America Pawlpi liante’ thu ~ Pu Thangboi

America Pawlpi liante’ thu ~ Pu Thangboi

Pawlpi Lian Akhiatna

Hartford Institute for Religion Research (HIRR) te’ ciaptehna ah “Pawlpi Lian (Megachurch) cihpen nipi ni akikhawm mi 2,000 pan atungsiah aphate ci hi. Kikhawm mi 10,000 pan atungsiahte bel Gigachurch aci zong om hi. 2017 kum in America ah RC kihel lo mi 2,000 pan atungsiah kikhopna megachurch 1,300 val om ci hi. 10,000 pan atungsiah kikhopna Gigachurch pen 50 val om ci hi.

RC pawlpi bel mi 2,000 pan atungsiah akikhopna pawlpi 3,000 val om ci hi. RC pawlpi lak ah Coppell, Texas a om St Ann Pawlpi ah pawlpi mi tul 30 dektak om ahih man in RC sung ah agolpen hikha ding ci uh hi. America ah RC pawlpi mi atampen hi. Tutung America Pawlpi Liante’ Thu ah RC ahilo teng i thu akisut ding ahi hi.

Megachurch Tamna leh Tawmna State

Megachurch tampenna state pen California hi. Pawlpi lian 219 pha hi. Anihna Texas ah pawlpi lian 207 om a, athumna Florida ah pawlpi lian 120 om hi. Pawlpi lian atawmpenna state pen South Dakota leh Wyoming state te hi. Pawlpi lian 1 tuak bek om hi. Hih pawlpi liante atamzaw 1955 kum khit a kiphuan vive hi.

Mi 16,000 Pan Atungsiah

Nipi ni kikhawm mi 16,000 pan atungsiah apha pawlpi lian 25 om hi. Alian penpen Houston, Texas a om Lakewood Church hi. Kikhawm mi 40,000 val phaden ci hi. Hih pawlpi lianpen 25 sung ah pawlpi deidanna aneilo (non-demominational) pawlpi 13 pha hi. Southern Baptist Convention tawh akizom pawlpi 4 pha hi. Calvary Churches tawh akizom pawlpi 2 om hi. AG pawlpi 1 om hi. Tualo te’n a pawlpi uh gen selo uh hi.

Apiandang Deuh

Hih pawlpi lian 25 amakaih pastor te ahi nemnum khat zong omlo hi. Thugen siam tek mahmah uh a, mi tawh kipawl thei in, atei setset vive ahi uh hi. Tua lak ah atuampian deuh:

1. Rick Warren

Amah pen laibu minthang mahmah ahi “Purpose Driven Life (Zolai in Ngimna Tawsawn Nuntakna kici)” pen abawl khia pa hi. Ama’ pawlpi min pen Saddleback Church kici a Lake Forest, California State ah om hi. Pawlpi lian 25 lak ah a 11 na hi. Nipi ni kikhawm mi 20,000 val phaden ci hi. 2009 kum Obama in kumpi tokhom aluah ni in thu angetsak pa hi.

2. Steven Furtick

Kum 26 aphak kum ahi February 5, 2006 ni in Matthews, North Carolina ah Elevation Church pawlpi kipan hi. A pawlpi nawh khan lua mahmah ahih man in lamdang kisa mahmah hi. Amah pen laigelh asiam ban ah la phuah zong siam mahmah hi. New York Times i best-selling author zong hingei hi. Laibu tampi gelh a tua lak ah “Sun Stand Still” cih laibu minthang pen zong kihel hi. Pawlpi lian 25 lak ah a 9 na hi. A pawlpi ah nipi ni kikhawm mi 20,000 val den ci hi.

(Kikhawm mimal phazahte bel mun khat a kikhawm khawm uh hilo a, pawlpi kibang mun tuamtuam ah akikhawm teng kigawm hi).

Biakpiak Zia

Hih pawlpi liante sung ah biakpiakna la sak ciang in galkapte dan in tanglo in ding gemgam kawm sa leh kiim leh paam en guauguau kawmsa in la asa kuamah omlo hi. Suakta tak in khutlaam nuam te’n laam, mitsi nuamte mitsi, khukdin nuamte khukdin in biakpiakna la sa ziahziah uh hi. Music zong akim in tum ziahziah napi uh avek in kiza sialsial hi. Angaih tuam deuh omlo hi. Biakpiak kipatma in guitar taih nemnum khawng aging tuamtuam khawng omlo hi. Biakinn sung lutma in coffee leh moh ih duh leh nektheih in kikoih a, biakinn sung peuhmah ah bang mah nek ding phal vetlo uh hi. Man zaih a ki lehleh zong omlo hi. Naupang kap zong omlo. Ataii seesuu zong omlo hi.

Sumpi Don Zia

Sumpi don ciang in gual khat ah khatta in dong lian uh ahih man in manlang mahmah hi. Sumpi ap sung lasa cih zong om manlo hi. Pawlkhat in bel dong zong dong vetlo uh hi. Alutna kong gei ah sumpi khiatna ding bung koih uh a, tuah khiat ziau ahi hi. Sehsuah lai-ip zong om pah hi. Online pan zong khia uh hi. Sehsuah man uh ahih man un pawlpi lah hau amau lah hau mahmah uh hi.

