Minam kitukalhlo, mimal kitukalh (Kawlgam Census) ~ Pu Zokhai

Minam kitukalhlo, mimal kitukalh (Kawlgam Census) ~ Pu Zokhai

Suutsuut, awiawi-in, geelgeel phot peuhmah dihni, I’ Zomi vaai, Laaizom Ngaihte-aw! Zomi sung-ah ‘minam’ kitukalhlo-hi. Amihingte kitukalh-hi. Ami akitukalh-pen mi-mawkmawkte’ haanciamna-tawh apiang zoding hilo-in, alian zekmah, ahau zekmah, siamsinna asaang zekmah, mi tampite’ theih zekmah tebek-in kitukalhna lawhzo, bawlzo bek-uhhi.

Zomi pate-in leitang to-kol masa lo-in, lobulte, singbulte longkhia masa lopi-in Zomi khaici hongtuh uh-a, tua khaici po kimlo, apo sunsun honkhatte cingteekgawp, tatah (takneilo)gawp, pawlkhatte suanghuum lakleh lopa tung-ah kia ahihman-in zungkhak nading leitang omlo-in apo-in po vetlo hihbang dinmun-ah Zomite ki-om laaitak-hi.

Zungkhak nading leitang-tawh akizom khalo khaicite huih lak-ah keucip-in mangthang-a, amau’ mun-ah lauluangte, sialluangte, bii leh phaai cihte hongpo-a, leihoih themcik tung-ah akia-kha apo-kha ankungte deepcip uhhi. Kawl kumpite’ silate hongkuan ciang-in tua ankungte abeimang nading-in lauluang, sialluang, bii leh loo-te tuibuak-in eekleiza pia-uh ahihman-in ankungte deepgawp-a teemgawp khinta-hi.

Tu-in, ankungte akhanhoih nading-in ankungte’ phung kitokol laaitak, eekleiza kipia laaitak ahihi. Ankungte’ phung aki-tawhkol hun-in tawlno khatzung ankungte-zong zawm mahmah-in vul thei-a, akiim-a loo-kungte ahihleh zawm beklo-in kito-khia laai-hi. Sawtlo-in vul-in siding uhhi. Tua-pen ankung hah/zuun kici-hi. Ankungte’ phung aki-tawhkol laaitak-in amah leh akiim apaam-a apo khempeuh-in nasa-in vul uh-a, anua ciang-in ankung hong khanghoih-in loo-kungte beimang-hi. Zomi’ phung aki-tawhkol laaitak leh khitteh hihbangmah hiding-hi.

Ankung tawhkolna-ah thugen lasakna amuibunh penpen hi-a, Zomi ahum/ahuu, aphungvuh, tha apia, alawpsak thulehla namcin agenthei, agelhthei khempeuh-in gengen suutsuut, gelhgelhding ahihi. Minam naseem akisa mahmah pawlkhatte-in thugengen, laaigelgelh te-khawng “huihbung” aci-tawh, “hong seempah vevua” aci-tawh, “gelhgelh, gengen bek-tawh bangmah piang kenteh” aci-tawh, gam sung-a omdiakte bang-in, “hong ciah-in hong seempah vevua” aci-tawh hihte-pen mihai kampau ahihman-in I’ minam nunniamna akilangh hilel-a, khatsiat-huai mahmah bek-in, hehhuai lo-hi. Gelhgelhding, suutsuutding, simsimding, zazading, lungtang-ah thun ngiatding, tua taktek nuntaakpih nading lampi omthei pan-hi.

Gengen, suutsuut, simsim, thunthun, lungsim-ah mun tampi luahsak, tua takciang-in veiina om theipan-a, tua veiina kigawm khawmthei panding-hi. Kawlgam Nai-Ngan-Zyi tanzil cianglel ahi zuauphuak liang-a kamciam piapia, vote (mee) zongzong-a angsung zonna ciang-tawh Zomi-vaai helkhawm khaloding hihang. Minam-pen minam hi-a, amaantak leh apiicing political kimawlna ahihkei buangleh “minam-in minam ahihi, minam-in minam’ gamlei-ah thuneihna aneihding” hihthu bekbek suutsuutding ahihi. Zai leh toi thu-peuh, Chin State leh Kawl Gamukte’ gamgi khunna peuh-tawh mehmeh kisam naailo-hi.

