna nei ding uhhi. District nangawn kingah zolo hi.

2010 KITELNA

Ihgam ihlei, Tedim leh Tonzang gam a’ding ih MP te’n a semkhiat uh bangteng taktak aom aa leh?

2015 kum kitel ciangin, ei Zomi te in, Zomi Congress for Democracy (ZCD) min tawh kitel na ih dem aa, Tedim leh Tonzang uksung ah, MP mun 6 ah kizo hi. Chin State sung aom minam dang te in, NLD na pawl pahlek uh hi. Than Tlang gam uksung mi, Pu Henry Van Thio in Union of Myanmar Vice President 2 hong ngah hi.

Falam gam uksung mi, Pu Lian Luai in Chin State Chief Minister ngah in, Haka uksung mi Pu ?????? Chin State Parliament Chairman sem hi. Tedim gam uksung mi Pu Mang Hen Dal (NLD) Appointed Chin State Minister ngah hi. Tonzang gam uksung mi Pu Pau Lun Min Thang (ZCD) in Chin State Minister hong ngah hi. Tedim leh Tonzang in, Chin State Minister mun 2 bek ih ngah hi.

2015 KITELNA

Vice President U. Henry Van Thio in, a’ mau khua a’ding, Kyat billion 3 zangh in Tuikholna (Dam) khat lam in khuaphelep mei zong ngah sak hi. Vice President pa’n consolation aa hong piak “Vanleng Tual” (Air strip) ngah ding ci-in ih lawp mahmah hi. Tua zong Thantlang tawh aki bang aa hong piak hilai ei!

2018 kum ciang (A term uh abei hi nailo) Chin State sum (budget) hawmna ah zong Vompi sahawm pah uh hi. Hakha (34) billions, Thantlang (17) billions, Matupi (12) billions, Falam (10) billions. Adang Myonee teng in amau khatehkia teng ih ngah hi. Mindat MP pan pholak kei leh ei MP te’n lah bangmah hong genlo, mipi in hamphatna a kibang aa, a’ngah ngah mah ih kisa lel hi.

State level ah:- Tedim gam, Haimual khua aom, ih Border Trade Revenue Office Falam gam Rih Khuadal ah tuah sawm hi. Tedim gam aom, Lennupa (Buannel; pen eimi te lawh masak na, min ahihi.) leh a kiim aa Taam’pi (Forest) teng Falam gam sungah register nuam uhhi.

Bang ihlawh nawn dehmaw, ZCD ih tupna in, ih hamphat nang’ midang te kiangpan phalna nget kullo in, direct in en’ ngen thei ding cih ciangbek hi ven. Ih lungtup ciang bel atung ii ve! 2020 teh’ apia thei te ih hih nading hanciam ni maw. KL Zomi khawmpi aa “Zomi” (914) e leh ih MP teng kan ding mawhpuak ki pia hiven maw! Bang ciang? Khup Khan Thang