Politics leh Technology aluan khopzia ~ Bob Tuangpi

Politics leh Technology aluan khopzia ~ Bob Tuangpi

Thukong Honna (Introduction) :: Tuhun in thukizakbaihhun (information and communication, ICT) hun ahi hi.Leitungah hih technology huhau-in mihing tampi takin nasep atanlawh mah bangun mitampi takin zongh nasep ngahlawh uh hi. Mailam hunah technology hangin tulaitak aa om nasep tampitak mah beimang ding hi ci’n mailam thumukhol( futurists/foreteller) ten genkhinzo uh hi. Leitung akhangtosak mihingte nuntakna anoptuamsak in vanthak bawlkhiatna leh nathak muhkhiatna(innovation&entrepreneurship) ahi hi. Ahizongin thaman a hih leh tampi tak piakkhiat kulin olno tak tawh kingah ziaulo hi.

Set tawh nasep hong khang mahmahna (industrial revolution) hangin mihing thatang nasepte maimangin tua munah set vive in mun hong la hi. Abeisa kum 30 lai pek panin digital revolution hong tung khin zo hi. Kum zalom 20 (20th century) ah khutsiamna leh alaihawl pilna tawh kivakna nei( middle class) pawlte tuhun kum zalom 21st , technology hunah mun ngahzo nawnlo uh hi. Gentehna-in, typewriter kizatna mun leh zum lai-at (clerk) cih munte ah computer in mun hong la-in mihing khut tawh nasepna munte ah set vive tawh na hong kisem hita hi.

Technology huhau in a nuamtuam tampitak a om mah bangin mi tampitak mah in zongh nasep suplawh hi. Technology hangin khualzinna (travel & tours)baihsak banah ideih van khat nangawn innsung panin kileithei(online shopping) hita hi. Leitung koimun koilai ah iom zongin mitphiatkal(second) sungin internet tungtawnin thukiza kiho, kino, kiphin, kikum, ciamnui-in kigualnuam holimkawm thei hi.

Abeisa kum 100 lai-in America gamah nasemmi thumah zanglokhomi(farmer) khat ahi hi. Tuni-in ahih leh America gamah lokhawh nasep tawh kivaaknanei 2% bek omlai hi. Ahizongin hih lokhomite nasepneilo nuntakna tung cihna hizenzenlo-in lokhawhnasep sangin ahoihzaw a baihzaw nasep hih technology hangin ngah uh hi. Nasepthaman tamngah zaw uh aa nuntakna olzaw tham uh hi. Nidangin kipawlna khat pepeuh leh company nasepnate ah panmun thupi a kisa mahmah thuvanpi(secretary) cihte tuhun technology hunah thupi kisa nawnlo banah tua munah computer programmer leh web designers cihte in mun ong luah ta uh hi.

Thukizakna A Khauhpaina (The power of social media)

January, 2001 Philippines makaipi(president)Joseph Estrada, Phlippines Parliament ah upmawhna leh gam makaipi dingin muanhuainawnlo cih thusuunna(vote of no confidence) khat om cih thu aging khit asawtlo nainih khit phetin mitultampite Manila khuapibup lamzikpi tengah kikaikhawm ngeingai uh aa, “thutanglo golhgukneekna (corruption) azangh makaipi Joseph Estrada, deihlo deihlo deihlo, na tutna pan kihemkhia inla gambup makaipi(president)panmanlang takin tawp in!”,ci’n lungphona hun tomno khat sungin hong nei pah ziahziah uh hi.

Mikim in mobile phone tawi zihziahta ahih manin Philippines gammi khatkim tungah, “ Go 2EDSA, Wear blk” cih laimal (text message) khat khit khat kikhaksawn ngeingai uh aa, asawtlo in gambup kizeel aa mipi million sagih valin tua text message ngah uh hi. January 20, 2001 kum Philippines gambup gamlumna hangin Manila khuapibup gammite in umcihta uh ahih manin ut in ut takei leh makaipi Joseph Estrada in tawploh phamawh in atutna tanlawh hi. Gam makaipi khat social media tungtawnin mipitha tawh leitungah gammakaipi khat a kihepkhiatna gam masapen Philippines gam hong suak hi. Makaipi Joseph Estrada in amah a kihemkhia gammite, “ text messaging generation” ci’n minvawh zawzen hi.