Akuul masapen, athupipenpen “Zomi akiciteng Zomi ahihi. Minam kiplehkho khat ahihi. I’ minam-in I’ minam teenna leitang-ah thuneihna I-neihloh phamawh-hi” hihthu bekbek ahihi. Minam khanlawhna-pen laaigelhna, thugenna, lasakna pan-in tua laaite simsim, tua gennate ngaingai, tua late ngaingai, tuateh pianthakna piangthei pan-hi. Laaigelhte-in lungsim leh kha-tawh agelh hi-a, thugente-zong lasate-zong tuabangmah ahihi. Zomi phung aki-tawhkol laaitak-in, Zomi hum vilvel-a laaigelhte, thugente, lasate amawhsak mite, azahpih mite-pen ankung lak-a lauluang, sialluang, bii leh loo-te hilel uhhi.

Zomism lungsim-tawh sepkhiatna gah masa:

Malaysia-ah gaaltaai honkhat-in UNHCR delh uh-a, tua-ah amadawk-in Victor Khambil (UN-min Victor Khensang)-in Dr Suikhar te’ lamlahna-tawh Chin Refugee Committee (CRC) nana-phut uhhi. Tualaai-ah Zomite naakpi-in paampaih uh-a, abeel sunsunte khembawl-in nawlkhiin uhhi (aneng atawng-in na’ theihnopleh hong hopih kiik-in). Tua ciang-in thongsung mahmah pan-in “UNHCR-ah racial discrimination nasia tak-in ki practice-hi” ci-in Hong Kong based the United Nations High Commissioner for Human Rights (UNHCHR) leh Geneva Convention, London based Amnesty International  upaphualte leh tualsung Humanitarian upaphualte ahi SUHAKAM leh SUARAM te-ah laai ka’ khia-hi.

Amnesty International London-a Isabelle (Asia Pacific Regional Commissioner and South East Asian Consular: +44 2074 135 500 tu-inbel amah hi nawnkei kha incin 2005 teng-a aseem-hi)-leh International Journalist Alice Nor te-in naakpi-in lam honglak-a, laaigelh ziading, bang point teng lading cihte thu honglah man-in naakpi-in muibunh-hi.

Thongsung pan-in ka’ pusuak nungsang-in CRC peuhmah-ah tokaai lo-a, Zomi-in Zomi-tawh phuding ngiimna-tawh Pasian’ geelna dungzuui-in ZAM hongpiang cipak-ni. ZAM kipawlna huihbung/huihthau (mi’ muhna-ah)-tawh naakpi-in UNHCR kikaap ahihman-in UNHCR inntual-ah Zomite hong laam litlit theipan hi-a, tua ma-in ahihleh CRC’ khateh dawl-a, tokaai themcik bek-in UN laai atawi ahihi.

Tua hi-a, Zogam pan-in Pasian’ thugen daan-a hongpai avekpi hisaam kencin pawlkhatte bangpen tua CRC’ nuai-ah akiluut lohman bekbek-a note hong zindoding leh hong samzoding gamnuam-ah Zomi ahoihkhom ana-omthei ahihlambeek thei le-uhcin hoihding-hi. Malaysia-ah 2005 kiim pan-in “Chin” mah nana kicici le-ung, tu-a na’ zintunna tepawl-uh gamdang tung khollo maithei ahihlamzong phawk-huai peuhmah-hi.

Hihthu pawlkhat-in toicik tak-in ensuk leuleu zeel-a, “Zomi cihkhawng Malaysia-a Hakhate’ tung-ah na’ thangpaih manpeuh uh-a hongging hilel” acibang om laailaai liang-hi. Malaysia-pen minam lungsim akitel khiatna mun ahihi. Canada pan-in Laimi upate tua a-Victor Khensang mahmah hong paikiik ngiat-in, USA-a Laimi buppi-tawh akithuminh thute sepsinna (practice)-in hongnei-hi. Kuala Lumpur thu-bek hi kilkel lo-hi. Amau 700 vaalta-bang akikhopna Jalan Imbi-ah “Zomi akici, MahSahLah hunlaai-a hong ukngei mite ahithei zah-in alampi khaakding” ci-in taangko ziahziah uhhi. Atuapi-mah athukhual bangkeek-in “Chin mah hi-ung” ci-in CRC-ah va-tokaai teeiteei talehang “haii” hong sakna kibehlap bekding-a, Zomi hizah gamdang tunglo dinghi.

Na’ phawkding-uh: AU bekbek-ah, kampheen-in ka’ pai ciang-in, Laimi sinsen hinapi, Khup Suan Mung, Mang Lian Thang, Lian Khen Kap….. cihte-a kipan Zomi min sinsen tampi om-hi. Ahang I-theibeek uhhiam? Hihte UN Appointment Card aki lei-theih mapek ahihi. UN-ah ka’ puak laaiphah ka’ ngilh naailoh khat-pen CRC Serial No. 820 atawi laaizom khat CRC-ah vapai-a,

“Serial No 1000 vaalte nangawn kisam ta-a, kei’ hun tung naailo-hiam?” avacih takciang-in, “Na’ card luui luata, athak laihding” ci-in card thak bawlsak-a, Serial No 2800 pia ziau-hi.

