Easter Sunday Message: Na dam hiam? Zeisu in Dammaw hongci hi ~ Sia Pau Khai

Easter Sunday Message: Na dam hiam? Zeisu in Dammaw hongci hi ~ Sia Pau Khai

Matt 28:9 :: USA kumpi pa Donald J. Trump in April 14 ni-in Easter Message apiakna sungah, ” Exodus is the story of Freedom” ci hi. Paikhiatna pen Suahtakna tangthu hi acih pen man mahmah kasa hi. Israel te Egypt pan apaikhiat manun tuni in Israel State na om thei bek a, Israel tangthu hongpiang thei bek hi. Zeisu zong hansungah na omsuak leh tuni a imuakding Easter Sunday (Thawhkik Nipi) pen aom thei lo ding ahihi. Ahizongin Zeisu hansung pan hongthawh kik ciangin Christian te upna bulpi bek hilo in Vantung gam tunna dingin suahtakna lampi thak hongsial sak ahihi.

A Thokik Zeisu in mimal in honghopih nuam hi. Zeisu in amah azongte hopih masa nuam hi.

Zeisu in a hopih mipeuhmah akisap tawh piakhawm pahpah hi.

1. Nadam hiam hongci hi….
2. Na lau hiam hongci hi.
3. Na lamet bei hiam hongci hi.
4. Na guallel hiam hongci hi.
5. Na genthei lua hiam hongci hi.

Tuni in Zeisu athawhkik khitteh ni 40 sungin 11 vei akilat mahbangin athakin tuni in ei mimal kim tungah hongkilang nuam hi. Koi ah hong kilang leh ut nahiam? I omna mun leh i omdan Zeisu in theinuam den hi.

Koi ah om nahiam? Zeisu hong kilang ding hi.

1. Biakinn sungah om maw.
2. Nasepna ah om maw.
3. Sanginn sungah om maw.
4. Khualzinna ah om maw.
5. Gamsungah ommaw.
6. Khamtheih guihtheih mun ah om maw.
7. Zato ah om maw.
8. Thong inn ah om maw.
9. Innsung ah maw.

Zeisu in hongho pih leh na dawndan ding geel in.

Bangin nang’ hong nengcip hiam?

Zeisu suangtum in apusuahna ding hucip hi.
Tuni in bang suangtum in hong hucip hiam?

1. Natna suangtum maw?
2. Lungkhamna suangtum maw?
3. Kamsiatna suangtum maw?
4. Zawnna suangtum maw?

Zeisu in suangtum lakhia losa in tho thei mahmah hi ahizongin banghangin lakhia hiam cih leh avangliatna akimuhna ding ahihi.

Tuni in natunga suangtum tuamtuam te Zeisu in honglak khiatsak nuam hi.

Athokik Zeisu in vaikhak khat hongnei hi tua pen:

1. Lungdamna Gospel thu tangko ding.
2. Mi khempeuh nungzui mi suaksak ding.
3. Zeisu kammal aum a semte tungah nalamdang piang ding.

Na damhiam?

Zeisu in na damhiam? cih kammal tawh tuni in mimal in honghopih hi. Na kisap bangbang gen in. Kuama tunga nagen ngamloh hamsatna khempeuh Zeisu tungah ko in gen in.

Tua ahih manin kum 2017 Zeisu thawhkikna in mimal kim adingin,

1. Kha thu ah suahtakna ,
2. Taksa thu ah cidamna ,
3. Lungsim thu ah siangthona,
4. Sepna thu ah lawhcinna hongsuak sak tahen.

Zeisu tawh akiho peuhpeuh kilamdang hi.

1. Siluang nu hopih in dam paisuak sak hi.
2. Kum 38 cina pa hopih in damsak pah hi.
3. Peter thongsungah hopih in suakta sak pah hi.
4. Lazarus hansung ah hopih in hingkik pah hi.
5. Mittawpa hopih in khua mupah hi.
6. Canaan nupi hopih in atanu dampah hi.
7. Singlamteh tunga kikhai pa hopih in gupna ngahpah hi.

Topa in tuni in ei mimal hong hopih nuam hi.

Lungdamna leh thungetsakna tawh,

Rev. Pau Khan Khai
Louisville, Kentucky
April 15, 2017