Kawlpi thuthang azom (05 November)

Kawlpi thuthang azom (05 November)

Dear All, Omna ciat pan thukizaksakna-in Kalaymyo thu ka theihkhak
tawmlai hong hawmsawn hi ing.

1. Nupa-kop Thusinna:

Kawlpi khua-ah a khatveina “Nupa-kop Thusinna” pen Nov.5-7, 2014 sung
AMC Pawlpi ah kinei ta ding ahi hi. Pawl tuamtuam panin Pastor te leh
a zite uh nipa kop 50 hi ding hi.

Thusinna pia ding pen, Revd Dr Jm Ngul Khan Pau (a) JM.Paupu te nupa
hi ding hi. Sunsung nasiatakin thusung ngelngek ding uh a, nitak
biakpiak kikhopna hun ahih leh a kihel nuam peuhmah limphatakin hong
muak hi ung, cih AMC pawlpu min tawh kong zawn uh hi. Tunitak hun
mahin Revd Job Thawngno in a laibu bawl thak sitset nam thumte honna
leh khahkhiatna hun thupitakin zong Dr Jm Paupu’ tungtawnin nei ding
ahi hi.

2. Kalaymyo ah ZOFA Khawmpi om ding:

Hongtung ding Nov.19-21, 2014 sungteng sanggam Mizote’ makaihna tawh a
khatveina, “Zofa Global Network Youth Cobference” thupitakin nei ding
uh hi. Tuamun ah Mizo, Falam, Hakha leh Tedim/Zomi kipawlkhawm ding
a, committee zong gualkhin uh hi.

Lasiam tuamtuamte in zong zai dibg uh a, minam, kampau n lhat in La
dawng 8 ta sa ding a, makaite’n sehkhin dimdiam uh hi. A diakdiakin
Tg.Sangpi, Mai Sungtinpar, Lia Zamnu leh Thawn Khamte a kipan amau lam
a mithang pawlkhat leh khangthak lasiam te’n zai ding uh hi.

Amun pen Vengsak hallpi, Mizo veeng, Tahan hi ding hi. Mizoram panin
khangno bekbek 400 bang leh makaipi honkhat hong pai dingin geelna nei
uh hi.

Hih bang a ngimnapi un’ahih leh Mizo gamah Kawlgam mite hong kisimmawh
kinken a, hong neumuhna uh a kiamtuam’nading leh kilawmtakna hoih a
pian theih tiam nading lunggulhna ahi hi, cih committee te khat in gen
hi.

Thu-le-La ngaihtak thei kha ngel ding ahih manin a za kha nai lo, a
lunglut sim gougiaute’ ading deihsakna tawh a kihawmsawn i hi hi.
Lutman cih te ki la lo ding a, tlawmngaihna cihte a omdak vua leh
hibek ding ahi hi.

3. Thusina nuamtak kizo:

Kalay No.2 Section min tawh Siate leh Upate’ thusina pen nung nipi
sungin AMC Pawlpi ah kinei-in nuamtak zo thei a, Revd Dr Go Chin Zam
(O.M, Yangon) in Thusinpihna leh nitak sim thugenpi srm a, tha kingah
mahmah hi. Tuate a thucingin i suaksak khin zo hi.

4. Kalaymyo Tuukpeeng kidemna pawlkhat:

(1) Mizo lamdiakte’ makaihna tawh kumsim a a neih zel uh bawhlung
kidna pen nung khasungteng Tahan vengsak tualpi ah nei uh a, Oct.31,
2014 ni-in Final kisui ta uh hi. Nidanga a gualzo den ahi, Tahan F te
pen tukum kiakhin pah uh a, Kawlkulh Vs Muntlha kimawl uh nasia lua
keei uh hi. Kaelkulh in 1:00 tawh zo uh hi.