Pasian-in Ama’ bawlsa minam mangngilhlo ahihman-in a card luui-pen aneipa-in keem ciitciat-a, ZAM-ah hongpai ciang-in card thak leh aluui Xerox pah-in tua-tawh akibang liinlian adang 6-tawh UNHCR-ah ka’ puak-hi. Tuabangte’ nung-ah, “ZAM kipawlna-a pawlmite minsaanna (registration) hongpia mah nu’ng-eileh” hong kici panpan ahihlam mangngilh keini. Malaysia-a Laimite’ tung-a thangpaihna ciangbek hilo-hi. Zomite gamnuam atun theih nading lunggulhna lianzaw thamtham ahihna phawkni. UNHCR-ah uliante’ khepeek aliakliak Laimite’ ziak-in gamdang pai nading form tung-ah “Chin” hong cihteeiteei poi masa peuhmah lo-hi. Gam khempeuh-ah minam maan akilat nading lampi hoih mahmah “CENSUS” om lel-hi.

Misimna (Census):

Tua ahihman-in hih ahoihpen lampi tu-in Kawlgam nangawn-ah hong piang theiding dinmun hita-a, tua CENSUS ah “Chin I-cih keileh toilua, …….” cihte lungsim pan-in laakkhiat peuhmah photding ahihi. Chin cihloh-a toilua ahihleh Tedim Chin toi lua-lawmlawm loding-hiam? Tonzaang Chin, Dim Chin, Teizaang Chin, Siyin Chin, Zo Chin, hihte toi cihtak toizaw loding-hiam? Bawng-ek (Bullshit) deenkeek bang loding I-hihiam???  “Zomi hihna lahkhiat nading hibek lampi om-eih” ci-a lawptak-a gelhsuk pahding bangmah haksa lo-hi.

Thunuazuui-bel asia hi ngeilo dinghi, aciillam-in anphung tawhkol mahbang-in “akhial I-hiale??” kici thei zahdong ding-in supna baaina ommai kha-mah ding-hi, ahizong-in tawhkolsa ankung’ ading guah hongzu peelmawh ding-a, tua ciang-in ankung honghing dilhdelh-in hongdawng ding-a, hongkhang-in dawn hongsuang dinghi.

Zomi leh Chin kitukalh lo-a, mihing nih ahihi. Amau’ masuan ciatciat akhuatding ahihi. Zomi sung-ah akitukalh-pen nang leh kei ahihi. Thudang hilo-hi. Nupa kitawng-a akikhen keileh amau’ inn kuamah-in sehhawm theilo-hi. Akisamlo lauthawngna batlaak kuullo-hi. Nupa akilem naakleh amau’ dawhkaan kuamah’n tuhkhia theilo-hi. Amau’ lupna laaikhun kuamah-in suankhia theilo-hi. Amau’ kaal-ah tui leh huih-zong thawl lo-hi.

Zomite-aw, I’ kaal-ah tui leh huih genloh ei’ pau-a khiatna neilopi kammal Chin peuh thawlsak loding hihang. Kawl ngalkhuahaang leh Lai pheisam te-peuh thawlsak loding hihang. Hihpen Minam’ Politics hi-a, Kawlgam Nai-ngan-gyi kidemna tepawl hilo-hi. Minam’ Sisan thu ahihi. Minam’ suahtaakna thu ahihi. Minam’ leitang leh Minam’ maailam ahihi. Zomi Pasian’ Thupha! Zokhai (Written on 27 August 2013)

Pasian-in maaipha pia pak-a, mipi maai-ah thugen lasa thei dinmun-a a-om Pasian’ thugente ataangpi-in pawlpi mite suplawh dingciang ngaihsutna-tawh Chin leh Zomi kaal-ah bangbang hileh nana kitaaklah keile-uh minam’ maailam hizaw dinghi. Pasian’ thu-ah kigii/gamgi (boundary) omlo ahihlam thei unla, minam-in ama’ nam nei ahihlam theihding akilawm ahihi.

Pasian-in Thuciam Luui hun-in “minam: Israel mite” a-ukzia, apaipihzia theihding ahihi. Amah biakna-ah minam deidanna omlo ding-a, minam vaai-ah minam huamteng bekmah minam khat ahihlam athak-a phawk theihding akisam ahihi. Minam-pen ZBC, AG, RC, EBC, TBC,….. cihte hilo-in Zomi ahihi.