Tua mah bangin Spain gamah zongh 2004 kumin Spain thuvanpi( prime minister)Jose Maria Aznar Lopez, Spain gammite in a hepkhiatna dingun gammite in social mediawebsite ahi Facebook, Twitter tungtawnin text message kikhawk sawm uh aa, asawtlo ah hemkhia pah ziau uh hi. Social media hangin gammite ukcipzo nawnlo thusim cihbang gam makaite in neithei nawnlo ahih manin gamuk kumpite in lampi tuamtuam zanghin khaktan ding kipan zel napi un matunzotuanlo uh hi. Tua ahih manin tuhunah gamuk makaite in technology in politics ah munla mahmah cih thei uh ahih manin patau mahmah uh hi.

2009 kum in zongh Moldova gamah communist party in kiteelna ah zuau aphuahna thu social media tungtawn mahin gam mite in pholaakkhia in communist party hemkhiazo uh hi. 2009 kum Iran gambup kiteelna ah Iran prime minister lui leh kum 2009 Iran president kidemna ah adem Hossein Mousavi Khameneh in khemna azatna gammite in thei uh ahih manin social media tungtawn mahin thukiza(text message) kikhak sawn ngeingai uh aa, lungphona leh deihlohna tangko in Cairo khuapi lamzikpi khempeuh ah diang uh hi nap’n kamsiatna tawh asawtlo-in Iran gambup galkap ukna(dictatorship) tungkik uh hi.

Tua mah bangin Belarus gamah zongh, march 2006 kumin e-mail pan gammite khat leh khat kizawn ngeingai uh aa, president Alexander Lukashenko in kumpi kiteelna( presidential election) ah azuauphuahna social media tungtawn mahin kipholakzo mah hita leh gamukte gitloh ngongtatluatna hangin khaktanna tampi phukha uh hi.2010 kum Thailand ah red-shirts te kitomna zongh social media thukizakna pan hong kipan khia hi a, buaina nasia mahmah leh khauhpai mahmah ahih manin Bangkok khuapi umcip-in nitampi sung khakcip zo uha, ahizongin tua lungphona ziakin mitampi nuntakna beilawh hi.

June, 2009 kum panin hong so vingving leitung nisuahna gamlaita (middle east) gamte kitomna ahi Arab khuakhal( Arab spring) leh march,2011 kum pan leitung bupah athang vangvang Myanmar kikhelna leh khualkhalhuihpi( Myanmar spring) cihte zong tuhun information leh technology tuihual hangin social media ahi facebook, twitter, e-mail leh newsjournals tungtawnin hong piang khia ahi hi. Tua ahih manin tuhunah thukizakna(social media) in gam makai hoihlote hepkhiatna dingin akhauh mahmah mipitha(people’s power) hong kipatkhiatna hita hi.

Hunthak Leh Nasepthak(New age and new jobs)

Technology icih in piingpei huihpi(cyclone) tawh kigenteh thei hi. Upmawhloh laitak mitphiatkalin hong nawtgawp thei hi. Amasa ah gamkhangtokhin( developed countries) cihte ah hong khauhpai mahmah aa, hunsawt simsim khit teh gamkhangtolaitak( developing countries) ah hong lawhkik leuleu-in, atawpna tuhun tatak ah bel gamkhantohna zekaimahmah(least developed countries, LDC) gamte ah khauhtakin hong kipei vungvung hita hi. Tua bang technology tuihualpi nawtgawpna hangin leitung mihingte kiginkholhna hun tomlua ahih manin mitampitak in naseptanlawh uh hi.

Ahizongin hih digital revolution hangin company lianpipi nei mihau sumbawlte, leitungbuphuam sumbawl kipawlna (international corporation) cihte leuleu in nasemmimal khiamsukzo uh aa, computer leh setmilim( robot) te mihing munah nasemin zangh uh hi. Tua ahih manin nasepnei mihaupawl( employer) leh nasemmi( employee) te apawlnihtuakun hamphatna technology hangin ngahlawh(win-win)asumh omtuanlo kici thei veve hi.

Bang hang hiam cih leh technology in nasemmite nasep olsak-in thatang zat tangtang kullo aa, munkhat mek ziauziau in nasem uh banah nasepnei mihau sumhaute in zong mun khatkhatte ah thaman piakkullo setmilim(robot) zangh thei ziau uh hi. Mihing sangin setmilimte gennop zaw uh hi.Mihingte ngeina ahi cinatna, lungkimlohna tawh pute(boss) kiangah khasumkhan nadingin lungphonanei(boycott)cihte a omloh banah khasum zongh piakkullo lai uh aa, sawlbangbang phunlo takin asep ban vuah anvaakkullo lailai hi.