Hih Tualpi pen Kawlpi a kumpite’ a losiah lakah a hoih pen hi a,
hallpi zong a lang tuakah lam uh hi. A kim teng kulhpi tawj um uh a,
gatepi bawl uh hi. Tuabanah mipite’ et nading aaitengah sik khau
kipante tawh um uh a, mipi kinael nawk zong om lo-in asinpi mahmah hi.
Ka lungsim ah hibang tualpi hoih Zomite in cikbang ciang a kinei zo ta
maw, kaci simsim a, ka eng peuhmah hi. Hanmual kilaksakna khawngah
neih ding pen uthuai kasa’hei kei leuleu hi. Leitang munawng tamlua
mai!

(2) Munlai tualpi ah zong kumsim a a neih zel uh a vengveng leh minam
tuamtuam tawh Sept.kha pek pan a kimawl uh zodek ta uh hihtuak a,
tualpi kimkot dim mahin ki en den cih kigen hi.

(3) ZOFA te zong kilimmawlsanahmah uh cih za zel hang. Tuate amau
hong genna mutek ni ci ing.

5. CCPur ah ZOLL Thusina om ding:

“Zomi Language Literatute te’ vaihawmna tawh Lamka kualteng mualtung
mi namneu tuamtuamte lailam kipawlna tawh Nov.6-8, 2014 sung Lamka
College ah seminar & workshop thupitak neu ding uh hi. Ni 9, Nipi ni
sun pen pawlpi tuamtuamah kikhen a hun neihtek dingin geel uh hi.

Kawlgam panin tulaitak ZCLS Pupi, Revd Hau Khen Kham (a) Khampu
(Executive Secretary, ZCLS) leh Yangon, Tedim pan kigawm mi 8 paito
khin uh hi.

6. Ih zaksa mahbangin Hakha khuapi ah zong Zofa khawmpi pen zing leh
thai sung tengah nei ding uh a, eimi pawlkhat zong va kihel thei ding
cih kiza hi. Hih Zifa cih pen Mizo pau hi a, Zitate cihna na himawk
hi. A kimidang lo i hidan ta ve!

7. Australia Visa ngah:

Revd Tuan Suan Thang (a) Thangno (Phualpi A.G, Senior Pastor) pen a
pawlpi mite’ saona tawh Australia Visa hong ngah a, tuni in Yangon
panin leengkhia ta hi. Lungdampih hang.

8. U.K pan hong ciah:

Tg.Billy Zam Heh Pau (a) Sia Billy Pauno ((Saipimual) pen U.K ah
sawtpi a om zawh Kawlgam hong ciah a, motor thak khat tawh a inn,
Kalaymyo hong tung hi. Falam ZTC leh MIT te ah sanglah a, Pasian’nasem
khat agih manin i lungdampih’hi.

9. Kawlpi banman pawlkhat:

Aalu tawikhat Ks. 1,000/-

Gawpi tawikhat – 300/400

Bawngsa – 8,000/-

Voksa – 7,000/-

Ngasa – 6,000/-

Kumpi aksa – 6,000/-

Zo Aksa – 9,000/- leh Zo Akpi tuilai – 13,000-15,000/-

Chinmawng lom thum – Ks.50/- bek hi a,mehtui-in huannih bangkikhomhi.

Antang Ayrzermin ip khat – 29,000-30,000/- Kawlpi ah a limpen cih ding
himai in teh.

(Hihte nisim a kikhel zong om thei banah khat le khat i zuakna zong
kibang khin lian thei khol lo a, a nai huai pen cihna hi).

10. Na bawlsak nop leh:

Hamdsetleh Computer kisia na etsak’nop leh Sia Kap En Cin (Cinpi)
Zotaang siamlhia mahmah hi ei. Deihsakna nei, thunuamin, neksia lo lai
hi. RTC kongkhang ah a zi tawh sai hongin om uh hi.

Amah pen a pate Ngennung pan hi a, buaih a lakkhit ciangin Singapore
ah hihbang lamsang a, a zawh khit teh hibang a sem ahi hi.

NB: Tusun limphatak a ka gelh khit sitset, ka send leh connection hoih
lo lua, ki bumang khin agih manin kong gelh kik samsam ahi hi. Spell
check kik man nawn lo ka hih manin khialhna a om leh hongna theisuam
ta un. Laisim mimal tungah ka lungdam.

Peter Khampu
CMedia, Kalay