Thai numeikhat apumpi tungah cipol dim ahih manin apasal in nusia

Thai numeikhat apumpi tungah cipol dim ahih manin apasal in nusia

Thai gammi numeikhat apumpi tungah cipol bekbek kidim zihziah ahih manin, apasal in deihnawnlo in nusia cimawk hi. Tuabek thamlo, anasepna Boss te’nzong nasemding in deihnawnlo in khawlsak uh cisawnsawn hi.

Hih numeinu pen kum 27 aphakhin hi a, aminpen Arunsri kici hi. Amahpen cimek nasep “Masseuse” sem in, anu leh atate 2 avak ahihi. Atate pen kum 9 leh kum 12 hipan uh a, amahbek innsung ah nasemthei, sumzongpi “Sole Breadwinner” ahihi.

Apumpi tungah “Psoriasis” akici cipol vive tawh kidim zihziah ahih manin, AIDS khawng anei hikhaleh ci’n Customers te’n alunghimawh uhciangin anasepna Boss te’nzong nasep khawlsakpah sawnsawn uhhi.

Hih numeinu ii hamsatna amuhpih atheihpih Actor Bhin Bunluerit in alung nuamlo ahih manin, nungdiak in ama Facebook Page tungah suahkhia in, tuapan in mipi tampitak in akitheihlawh ahihi.

Hih numeinu pen apumpi tungah abeisa sawtpi pekin hihbangin Psoriasis kici cipol aomtheizel hi a, phatuam in mangcipzel himahleh tawlkhat khitciangin in kipankikzel hi. Ahi zongin ata anihna agai laitak in hih acipol tepen huaisiadiak cihi.

Tuabang in apumpi tungah cipol vive muhtheih dingin aom kawikawi ciangin anasepna ah Customer te’nzong natna hoihlo, AIDS khawng anei ahihding patau in, ama cimekding kuamah utnawnlo uhhi. Tuahangin anasepna Boss te’nzong nasep akhawlsak uh ahihi.

Tua numeinu in TV Broadcast tungah khitui luangkawmkawm in “ka pasal in hih ka cipol teng atamluat ciangin hong gimneih in hong nusia hi” ci’n khasiatak in genkhia hi.

Ka cipol te adamkiktheih mengmeng nading ka lunggulh mahmah hi. Tua hileh nasep kipankik in, kanu leh ka tate 2 hoihtak in kakem, ka pantahnuam hi ci’nzong genbeh hi.

Tulaitak hih numeinu pen Bangkok aom alawm ahehpih khat ii innah omin, naseploh pen kha 5 sungbang hita hi. Bangkok ah anatna Psoriasis kibawl in, zatui aneknek laitak ahihi.

More: Apasal tawh alumkhawm numeikhat azi in atheih ciangin avan sungah zasan hensak

Actor Bhin Bunluerit in hehpihhuai salua ahih manin, huhna azonsak hi a, Sponsors pawlkhat te’n asumtang in Bt10,000 (S$410) leh vanzat kisam pawlkhat, antang cihbang piakhia uhhi. Actor Bhin Bunluerit ngiat inzong ama ipsung panin sum Bt15,000 piakhia in, tuaban ah hih numeinu ahuhnuam aomleh ci’n Bank Account Number tezong Online ah pulak khiatsak cih The Nations pan kiza hi. Sawltak #zomidaily