Hun Uk

Hun uk (chair person) cih bang omlo hi. Aban aban in kisapsap ki meihset (introduce) thapaai cih bang omlo in dingto setset uh hi. Music tumdingte ahi zong powerpoint te ahi zong khat zong ngak kul peuhmah lo in kiging sa in om sitset uh hi.

Hun Zat Dan

Pawlpi lian ahih man in khatvei kikhop tawh pawlpi miteng tazo mahmah lo ahih man in khen 3 bang in kikhen uh hi. Zingsang lam, sun lam, nitak lam, cihbang in thumvei bang kikhawm uh hi. Akikhawm mi akibat loh hang pulpit tung a teng bel kibang paisuak hi. Lasak ding thugen ding teng akibang sitset ahi hi. Thugen te’n aciamnuih gen nangawn uh kibang sak sitset uh hi. Teci pang cih bang omlo hi. Hun man in kipan lian uh a hun man in tawp lian uh hi. Pastor pa’n athugen zah ding ahun ciangtan sa ahi hi. Ama’ muhtheih ding in a hun ngahzah naipi khat tawh kisuang in damdam in kiam suksuk hi. Ahun abei a akhawl tuan kei leh athugen khit a kisa ding la pen pansuk lel uh hi. Hih pawlpi liante’ pastor te atamzaw in vanleng nei lel uh ahih man in nipi ni mun tuamtuam ah ama’ vanleng tawh leng kawikawi a hun zang zong om hi.

Pastor Khasum

America ah RC Siampite leh Pastor te’ kum khat sumlut pen atamzaw $30,000 – 45,000 kikal hi. Ahi zong in atung a ih gen megachurch te’ pastor te’ khasum pen tam tuak mahmah hi. America a Pasian’ nasem ahaupen mi 8 lak ah 2 pen pawlpi lianpen 25 te’ pastor te hi. Ahau pen mi 8 lak ah akhatna Kenneth Copeland hi. $ 760 million bang anei ding in ki lam en hi. Fort Worth, Dallas, Texas a aomna a inn bekbek zong $ 6 million manh ci hi. Pawlpi lianpen 25 lak ah akhatna ahi Lakewood Church te’ pastor ahi Joe Osteen zong ahaupen mi 8 lak ah a lina ngah hi. $ 40 million bang nei ding in ki lam en hi. A inn bekbek zong $ 10.5 million manh hi. Rick Warren in bel a sagihna ngah hi. $ 25 million nei ding in ki lam en hi. Ama’n bel “Ka mawtaw pen kum 12 a upa ta ford mawtaw hi, hih ka inn ah zong ka om zawh kum 22 pha khin, ka nai zong Wal Mart a kalei hi e, vanleng gen loh gunkuang nangawn nei keng” cingei hi.

Pastor Nasep

Senior pastor atamzaw te’n nipi ni thugen ding teng buplak uh hi. Thum vei bang akibang sitset a thugen pen baih hetlo ci hi. Tua lo ama’ khutnuai a assistant/associate pastor te’n bel mopawi vai leh sivui vai khawng atuam tek in latek uh hi. Mun khempeuh ah senior pastor bekbek kipeii alal kawikawi cih omlo hi. Nasep hawm dimdiam uh hi. A tamzaw in Board of Directors (or) Executive Board/Directors nei uh a tua te’n pawlpi vai khempeuh van uh hi.

Pawlpi Nasep

Pawlpi sung a nasep kisamte zon sak, naupang sangkah nailote pantah uh (anu leh apa’ ading vanzang tuam mahmah), nupa kikal leh innkuan sung buaina tuamtuam te avan ngiat om, pitek putek te avan ngiat om, cimawh genthei huhna kisamte huh ngiatngiat, khuasung ah zong huhna piaktheih bang pia, media lamte zong nasep tam mahmah, gamsung mun tuamtuam leh gamdang dong ah mission sem, cih bang khawng hi. Pilna lam thupi sak mahmah uh. Tua hi in nipi ni sim apiangthak leh pawl lutthak om ziahziah den lel hi. Apiangthakte follow-up bawl pah lianlian lai uh hi.

Thukhupna

Hih bang laite kong gelh ciang in theipen ding kaih teh cihna hi zenzen lo a, Zolai in ka simkhak ngeilohte agelh zel kahi zaw hi. Zomite’ makaih megachurch asuak kuankuan leh asuak khin phial ta pawlpi zong kawlgam leh America ah om ta ahih man in kigin kholhna tawm beek apian a leh hih lai ka gelh khak ka lungkim mahmah ding hi.

Pawlpi ih cih pen Pasian’ min tawh kipawlna leh nasepna ahih man in Pasian mah dot ngiatngait huai kasa hi. Pasian’ sawlna omlopi in pawlpi khawng mawk phuat hetloh ding ahi hi. Hoihsakna leh lawpna lel tawh akiphuan pawlpi abei khin zong tam mahmah a, abei lai ding zong tam mahmah hi. Zomi te’n vai thupi khat ih sawm sim in Pasian mah dongh ngiatngiat leng khialhna tawm pen in ka um hi. Lai nong simsak lungdam mahmah ing, Note’ itna sung ah (Mung Laan Thang) Tawmvei, Denver, CO, USA September 13, 2018