Asawtlo abeisa hunkhat lai-in Eric Schmidt (Chairman of google company) in agenna ah, mailamah leitung amakaih amasawn ding pen adang hilo-in technology hi ci’n tangko khinzo hi. Leitung koikoi ah iom zongh leitung kiuli thupiang pen mitphiatkal sungin kithei ahih manin leitung ah mitawmno khatin thuneihna tawh ki-ukna(dictatorship&communism/autocracy) azangh gamte (gtna: China, N.Korea, Arab gamte..etc) cihte in hih thukizakna (information and communication) pen kihta mahmah uh aa, amau gam ki-ukna tawh kituaklo thukhat pepeuh pen gammite in azakloh amuhlohna dingin hih technology mah zanghin ahunlapin khaktan susia (hacked) zel uh hi nap’n sawtveilo-in hih tecnology mah zanghin lampidangkhat mah tawh amau khaktanna kihemkhiazo veve hi.

Na khat pepeuh kikhelna pen ngaihsutna, zakna leh muhna pan hong piangkhia ahih mah bangin tuhun technology leh digital tuihualpi in politics ah mun hongla in hong tawnkhawm uh hi. Tunai gamkhat kikhelna leh kipuahphatna (transition and reformation) atamzaw thamthamin hih technology tungtawnin hong phulkhia ahi hi.

Ahawlkisamlo galvanleng tawh gal akikaphun hong sawt mahmah khinta hi. Asawtnawnlo hunkhatah ahawlkisamlo mawtaw kizangh ta ding cih thuging zong akizaak sawtkhin mahmah ta hi. Tua hun ciangin kuateng in nasep atanlawh lai diam! Leitung aa minthang mahmah Oxford University pan thukantalnanei( researcher) pawlkhat in agenna vuah, tulaitak leitung aa nasep 47% pen mailam kum 20 khit teh beimang thei ding hi, ci uh hi. Tulaitak technology asang pen khat kicithei Apple company ii application store in vanlei vanzuakzia tampi kikhelsaklai ding hi. Amazon ii cloud computer system in zongh nasepna( service) tampitak noptuamsak laiding banah facebook in zongh internet ah muntampitak investment bawlsawmlai hi.

Internet website khat bawlkhia-in company te in adeih leh sunkhat zankhat aa, mihaupi(millionaire) kisuahtheih hun ahi hi. Instragram cih website bang maan( photo) khat leh khat kihopsawnna( sharing) ah kizangh ahi hi. Hih instragram website pen facebook in hoihsa ahih manin 2012 kumin USD million 1000($ 1 billiion)tawh leiziau hi. Facebook in instragram aleima kha khat lai-in leitungah aminthang mahmah film& camera company ahi Kodak company sumhgawp ahih manin company khaklawh uh hi. Kodak company alawhcin laitakin company nasemmi tulzakhat leh alang(1.5 lakh) nei hi. Tua mah bangin leitungah tulaitak internet company pi ahi google company in nasemmi(staff) 46,000 nasepguan hi. Ahizongin mailamah nasemmi khiamsuk ding hi.

Nungkik Ding Maw, Mainawt Ding?(Move Forward or Not?)

Bangzahta-in tuhunah technology pilna khangto mah leh nasepna mun leh atuamtuamte-ah liangkokikimna(equality) leitungah om tuanlo hi. Technology pilna akhantoh mahmah zenzen hangin siamna leh kivakna, nuntak khuasak khankhiatna kibatloh manin nasem veve sumlutna (income) kikim dimdiam thei tuanlo hi. Nasepna ah liangko kikimlohna leh khasum kikhaihluatna pen tangtawng pek pan tuni dong hi aa, tua buaina avengsak alemtuah ding pen gamthu nasemte(politician) vaipuak( resbonsibility) ahi hi. Technology tuihualpi hunah itaisiam ibualsiam kei leh mite ikidempih(competitor) te’n hong taisan ding uh hi.

Hih technology tuihualpi nawkzawh nading leh gamkhantohna ah zatsiamna neih theih nadingin akhangkhang aa, gamuk gamnu gampa(government)te in muhna tangzaitak leh geelkholhna tawh gammite alamlah theih ding a thupi mahmah ahi hi. Pilna sinna sanginnpite ah laikung laidal tawh hi nawnlo, tua munah multi-media cih tawh computer vive kizat hun ahi hi. Laiwanna ah mark tampipi ngah nang ciang pilna(education system)hilo zaw-in sangman khit teh nuntakna ah zattheih pah nadingin (practical & critical thinking) cihte tawh kipattah uh hi.

