Philippines gamsung aom Shopping Mall khat meikang in mi 37 si

Philippines gamsung aom Shopping Mall khat meikang in mi 37 si

Philippines gamsung aom Shopping Mall inngolpi khat meikanggawp ahih manin mi 37 bang siding cih AFP pan kiza hi. Tuni Sunday (Dec 24) ni in kumpi thunei Local Authorities te’n agenkhiatna ah meikatna pen Southern Philippines gamsung aom Davao City sungah Shopping Mall khat akanggawp cihi.

Hih meikatna Shopping Mall pen NCCC Mall kici a, dawl 4 (four-storey) apha ahihi. Saturday zingsanglam in meikat akipan hi a, Sunday zingsang khuavak madong in mei kuangkuanglai cihi. Meikat hunsung pen nai 24 dektak meikang ngekngek hi ci’n District Police Officer Ralph Canoy in genkhia hi.

Meikatna aphual ah aomkha ahi Bureau of Fire Protection Commander inzong Shopping Mall sungah a awkcip mi 37 te ii anuntak, asuahtak nadingin lamet omvet nawnlo hi ci’n genkhia hi.

Hih Shopping Mall sungah meikat akipatna pen dawl 3 napan akipan cihi. Tua dawl 3 na ah innsung vanzat singtawh akibawl Wooden Furniture tuamtuam, Plastic Ware leh Fabrics pawlkhat akizuak hi a, tuate panin meikuang akipat ciangin meikuang kilawhbaih mahmah cihi. Meikuang pen huaisia mahmah ahih manin, ahunlap in aki phelhsiangzo paklo ahihi.

Hih Shopping Mall ii atungdawl ah Call Center khatzong aom hi a, tua Call Center pen nikhatbup 24 Hours sung akihong ahihi. Tua Call Center sungah nasem tampite meikat ciangin phawkpaklo in, aphawk uh ciangin taikhia theinawnlo, awkcip in asi uh hiding kici hi.

Hih meikatna ahang taktakpen tuciangdong bangmah Official in genkhiatna omnailo cihi.

Video: 37 dead in Philippines mall fire

Hih meikatna khua ahi Davao City pen tulaitak Philippines gamsung ah President asemlaitak ahi Rodrigo Duterte ii tualbialna khuapi khat ahihi. Abeisa in Rodrigo Duterte in hih khuasung ah Davao Mayor akigawm in kum 20 sungbang semngei a, hihkhuasung mahahzong ateensuak ahihi.

Ama tualbialna khua ahihtawh President Rodrigo Duterte pen hih meikatna hangin Saturday nitaklam in asi aliam teleh a innkuanpih te uh ahehnemding in vahawh cihi.

Davao City sungah akigawm in mimal Population 1.5 Million bang ateenna hi a, Southern Philippines gamsung ah khuapi alianpen ahihi. Philippines gam ii Capital khuapi ahi Manila City panin 1000 km ki gamla hi.

More: Myanmar, Bago aom tagah kepna sanginn khat meikangtum citciat

Tulaitak Philippines gamsung ah huihpi leh guahsia in nawkgawp in, mi tampitak in sihlawh uhhi. Christian atamzaw ateenna gamkhat ahihtawh Christmas bawlding in akithawi laitak un tuahsiatna tuamtuam in khatkhitkhat sulzuih toto citciat hi. Sawltak #zomidaily