Akhangto gamte ah hibangdan kalsuanzia leh kimaihna na thupisak mahmah uh hi. Gambup pilna khantohna( state education) cih thulu tawh tanlang pan tansawm dong kitangkoko hun hinawnlo-in leitung nuntakna ah akisamden mitawh kipawlsiamna( social science) nuntakna ah phutkhak pilna (experience) cihte thupisakin pilsianna sanginnpi pan kipattahna leitungah kizangh mahmah hita hi. Khan tawntung pilna sinte( lifelong learners) hun ahi hi.

Tua ahih manin technology in khantohlam manawhin kiamsukkik ding lam manawhlo hi. CharlesDarwin’s thupomzia(evolution theory) mah bangin, aniamna pan asanna ahoihlamah khangto tetek ding hi. Tua ahih manin mihing thatang tawh nasepna tanglai nasepzia pan set leh pilna (machine& technology) tawh nasepna nusia-in mihing thatang tawh nasepna ah kuamah ciahkik nuam zenzenlo ding hi. Nungkik ding cih thu om theilo ahih manin mainawt ding bek ahi hi.

Thukong Khakna (Concluding Remarks)

January, 2010 kumin American gamdanglam thuvanpi( state secretary)Mrs. Hillary Cliton in social media ahi, facebook, youtube, twitter, google cihte leitungbupah suaktatakin mikimin azat theihna dingin leitung gam tuamtuam aa, gamukumpite in gammite tungah suahtakna pia ding hi, cih tangkona(declaration) nei hi. Tua atangkona ah gammi khempeuh in suaktatakin amau blog ciat pan thuthak tuamtuam leh limtuamtuam kihawm thei ding cihte leh suaktatakin pautheihna (freedom of speech), suaktatakin lungphotheihna(freedom of expression) cihte kihel hi. Bang hang hiam cih leh gam pawlkhatte (gtna: China, Iran..etc) cihte ah kumpi in gamthu leh thutuamtuamte (politics& social) website mipi ettheihloh dingin khakcip uh hi.

Ahizongin leitungah mipi kiukna(democracy/of the people, by the people, for the people)apicing pen leh mimalsuahtakna(liberty, equality, justice/individual freedom) athupisak mahmah, Europe gamte danin mipi huhna noptuamna (social welfare) azangh kiukna( social democracy) bang hawmthawh zawzenin mimalkim suahtakna kiukna(liberal democracy) azangh America gam nangawnin 2013 kumin athusim tampitak uh Edward Snowden in agenkhiat ciangin thukizakna suahtakna(freedom of social media) a cihcih uh kitheihmawh bawl ta uh hi. Gam hubitna(national security) paulapin aimitdeh bang khikhe ta uh hi.

Tuma kum tulnih ma thamtham laipekin Greek mipil thungaihsunsiam Aristotle in, “ Mihing pen kuamah gamthu(naingnganzyi) tawh kipelh theilo hi( man is a political animal), na ci hi. Tua mah bangin tuhunah zong kuamah technology tawh kipelh thei nawnlo hi.Politics alamzan theih nadingin technology in atawsawn hita hi.

Tua ahih manin, hih technology tuihualpi in azawng ahau, apil asiam leh gamukmi gammi cih deidanlo-in phattuamna pia hi.Netniamna athuak gammite khutzat hoih penpen hong hita hi. Hih technology pilna in mikhempeuh amit uh keuhsak khin ding hita hi. Leitung aa minam tuamtuam(ethnics) cihte a mituh hong keuh ciangin, leitung tangthu abeina (the end of history) hong tung ding hi ci’n Francis Fukuyama in tuma kum tampi pekin na genkhin zo hi. Thautangkhat in mikhat bek kaplum thei aa, kammal khat in mitampitak ahoihlam ahizongin asialam ahizongin khelthei hi. Hi technology hunah thautang tawh kikap nawnlo-in huihlak pan kammal tawh kikap hun hita hi. Leitung paizia pen savai(materialism) panin khavai( spiritualism) keii mawk ta hi. Ahizongin asia sungah ahoih om aa, apha sungah zongh asia om hi.

Kikhelna leh khantohna khempeuhah siatna leh hoihna om hi. Nungkik nading thu omlo-in mainawt ding bek om ahih manin gamuk makaite in hangsantakin anawksuak ding uh ahi hi. Ahizongin kikhel hunah kikhel dingte kikhello-in alangpang ado teitei gamuk kumpite in hepkhiatna thuakin tutphah tanlawh thei gige uh hi cih, gamuk makaite in akhuaphawk ding uh hun mahmah ta hi. Bob Tuangpi (Mauvom)

Reference:

• 1. The political power of social media, by Clay Shirky.
• 2. Politic & technology, by John Street.
• 3. The Economist, January, 2014.